2 Raja-Raja 13:1-25
13 Bas tahun si pe-23-ken pemerentahen Joas+ anak Ahasia+ raja Juda, Jehoahas anak Jehu+ jadi raja Israel bas Samaria, janah lit 17 tahun dekahna ia merentah.
2 Lalap lakokenna kai si jahat menurut Jahwe, janah lalap lakokenna dosa si lakoken Jerobeam anak Nebat si erban kalak Israel erdosa.+ La tadingkenna dosa-dosa e.
3 Emaka merawa kel Jahwe+ man kalak Israel,+ dungna pediatNa kalak e terus italuken Hasael+ raja Siria bage pe Benhadat+ anak Hasael.
4 Emaka pindo Jehoahas perkuah ate Jahwe, janah begiken Jahwe ia, sebap enggo idahNa uga kalak Siria nyiksa kalak Israel.+
5 Emaka suruh Jahwe sekalak penyelamat+ guna mbebasken kalak Israel arah kalak Siria nari. Dungna kalak Israel banci tading i rumahna bagi si gelgel.*
6 Tapi, lalap lakoken kalak e dosa keluarga Jerobeam si erban kalak Israel ngelakoken dosa.+ Lalap lakoken kalak e dosa e, janah tiang si badia*+ tetap lit bas Samaria.
7 Pasuken Jehoahas si tading denga eme 50 prajurit si erkuda, 10 gereta, ras 10.000 prajurit si erdalan, perban si debanna enggo ihancurken raja Siria,+ perjakina kalak e bali bagi abu bas ingan ngerik.*+
8 Cerita si debanna kerna sejarah Jehoahas bage pe kerna kerina si lakokenna ras kehebatenna, itulis bas buku sejarah raja-raja Israel.
9 Dungna mate Jehoahas janah ikuburken i Samaria.+ Anakna si nggantiken ia jadi raja eme Joas.
10 Bas tahun si pe-37-ken pemerentahen Joas+ raja Juda, Joas anak Jehoahas jadi raja Israel bas Samaria, janah lit 16 tahun dekahna ia merentah.
11 Lalap lakokenna kai si jahat menurut Jahwe, la itadingkenna dosa-dosa Jerobeam anak Nebat si erban kalak Israel ngelakoken dosa.+ Lalap lakokenna dosa-dosa e.
12 Cerita si debanna kerna sejarah Joas, kerina si lakokenna ras kehebatenna, bage pe kerna uga ia erperang ngelawan Amasia raja Juda,+ itulis bas buku sejarah raja-raja Israel.
13 Dungna mate Joas janah ikuburken i Samaria ras raja-raja Israel.+ Jerobeam*+ si nggantiken ia bas tahtana.
14 Sakit Elisa+ janah penakitna e erban ia mate. Sanga ia sakit, reh Joas raja Israel ndahi ia, janahna tangis nina, “Bapakku, o bapakku! Gereta perang Israel ras si nangkih kudana!”+
15 Emaka nina Elisa man bana, “Buat panah ras piga-piga anak panah.” Buatna panah ras piga-piga anak panah.
16 Kenca si e nina man raja Israel, “Jemak panah e.” Emaka jemakna panah e, kenca e ijemak Elisa tan raja.
17 Nina Elisa, “Buka jendela si arah timur.” Bukana jendela e. Dung e nina Elisa, “Panahken!” Emaka panahkenna. Nina Elisa, “Anak panah kemenangen* arah Jahwe, anak panah guna naluken kalak Siria! Pasti talukenndu kalak Siria i Apek+ seh ngasa keri.”
18 Nina Elisa ka, “Buat piga-piga anak panah,” emaka buatna. Kenca si e nina man raja Israel, “Pekpekken ku taneh.” Emaka pekpekkenna ku taneh telu kali dung e ingadikenna.
19 Ngidah si e merawa pelayan Dibata si benar e man bana janah nina, “Arusna lima kali ntah pe enem kali pekpekkenndu ku taneh! Alu bage banci talukenndu kalak Siria seh asa keri, tapi gundari ngayak telu kali ngenca talukenndu kalak Siria.”+
20 Dung e mate Elisa janah ikuburken. Kenca mate Elisa, tiap awal tahun* reh gerombolen perampok+ arah Moap nari ku negri e.
21 Bas sada wari, sanga lit piga-piga kalak nguburken mayat sekalak dilaki, idah kalak e gerombolen perampok. Emaka minter benterken kalak e mayat e ku kuburen Elisa, janah kiam kalak e. Sanga kena mayat e ku tulan-tulan Elisa, nggeluh dilaki e mulihi+ janah tedis ia.
22 Sedekah pemerentahen Jehoahas, kalak Israel terus isiksa Hasael+ raja Siria.+
23 Perban janji Jahwe man Abraham,+ Isak,+ ras Jakup,+ emaka lalap perdiatekenNa kalak e janah terus cidahkenNa kiniulinNa ras perkuah ateNa.+ La Ia nggit engkernepken kalak e janah labo Ia nggit mpelawessa arah lebe-lebeNa nari.
24 Sanga mate Hasael raja Siria, anakna eme Benhadat si nggantiken ia jadi raja.
25 Joas anak Jehoahas ngerebut mulihi kota-kota Israel arah Benhadat anak Hasael si mbarenda irebut Hasael sanga erperang ia ras Jehoahas, bapak Joas. Lit telu kali Joas naluken Benhadat,+ janah rebutna mulihi kota-kota Israel.
