2 Raja-Raja 14:1-29
14 Bas tahun peduaken pemerentahen Joas+ anak Jehoahas raja Israel, Amasia jadi raja, ia anak Joas raja Juda.
2 Amasia jadi raja sanga umurna 25 tahun, ia merentah sedekah 29 tahun i Jerusalem. Gelar mamakna Jehoadin arah Jerusalem nari.+
3 Lalap lakokenna kai si benar menurut Jahwe, tapi ia la bagi Daud+ nini bulangna. Lakokenna kerina bali bagi si ilakoken Joas bapakna.+
4 Ingan-ingan ersembah* la ihancurken,+ janah lalap denga ipersembahken rakyat korban i je bage pe nutung korban gelah ku datas asapna.+
5 Kenca enggo paguh kuasana bas kerajan, mis bunuhna pelayan-pelayanna si mbarenda munuh raja, raja e bapakna.+
6 Tapi la bunuhna anak-anak pembunuh e, sebap ikutkenna Undang-Undang si itulisken bas buku Musa, i je perentahken Jahwe, “Bapak la banci mate perban dosa anakna, janah anak la banci mate perban dosa bapakna. Tiap kalak arus mate perban dosana.”+
7 Lit 10.000 kalak Edom si bunuhna+ i Lembah Sira,+ janah rebutna kota Sela bas peperangen e,+ gelar kota e iganti jadi Jokteel seh asa gundari.
8 Kenca si e, suruh Amasia kalak njumpai Joas anak Jehoahas kempu Jehu raja Israel guna mpeseh pesan enda, “Mari! Jumpai aku gelah erperang kita.”+
9 Joas raja Israel ngirim pesan man Amasia raja Juda, nina, “Peren duri i Libanon ngirim pesan man kayu aras i Libanon, ‘Bereken anakndu si diberu gelah jadi diberu anakku.’ Tapi, lewat binatang liar i Libanon, perjakina peren duri e.
10 Tuhu, enggo talukenndu Edom.+ Dungna sombong kam. Ermeriah ukurlah kam perban kemulianndu e, tapi tetaplah kam bas istanandu. Man kadendu kin ndarami masalah si erban kam ras kalak Juda jadi susah?”
11 Tapi la diate Amasia pesan e.+
Emaka maju Joas raja Israel guna erperang ngelawan Amasia raja Juda ku Bet-Semes+ si lit i Juda.+
12 Talu pasuken Juda ban pasuken Israel, emaka tiap prajurit kiamen ku rumahna.*
13 I Bet-Semes, Joas raja Israel nangkap Amasia raja Juda. Amasia e anak Joas kempu Ahasia. Kenca si e, seh kalak e i Jerusalem janah hancurkenna tembok Jerusalem, mulai Gerbang Eperaim+ nari seh ku Gerbang Suki,+ gedangna lit kira-kira 178 meter.*
14 Buatna kerina emas, pirak, barang-barang si merga bas rumah Jahwe, bage pe erta-erta si lit bas istana raja. Lit ka piga-piga kalak si itaban. Kenca si e mulih ia ku Samaria.
15 Cerita si debanna kerna sejarah Joas, kai si ilakokenna, kehebatenna, ras uga ia erperang ngelawan Amasia raja Juda, itulis bas buku sejarah raja-raja Israel.
16 Dungna mate Joas janah ikuburken ia i Samaria+ ras raja-raja Israel. Anakna eme Jerobeam*+ si jadi raja nggantiken ia.
17 Kenca mate Joas+ anak Jehoahas raja Israel,+ Amasia+ anak Joas raja Juda nggeluh 15 tahun nari.
18 Cerita si debanna kerna sejarah Amasia itulis bas buku sejarah raja-raja Juda.
19 Bas pudi wari, lit kalak ersekongkol ngelawan ia+ i Jerusalem, emaka kiam ia ku Lakis. Tapi lit kalak si isuruh guna ngayaki ia ku Lakis, janah ibunuh ia i jah.
20 Emaka baba kalak e mayatna mulih tare kuda, janah ikuburken i Jerusalem ras nini bulangna i Kota Daud.+
21 Kenca si e, kerina rakyat Juda ngelantik Asaria*+ jadi raja, guna nggantiken Amasia bapakna.+ Sanga si e, umurna 16 tahun.+
22 Kenca mate Raja Amasia, bangun Asaria mulihi Elat, janah banna Elat+ mulihken jadi jang Juda.+
23 Bas tahun pe-15-ken pemerentahen Amasia anak Joas raja Juda, Jerobeam+ anak Joas raja Israel jadi raja i Samaria, janah lit 41 tahun dekahna ia merentah.
24 Lalap lakokenna kai si jahat menurut Jahwe. La tadingkenna kerina dosa Jerobeam anak Nebat si erban kalak Israel pe ikut ngelakoken dosa.+
25 Ulihkenna daerah perbatasen Israel, mulai Hamat* nari+ seh ku Laut Araba,*+ bagi si ikataken Jahwe Dibata Israel arah pelayanNa, eme Juna+ anak Amittai, nabi arah Gat Heper.+
26 Sebap enggo idah Jahwe uga suina akap kalak Israel.+ La lit sekalak pe si tading bas Israel guna nampati kalak e, kalak si mesera ras si lemah pe lang.
27 Tapi enggo erjanji Jahwe maka labo isasapkenNa gelar Israel arah doni nari.+ Emaka iselamatkenNa kalak e arah tan Jerobeam anak Joas.+
28 Cerita si debanna kerna sejarah Jerobeam, kerina si lakokenna ras kehebatenna, uga ia erperang bage pe uga ia ngulihken Damaskus+ ras Hamat+ ku Juda i Israel, itulis bas buku sejarah raja-raja Israel.
29 Dungna mate Jerobeam janah ikuburken ras raja-raja Israel. Anakna si nggantiken ia jadi raja eme Sakaria.+
Cataten i teruh
^ As. “Ingan-ingan si meganjang.”
^ As. “ku kemahna.”
^ Maksudna, Jerobeam II.
^ Ertina “Jahwe Enggo Nampati.” Asaria e pe igelari ka Ussia bas 2Raj 15:13; 2Kro 26:1-23; Jes 6:1; ras Sak 14:5.
^ Maksudna, Laut Mati.
^ Ntah “arah dalan masuk ku Hamat.”
