2 Raja-Raja 17:1-41
17 Bas tahun si pe-12-ken pemerentahen Ahas raja Juda, Hoshea+ anak Ela jadi raja Israel i Samaria. Lit siwah tahun dekahna ia merentah.
2 Lalap lakokenna kai si jahat menurut Jahwe tapi keleken perbahanen raja-raja Israel si leben merentah asangken ia.
3 Reh Salmaneser raja Assur nyerang Hoshea,+ emaka jadi pelayanna ia janah mulai igalari Hoshea upeti* man bana.+
4 Tapi begi raja Assur maka Hoshea ersekongkol, sebap kirimna utusen man So raja Mesir,+ janah lanai galarina upeti man raja Assur bagi si banna tiap tahun, emaka itahan raja Assur ia bas penjara.
5 Kenca si e serang raja Assur kerina negri e. Lawes ia ku Samaria janah kepungna kota e telu tahun dekahna.
6 Bas tahun si pesiwahken pemerentahen Hoshea, rebut raja Assur me Samaria.+ Babana penduduk Israel jadi tabanen+ ku Assur. Suruhna kalak e tading i Halah ras i Habor si lit i deher Lau Gosan+ bage pe i kota-kota kalak Media.+
7 Enda terjadi perban enggo erdosa kalak Israel man Jahwe Dibata kalak e, si enggo mbebasken kalak e arah kuasa raja Mesir* janah enggo babaNa kalak e ndarat arah Mesir nari.+ Sembah kalak e* dibata-dibata si deban,+
8 ikutken kalak e kebiasan bangsa-bangsa si enggo ipelawes Jahwe arah lebe-lebe kalak Israel, janah ikutken kalak e kebiasan-kebiasan si iban raja-raja Israel.
9 Lakoken kalak Israel kai si la benar menurut Jahwe Dibata kalak e. Lalap bangun kalak e ingan-ingan ersembah* bas kerina kota kalak e,+ mulai menara penjaga nari seh ku kota si erbenteng.*
10 Lalap pajekken kalak e tugu-tugu si badia bage pe tiang-tiang si badia*+ bas kerina ingan-ingan si meganjang ras i teruh batang kayu si melala bulungna.+
11 Bas ingan-ingan ersembah e, itutung kalak e korban gelah ku datas asapna bagi si lakoken bangsa-bangsa si enggo ipelawes Jahwe arah lebe-lebe kalak e.+ Lalap lakoken kalak e kai si jahat si erban Jahwe merawa.
12 Lalap sembah kalak e berhala-berhala si ciga ate* Dibata,+ padahal enggo kataken Jahwe, “Ula lakoken kena!”+
13 Lalap persingeti Jahwe kalak Israel ras kalak Juda arah kerina nabi-nabiNa bage pe arah tiap kalak si lit pengenehenenna,*+ nina, “Tadingken dalan-dalan kena si jahat!+ Dalanken perentahKu bage pe peraturenKu si lit bas kerina undang-undang si enggo Kuperentahken man nini bulang kena ras si enggo Kubereken man kena arah nabi-nabi.”
14 Tapi la begiken kalak e, janah lalap kalak e keras kepala* bagi nini bulang kalak e si la erkiniteken man Jahwe Dibata kalak e.+
15 Lalap tulak kalak e peraturenNa bage pe perjanjin+ si enggo banNa ras nini bulang kalak e. Itulak kalak e ka persinget-persinget si enggo iberekenNa guna mpersingeti kalak e.+ Lalap ikutken kalak e berhala-berhala si la erguna+ janah kalak e pe dungna la erguna.+ Iusih kalak e bangsa-bangsa si lit i sekeliling kalak e si enggo perentahken Jahwe gelah ula iusih kalak e.+
16 Lalap langgar kalak e kerina perentah Jahwe Dibata kalak e, janah iban kalak e dua patung anak lembu si iban arah logam nari+ bage pe tiang si badia,*+ janah sujud kalak e man kai pe si lit bas langit+ ras ilayani kalak e Baal.+
17 Persembahken kalak e ka anakna si dilaki ras si diberu jadi korban tutungen.+ Lakokenna ilmu sihir bage pe ilmu ramal,+ janah terus ilakokenna* kai si jahat menurut Jahwe si erban Ia merawa.
