2 Raja-Raja 12:1-21
12 Joas+ jadi raja bas tahun pepituken pemerentahen Jehu.+ Lit 40 tahun dekahna ia merentah i Jerusalem. Gelar mamakna Sibiah arah Berseba nari.+
2 Terus lakoken Joas kai si benar menurut Jahwe sedekah Imam Joyada ngajari ia.
3 Tapi ingan-ingan ersembah*+ la ihancurken, janah lalap denga persembahken rakyat korban i je bage pe nutung korban gelah ku datas asapna.
4 Nina Joas man imam-imam, “Buat kerina sen si ibaba ku rumah Jahwe jadi persembahen si badia,+ eme sen si arus igalari tiap kalak,+ sen arah kalak si enggo erjanji, bage pe kerina sen si ibaba ku rumah Jahwe alu ukur meriah.+
5 Imam-imam me si ngaloken sen arah kalak si mereken sumbangen man kalak e, janah pakena sen e mpesikap tiap bagin si ceda* bas rumah e.”+
6 Amin pe enggo seh 23 tahun Raja Joas merentah, lenga lalap ipesikap imam-imam bagin si ceda bas rumah e.+
7 Emaka lebuh Raja Joas me Imam Joyada+ bage pe imam-imam si debanna, janah nina man kalak e, “Engkai maka lenga pesikap kena bagin si ceda bas rumah e? Lanai padah aloken sen arah kalak si mereken sumbangen adi la kin ipake guna mpesikap rumah e.”+
8 Setuju imam-imam gelah lanai ngaloken sen arah rakyat, janah lanai kalak e si ertanggung jawap guna mpesikap rumah e.
9 Ibuat Imam Joyada sada kotak+ janah banna lubang bas tutupna. Tamakenna kotak e i samping ingan nutung* persembahen si lit i sebelah kanan kalak si masuk ku rumah Jahwe. I je imam-imam si njaga pintu namaken kerina sen si ibaba ku rumah Jahwe.+
10 Tiap idah kalak e enggo melala kel sen bas kotak e, sekertaris raja ras imam si mbelin me si mpepulung* ras ngkira sen e, eme sen si enggo ibaba ku rumah Jahwe.+
11 Kenca ikira, bereken kalak e sen e man kalak si enggo ipilih guna ngawasi pendahin bas rumah Jahwe. Kenca si e, sen e ipake kalak e guna nggalari tukang kayu ras tukang bangunen si erdahin bas rumah Jahwe,+
12 bage pe tukang batu ras tukang motong batu. Tukur kalak e ka kayu-kayu ras batu-batu si enggo ipotong guna mpesikap kai si ceda bas rumah Jahwe. Janah sen e ipake guna kerina pengeluaren si deban i bas mpesikap rumah e.
13 Tapi sen si ibaba ku rumah Jahwe la ipake erban baskom arah pirak, alat guna mateken sumbu lampu, mangkok, trompet,+ ntah barang kai pe si iban arah emas ntah pe pirak guna rumah Jahwe.+
14 Man pengawas-pengawas ngenca sen e ibereken guna mpesikap rumah Jahwe.
15 Kenca si e pengawas-pengawas e si mereken sen e man sierdahin. Cara pengawas e nggunaken sen e la perlu ipersoalken, sebap kalak e terteki.+
16 Tapi, sen arah persembahen kesalahen+ bage pe sen arah persembahen dosa la ibaba ku rumah Jahwe. Sebap sen e man imam-imam.+
17 Paksa si e, Hasael+ raja Siria nyerang kota Gat+ janah irebutna. Kenca si e, serangna ka atena Jerusalem.+
18 Emaka ibuat Joas raja Juda kerina persembahen si badia si enggo ipebadiaken nini bulangna, eme raja-raja Juda si gelarna Josapat, Jehoram, ras Ahasia. Buatna ka persembahenna si badia, bage pe emas si lit bas ingan nimpan erta bas rumah Jahwe ras bas istana. Kirimna man Hasael raja Siria.+ Emaka mundur Hasael arah Jerusalem nari.
19 Cerita si debanna kerna sejarah Joas ras kerina si lakokenna, itulis bas buku sejarah raja-raja Juda.
20 Tapi ersekongkol pelayan-pelayan Joas+ janah bunuhna ia bas rumah Bukit,*+ si lit bas dalan ku Silla.
21 Pelayan-pelayanna si nyerang ras munuh ia eme Josakar anak Simeat ras Josabat anak Somer.+ Ikuburken kalak e ia ras nini bulangna i Kota Daud. Anakna si nggantiken ia jadi raja eme Amasia.+
Cataten i teruh
^ As. “ingan-ingan si meganjang.”
^ Ntah “si retak.”
^ Ntah “si namaken ku bas kantong-kantong.”
^ Ntah “bas Bet-milo.”
