2 Raja-Raja 10:1-36
10 Lit 70 anak Ahap+ si dilaki i Samaria. Emaka tulis Jehu surat janah kirimna ku Samaria man pejabat-pejabat i Jesreel, peminpin-peminpin,+ bage pe man penjaga-penjaga anak-anak Ahap,* nina,
2 “Anak-anak tuan kena lit ras kena, bage pe gereta-gereta perangna, kuda-kudana, kota-kotana si erbenteng, ras senjata-senjatana. Kenca seh surat e bas kena,
3 pilihlah si mehulina ras si cocokna arah anak-anak tuan kena, banlah ia jadi raja i tahta bapakna. Kenca si e erperanglah guna keluarga tuan kena.”
4 Tapi mbiar kalak e, nina, “Adi dua raja pe la ngasup ngelawan ia,+ apai ka kita?”
5 Emaka, pengawas istana, gubernur kota, peminpin-peminpin, ras penjaga-penjaga ngirim surat man Jehu. Ning kalak e, “Budak-budakndu kap kami, emaka lakoken kami kai pe si katakenndu. Labo ban kami ise pe jadi raja. Lakokenlah kai pe si mehuli akapndu.”
6 Kenca si e tulis Jehu ka surat si peduaken, nina, “Adi erpihak kena man bangku janah nggit kena patuh, baba takal anak-anak tuan kena, pagi bas waktu si bage ka dahilah aku i Jesreel.”
Anak-anak raja si dilaki si buena 70 kalak e lit ras kalak si penting i kota e, eme kalak si mpebelin kalak e.
7 Kenca seh surat e bas kalak e, bunuh kalak e anak-anak raja si dilaki, lit 70 kalak buena,+ janah tamakenna takal kalak e ku piga-piga keranjang, dung e kirimna ku Jehu i Jesreel.
8 Kenca si e, masuk sekalak utusen janah nina man Jehu, “Enggo baba kalak ah ndai takal anak-anak raja.” Nina Jehu, “Tamaken takal-takal e jadi dua tumpuken i gerbang kota ngasa pagi-pagi.”
9 Paginna erpagi-pagi, tedis Jehu i lebe-lebe kerina kalak, janah nina, “Labo kena si salah. Aku nge si ersekongkol ngelawan tuanku janah aku si munuh ia,+ tapi ise si munuh kalak e kerina?
10 Gundari, enggo teh kena maka kerina kata-kata Jahwe eme tiap kata si belasken Jahwe kerna keluarga Ahap pasti terjadi.+ Enggo lakoken Jahwe kai si katakenNa arah pelayanNa Elia.”+
11 Bunuh Jehu ka kerina keluarga Ahap si tading i Jesreel, teman-temanna, imam-imamna,+ ras kerina kalak penting si enggo ngelayani Ahap, ngasa lanai lit si nggeluh.+
12 Kenca si e, lawes Jehu ku Samaria. Bas perdalanen, lit rumah ingan* permakan mangkas mbulu biri-biri.
13 I je, jumpa Jehu ras senina-senina Ahasia+ raja Juda, isungkunna kalak e, “Ise kena?” Nina kalak e, “Kami senina-senina Ahasia, lawes ate kami nungkun berita anak-anak raja si dilaki, bage pe anak-anak mamak raja* si dilaki.”
14 Minter nina Jehu, “Tangkap kalak e nggeluh-nggeluh!” Emaka itangkap kalak e, janah ibunuh i sumur* si lit i deher rumah ingan mangkas mbulu biri-biri e. Kerinana lit 42 kalak janah sada pe la ipediat nggeluh.+
15 Kenca si e lawes Jehu. Bas perdalanen, jumpa ia ras Jonadap+ anak Rehap+ si reh ndahi ia. Kenca kataken Jehu mejuah-juah man bana, nina ka, “Bulat nge ukurndu setia man bangku bagi aku bulat ukurku setia man bandu?”
Nina Jonadap njawapsa, “Ue.”
Nina Jehu, “Adi bage, dudurken tanndu.”
Emaka dudurkenna tanna. Tarik Jehu ia ku bas geretana.
16 Nina Jehu, “Ikutlah ras aku janah nenlah maka la kupediat ise pe terus ngelawan Jahwe.”*+ Emaka ikut ia ras kalak e i bas gereta perang Jehu.
17 Seh ia i Samaria, bunuhna kerina keluarga Ahap si nggeluh denga i Samaria. La lit sekalak pe si pediatna nggeluh,+ bagi si enggo kataken Jahwe arah Elia.+
18 Kenca bage, pepulung Jehu kerina kalak janah nina, “La lakoken Ahap asa bancina guna nembah Baal,+ tapi aku kulakoken kerina asa banciku nembah ia.
