2 Raja-Raja 1:1-18
-
Inubuatken Elia kematen Ahasia (1-18)
1 Kenca mate Ahap, mberontak Moap+ man Israel.
2 Bas sada wari, ndabuh Ahasia arah lubang bas ruangen si lit i teruh atapna i Samaria, janah terluka ia. Emaka suruhna kalak. Nina man kalak e, “Sungkunlah Baalsebub dibata Ekron+ gelah kuteh malem aku ntah lang.”+
3 Tapi nina malekat Jahwe man Elia*+ kalak Tisbe, “Jumpai kalak si isuruh raja Samaria e, kataken bana, ‘La nge lit Dibata bas Israel maka nungkun kena man Baalsebub dibata Ekron?+
4 Emaka bagenda nina Jahwe man raja, “Labo kam nusur arah ingan medemndu nari, sebap pasti kam mate.”’” Dung e lawes Elia.
5 Sanga mulih kalak si isuruh raja e, minter nungkun raja man kalak e, “Engkai maka kena enggo mulih?”
6 Nina kalak e njawapsa, “Lit sekalak dilaki njumpai kami, nina, ‘Mulihlah kena ku raja si nuruh kena, kataken man bana, “Bagenda nina Jahwe, ‘La nge lit Dibata bas Israel maka suruhndu kalak nungkun man Baalsebub dibata Ekron? Emaka, labo kam nusur arah ingan medemndu nari, sebap pasti kam mate.’”’”+
7 Megi si e nungkun raja, “Uga kin ciri-cirina dilaki si njumpai kena e, si ngerana bage man kena?”
8 Emaka nina kalak e, “Ipakena baju si iban arah mbulu binatang nari,+ ikat pinggangna arah kulit.”+ Mis nina raja, “Elia kalak Tisbe kap e.”
9 Suruh raja sekalak peminpin si minpin 50 prajurit radu ras 50 prajuritna ngelegi Elia. Elia sangana kundul i datas puncak gunung. Emaka nangkih peminpin e, nina, “O pelayan Dibata si benar,+ nina raja, ‘Nusurken.’”
10 Tapi nina Elia man peminpin e, “Adi tuhu kin aku pelayan Dibata, nusur kari api langit nari+ janah tutungna kam bage pe 50 prajuritndu.” Emaka nusur api langit nari janah tutungna peminpin e ras 50 prajuritna.
11 Emaka suruh raja ka peminpin si deban ras 50 prajuritna ngelegi Elia. Lawes peminpin e, nina man Elia, “O pelayan Dibata si benar, suruh raja gelah mis kam nusur.”
12 Tapi nina Elia man kalak e, “Adi tuhu kin aku pelayan Dibata si benar, nusur kari api langit nari janah tutungna kam bage pe 50 prajuritndu.” Emaka penusur Dibata api langit nari, tutungna peminpin e ras 50 prajuritna.
13 Emaka suruh raja ka peminpin si peteluken ras 50 prajuritna. Tapi nangkih peminpin si peteluken e, sujud ia i lebe-lebe Elia mindo perkuah atena, nina, “O pelayan Dibata si benar, mindo kel aku, merga min akapndu kesahku bage pe kesah 50 pelayanndu enda.
14 Enggo nusur api langit nari, janah enggo tutungna dua peminpin si enggo leben reh asangken aku bage pe kerina prajuritna. Tapi gundari merga min akapndu kesahku.”
15 Nina malekat Jahwe man Elia, “Nusurlah kam ras ia. Ula kam mbiar man bana.” Emaka nusur Elia ras peminpin e ndahi raja.
16 Nina Elia man raja, “Bagenda nina Jahwe, ‘Enggo suruhndu kalak nungkun man Baalsebub dibata Ekron.+ La nge lit Dibata bas Israel?+ Engkai maka la kam nungkun baNa? Emaka, labo kam nusur arah ingan medemndu nari, sebap pasti kam mate.’”
17 Dungna mate Ahasia bagi si kataken Jahwe man Elia. Perban la lit anakna dilaki, adekna eme Jehoram*+ si nggantiken ia jadi raja bas tahun peduaken pemerentahen Jehoram+ anak Josapat raja Juda.
18 Cerita si debanna kerna sejarah Ahasia,+ bage pe kerna kai si lakokenna, itulis bas buku sejarah raja-raja Israel.
