2 Raja-Raja 16:1-20
16 Bas tahun si pe-17-ken pemerentahen Pekah anak Remalia, Ahas+ jadi raja, ia anak Jotam raja Juda.
2 Ahas jadi raja sanga umurna 20 tahun janah 16 tahun dekahna ia merentah i Jerusalem. La lakokenna kai si benar menurut Jahwe Dibatana. La ia bagi Daud nini bulangna.+
3 Tapi ikutkenna perbahanen raja-raja Israel.+ Anakna si dilaki pe tutungna bas api,+ bagi kebiasan bangsa-bangsa+ si enggo pelawes Jahwe arah lebe-lebe kalak Israel, eme kebiasan si ciga ate Dibata.
4 Lalap banna korban janah tutungna korban gelah ku datas asapna arah persembahen e bas ingan-ingan si meganjang,+ bas bukit-bukit, bage pe bas tiap batang kayu si melala bulungna.+
5 Paksa si e, Resin raja Siria ras Pekah anak Remalia raja Israel reh guna erperang ngelawan Jerusalem.+ Kepung kalak e Ahas, tapi la kalak e berhasil ngerebut kota e.
6 Sanga si e Resin raja Siria ngulihken kota Elat+ man kalak Edom, jenari pelawesna kalak Jahudi* arah Elat nari. Kenca si e, reh kalak Edom ku Elat janah tading kalak e i je seh ngasa gundari.
7 Emaka suruh Ahas kalak njumpai Tiglat Pileser+ raja Assur guna ngataken, “Budakndu kap aku janah anakndu kap aku. Rehlah kam janah selamatken aku arah tan raja Siria ras raja Israel si sangana nyerang aku.”
8 Emaka buat Ahas pirak ras emas si lit bas rumah Jahwe bage pe si lit bas ingan nimpan erta bas istana raja, janah kirimna e man raja Assur jadi sogoken.+
9 Begiken raja Assur pemindonna, emaka lawes raja Assur ku Damaskus janah rebutna kota e. Babana penduduk kota e ku Kir+ jadi tabanen, janah bunuhna ka Resin.+
10 Kenca si e, jumpai Raja Ahas me Tiglat Pileser raja Assur bas Damaskus. Sanga idahna ingan nutung* persembahen si lit i Damaskus, ikirim Raja Ahas man Imam Uria rancangen ingan nutung persembahen e, eme gambarna ras uga cara erbanca.+
11 Ibangun Imam Uria+ ingan nutung persembahen+ e bali bagi petunjuk si ikirim Raja Ahas arah Damaskus nari. Lenga pe Raja Ahas mulih arah Damaskus nari, enggo dung ibangun Imam Uria ingan nutung persembahen e.
12 Kenca mulih Raja Ahas arah Damaskus nari janah idahna ingan nutung persembahen e, ideherina ingan nutung persembahen e janah banna persembahen i je.+
13 Lalap tutungna persembahen tutungen ras persembahen pangan* i datas ingan nutung persembahen e. Tuangkenna ka persembahen inemen janah percikkenna dareh korban persadan i je.
14 Jenari, pindahken Raja Ahas ingan nutung persembahen+ si iban arah tembaga nari si lit i lebe-lebe Jahwe ku sebelah utara ingan nutung persembahen Raja Ahas ndai. Tangtangna, ingan nutung persembahen si iban arah tembaga e lit i antara rumah Jahwe ras ingan nutung persembahen Raja Ahas.
15 Bereken Raja Ahas perentah man Imam Uria,+ “Bas ingan nutung persembahen si galang enda,+ tutunglah persembahen tutungen si ipersembahken bas erpagi-pagi bage pe persembahen pangan si ipersembahken sanga karaben.+ Tutung ka persembahen tutungen ras persembahen pangan si ibereken raja. Persembahen tutungen, persembahen pangan, ras persembahen inemen si ibereken rakyat pe tutung ka. Percikken ka ku datasna kerina dareh arah persembahen tutungen bage pe arah korban si debanna. Kerna ingan nutung persembahen si iban arah tembaga e, pagi kuukuri.”
16 Lakoken Imam Uria kerina si enggo iperentahken Raja Ahas.+
17 Selain si e, potong-potong Raja Ahas lempengen si lit bas tiap bagin gereta-gereta+ janah aguina tiap baskom si lit i datasna.+ Penusurna ka Laut Tembaga si lit i datas patung-patung lembu jantan si iban arah tembaga nari,+ jenari itamana i lante batu.+
18 Pindahkenna ka ruangen tertutup si lit bas rumah e, eme ruangen si biasa ipake bas wari Sabat. Tutupna ka dalan masuk si biasa ilewati raja ku rumah Jahwe. Lakokenna bage perban mbiar ia man raja Assur.
19 Cerita si debanna kerna sejarah Ahas ras kai si lakokenna, itulis bas buku sejarah raja-raja Juda.+
20 Dungna mate Ahas janah ikuburken ras nini bulangna i Kota Daud. Jenari anakna si nggantiken ia jadi raja eme Hiskia.*+