19 Emaka pepulunglah kerina nabi Baal,+ kerina si nembah ia, ras kerina imamna.+ Ula lit sada pe si la reh, sebap kupersembahken kari melala korban man Baal. Ise pe si la reh, mate ia.” Tapi situhuna enda taktik Jehu ngenca guna munuh kerina kalak si nembah Baal.
20 Nina Jehu ka, “Umumkenlah perpulungen si istimewa man Baal.” Emaka umumken kalak e.
21 Kenca si e, kirim Jehu pesan man kerina kalak Israel bage pe man kerina kalak si nembah Baal. La lit sada pe si la reh. Masuk kalak e ku ingan ersembah man Baal.+ Dem ingan e arah ujung ku ujung.
22 Nina Jehu man pengawas si ngawasi lemari uis, “Pedaratlah uis man kerina kalak si nembah Baal.” Emaka lakokenna bage.
23 Masuk Jehu ras Jonadap+ anak Rehap ku bas ingan ersembah man Baal. Nina Jehu man kerina kalak si nembah Baal, “Tuhu-tuhu periksalah ingan enda, janah pastiken kalak si nembah Baal ngenca i jenda, ula lit i jenda kalak si nembah Jahwe.”
24 Mulai persembahken kalak e korban ras persembahen tutungen. Sope si e, enggo tugasken Jehu 80 dilaki i darat janah enggo katakenna man kalak e, “Adi lit sekalak saja si pediat kena lepas, kena si mate nggantiken ia.”
25 Kenca dung persembahen tutungen ipersembahken, nina Jehu man penjaga-penjaga ras ajudan-ajudan, “Masuklah janah bunuh kalak e kerina! Ula pediat sekalak pe lepas.”+ Emaka kalak e ibunuh alu pedang janah benterkenna kalak e ku darat. Penjaga-penjaga ras ajudan-ajudan e terus masuk seh ku ingan si badia arah bas si lit i bas* ingan ersembah man Baal.
26 Kenca si e, kerina tugu si badia+ pedarati kalak e arah ingan ersembah man Baal, jenari itutung kerina.+
27 Runtuhken kalak e ka tugu si badia+ Baal bage pe ingan ersembah man Baal,+ janah jadikenna ingan e jadi WC umum seh ngasa gundari.
28 Bage me Jehu nasapken penembahen man Baal bas Israel.
29 Tapi, la tadingken Jehu dosa-dosa Jerobeam anak Nebat si erban kalak Israel pe enggo ngelakoken dosa. Pediat Jehu patung-patung anak lembu emas tetap lit i Betel ras i Dan.+
30 Emaka nina Jahwe man Jehu, “Enggo mehuli perbahanenndu janah lakokenndu kai si benar menurutKu. Kai si ateKu Kulakoken man keluarga Ahap,+ enggo lakokenndu. Emaka kundul keturunenndu bas tahta Israel ngayak keturunen si peempatken.”+
31 Tapi la bulat ukur Jehu ngikutken Undang-Undang Jahwe Dibata Israel.+ Ikutkenna dosa Jerobeam si erban kalak Israel ngelakoken dosa.+
32 Bas paksa si e, mulai pediat Jahwe daerah-daerah Israel irebut sada per sada. Terus serang Hasael kerina daerah Israel,+
33 mulai Lau Jordan sebelah timur, eme kerina daerah Gileat si iingani kalak Gat, kalak Ruben, kalak Manase,+ bage pe mulai Aroer nari si lit i pinggir Lembah* Arnon seh ku Gileat ras Basan.+
34 Cerita si debanna kerna sejarah Jehu, kerna kerina si lakokenna, ras kerina kehebatenna, itulis bas buku sejarah raja-raja Israel.
35 Kenca si e, mate Jehu janah ikuburken i Samaria. Anakna si nggantiken ia jadi raja eme Jehoahas.+
36 Lit 28 tahun dekahna Jehu merentah Israel i Samaria.
Cataten i teruh
^ As. “man penjaga-penjaga Ahap.”
^ Banci jadi enda ingan biri-biri iiket guna ipangkas.
^ Mamak raja si imaksud eme Ratu Isebel, mamak Raja Jehoram.
^ Maksudna, lubang guna nimpan lau.
^ Ntah “nenlah uga semangatna aku man Jahwe.”
^ As. “ku kota,” banci saja bangunen si bagi tembok.
