2 Raja-Raja 15:1-38
15 Bas tahun si pe-27-ken pemerentahen Jerobeam* raja Israel, Asaria*+ jadi raja, ia anak Amasia+ raja Juda.+
2 Ia jadi raja sanga umurna 16 tahun, janah 52 tahun dekahna ia merentah i Jerusalem. Gelar mamakna Jekolia arah Jerusalem nari.
3 Lalap lakokenna kai si benar menurut Jahwe, bagi Amasia bapakna.+
4 Tapi ingan-ingan ersembah* la ihancurken,+ janah lalap denga ipersembahken rakyat korban i je bage pe nutung korban gelah ku datas asapna.+
5 Ban Jahwe me Raja Asaria sakit kusta+ ngayak ia mate. Ia tading bas rumah si terpisah,+ emaka anakna eme Jotam+ si ertanggung jawap man istana janah jadi hakim man rakyat negri e.+
6 Cerita si debanna kerna sejarah Asaria,+ bage pe kerina si lakokenna itulis bas buku sejarah raja-raja Juda.
7 Kenca si e, mate Asaria janah ikuburken ras nini bulangna+ i Kota Daud. Anakna si nggantiken ia jadi raja eme Jotam.
8 Bas tahun si pe-38-ken pemerentahen Asaria+ raja Juda, Sakaria+ anak Jerobeam jadi raja Israel i Samaria, lit enem bulan dekahna ia merentah.
9 Lakokenna kai si jahat menurut Jahwe, bagi si ilakoken nini bulangna. La tadingkenna dosa-dosa Jerobeam anak Nebat si erban kalak Israel pe ngelakoken dosa.+
10 Kenca si e, ersekongkol Salum anak Jabes ngelawan Sakaria janah ibunuhna ia+ i Ibleam.+ Jenari Salum si jadi raja nggantikenca.
11 Cerita si debanna kerna sejarah Sakaria, itulis bas buku sejarah raja-raja Israel.
12 Terjadi me si kataken Jahwe man Jehu, nina, “Kundul pagi keturunenndu bas tahta Israel+ ngayak keturunen si peempatken.”+
13 Salum anak Jabes jadi raja bas tahun si pe-39-ken pemerentahen Ussia+ raja Juda, janah lit sebulan dekahna ia merentah i Samaria.
14 Kenca si e, reh Menahem anak Gadi i Tirsa+ nari ku Samaria, janah bunuhna Salum+ anak Jabes i je. Jenari Menahem si jadi raja nggantikenca.
15 Cerita si debanna kerna sejarah Salum, bage pe kerna uga ia ersekongkol, itulis bas buku sejarah raja-raja Israel.
16 Sanga reh Menahem arah Tirsa nari, serangna kota Tipsah. Bunuhna kerina penduduk si tading i je bage pe si lit i daerah sekelilingna. Rigatkenna ka beltek kerina diberu si sangana hamil. Si e lakokenna perban la ibuka kalak e gerbang kota man bana.
17 Bas tahun si pe-39-ken pemerentahen Asaria raja Juda, Menahem anak Gadi jadi raja Israel, janah lit sepuluh tahun dekahna ia merentah i Samaria.
18 Lalap lakokenna kai si jahat menurut Jahwe. Segedang geluhna, la tadingkenna kerina dosa Jerobeam anak Nebat si erban kalak Israel pe ngelakoken dosa.+
19 Sanga reh Pul+ raja Assur nyerang negri e, bereken Menahem man Pul kira-kira 34 ton* pirak, gelah sampatina ia mpegegehi kekuasanna i bas kerajan e.+
20 Pirak e idat Menahem alu maksa kerina kalak bayak ras kalak si terpandang bas Israel+ guna mereken 570 gram* pirak, jenari bereken Menahem man raja Assur. Kenca si e, lawes raja Assur arah Israel janah mulih ku negrina.
21 Cerita si debanna kerna sejarah Menahem+ ras kerina si lakokenna itulis bas buku sejarah raja-raja Israel.
22 Dungna mate Menahem. Anakna si jadi raja nggantiken ia eme Pekahia.
23 Bas tahun si pe-50-ken pemerentahen Asaria raja Juda, Pekahia anak Menahem jadi raja Israel i Samaria, janah lit dua tahun dekahna ia merentah.
24 Lalap lakokenna kai si jahat menurut Jahwe. La tadingkenna dosa-dosa Jerobeam anak Nebat si erban kalak Israel pe ngelakoken dosa.+
25 Kenca si e, ajudanna eme Pekah+ anak Remalia ersekongkol ngelawan ia janah bunuhna ia bas menara si erbenteng si lit bas istana raja i Samaria. Si e lakokenna radu ras 50 dilaki arah Gileat nari, ikut ras Argop bage pe Arieh. Jenari, Pekah me si jadi raja nggantiken Pekahia.
26 Cerita si debanna kerna sejarah Pekahia ras kerina si lakokenna itulis bas buku sejarah raja-raja Israel.
27 Bas tahun si pe-52-ken pemerentahen Asaria raja Juda, Pekah+ anak Remalia jadi raja Israel i Samaria, janah lit 20 tahun dekahna ia merentah.
28 Lalap lakokenna kai si jahat menurut Jahwe. La tadingkenna dosa-dosa Jerobeam anak Nebat si erban kalak Israel pe ngelakoken dosa.+
29 Sanga Pekah raja Israel merentah, Tiglat Pileser+ raja Assur nyerang janah ngerebut kota Ijon, Abel Bet Maaka,+ Janoah, Kedes,+ Hasor, Gileat,+ ras Galilea si lit bas kerina daerah Naptali.+ Babana ka penduduk si lit i je ku Assur jadi tabanen.+
30 Kenca si e, ersekongkol Hoshea+ anak Ela ngelawan Pekah anak Remalia janah bunuhna ia. Hoshea si jadi raja nggantikenca bas tahun si pe-20-ken pemerentahen Jotam+ anak Ussia.
31 Cerita si debanna kerna sejarah Pekah ras kerina si lakokenna, itulis bas buku sejarah raja-raja Israel.
32 Bas tahun si peduaken pemerentahen Pekah anak Remalia raja Israel, Jotam+ jadi raja, ia anak Ussia+ raja Juda.
33 Ia jadi raja sanga umurna 25 tahun, janah 16 tahun dekahna ia merentah i Jerusalem. Gelar mamakna Jerusa anak Sadok.+
34 Lalap lakokenna kai si benar menurut Jahwe, bagi si ilakoken bapakna Ussia.+
35 Tapi ingan-ingan ersembah la ihancurken, janah lalap denga ipersembahken rakyat korban i je bage pe nutung korban gelah ku datas asapna.+ Ia me si mbangun Gerbang Datas i rumah Jahwe.+
36 Cerita si debanna kerna sejarah Jotam ras kai si lakokenna itulis bas buku sejarah raja-raja Juda.
37 Bas paksa si e, mulai me Resin raja Siria ras Pekah+ anak Remalia isuruh Jahwe nyerang Juda.+
38 Dungna mate Jotam janah ikuburken ia bas Kota Daud nini bulangna. Anakna si nggantiken ia jadi raja eme Ahas.
Cataten i teruh
^ Ertina “Jahwe Enggo Nampati.” Asaria e pe igelari ka Ussia bas 2Raj 15:13; 2Kro 26:1-23; Jes 6:1; ras Sak 14:5.
^ Maksudna, Jerobeam II.
^ As. “ingan-ingan si meganjang.”