18 Emaka merawa kel Jahwe man Israel janah pelawesNa kalak e arah lebe-lebeNa nari.+ Sada suku nari ngenca pediatNa tading, eme suku Juda.
19 Tapi Juda pe la ngikutken perentah Jahwe Dibata kalak e.+ Ikutken kalak e kebiasan-kebiasan si ikutken kalak Israel.+
20 Itulak Jahwe kerina keturunen Israel, hukumNa kalak e, janah serahkenNa ku tan musuh kalak e ngasa lanai kalak e lit i lebe-lebeNa.
21 RigatkenNa kalak Israel arah keluarga Daud nari janah angkat kalak e Jerobeam anak Nebat jadi raja.+ Tapi ban Jerobeam kalak Israel lanai ngikutken Jahwe janah banna kalak e ngelakoken dosa si mbelin.
22 Lalap ikutken kalak e kerina dosa-dosa si ilakoken Jerobeam.+ Kerina e la itadingken kalak e
23 seh ngasa kalak Israel imasapken Jahwe arah lebe-lebeNa, bagi si enggo katakenNa man kerina pelayanNa eme nabi-nabi.+ Emaka kalak Israel itaban arah negrina ku Assur.+ I je kalak e tading ngasa gundari.
24 Kenca si e ibaba raja Assur kalak si lit i Babilon, Kuta, Iwa, Hamat, ras Separwaim+ ku Samaria, gelah tading kalak e i je nggantiken kalak Israel. Buat kalak e Samaria jadi jang kalak e janah tading kalak e i je.
25 Sanga tangtangna kalak e tading i je, la kalak e mbiar* man Jahwe. Emaka suruh Jahwe singa-singa ku tengah-tengah kalak e+ janah bunuh singa e piga-piga arah kalak e.
26 Ilaporken man raja Assur, “Bangsa-bangsa si tabanndu ras si suruhndu tading bas kota-kota Samaria la tehna uga carana nembah* Dibata negri e. Emaka lalap ban Dibata e rehen singa-singa janah bunuhna kalak e, perban sada pe kalak e la meteh uga cara nembah Dibata negri e.”
27 Emaka bereken raja Assur perentah, “Suruhlah mulih sekalak imam si enggo itaban kena arah negri e. Arus ia tading i negri e janah ajarkenna uga cara nembah Dibata negri e.”
28 Emaka mulih sekalak imam si enggo itaban arah Samaria nari janah tading ia i Betel.+ Mulai ajarkenna uga carana nembah* Jahwe.+
29 Tapi, tiap bangsa erban dibatana.* Tamakenna e bas ingan ersembah eme bas ingan-ingan si meganjang si enggo iban kalak Samaria. Ilakoken tiap bangsa e bage bas kota-kota inganna tading.
30 Emaka iban kalak Babilon patung Sukot Benot, kalak Kuta ibanna patung Nergal, kalak Hamat+ banna patung Asima,
31 janah kalak Iwa ibanna patung Nibas ras patung Tartak. Tutung kalak Separwaim anak-anakna si dilaki man dibata kalak e eme Adramelek ras Anamelek.+
32 Amin gia mbiar kalak e man Jahwe, angkat kalak e piga-piga kalak arah bangsana jadi imam, si erdahin guna kalak e i ingan ersembah bas ingan-ingan si meganjang.+
33 Mbiar kalak e man Jahwe, tapi sembah kalak e dibata-dibatana menurut agama* bas negri asalna.+
34 Seh asa gundari ikutken kalak e agamana si dekah. La lit sekalak pe si nembah Jahwe, la lit si ngikutken peraturenNa, keputusenNa, Undang-UndangNa, bage pe perentah si bereken Jahwe man anak-anak Jakup, si gelarna enggo igantiNa jadi Israel.+
35 Sanga ban Jahwe perjanjin ras kalak e,+ perentahkenNa, “Ula sembah kena* dibata-dibata si deban, janah ula kena sujud man bana ntah pe ula layani kena ia, ntah pe mpersembahken korban man bana.+
36 Tapi Aku saja si arus sembah kena,+ Aku kap Jahwe si maba kena ndarat arah Mesir nari alu kuasaKu si mbelin ras gegehKu.+ Man Aku saja kena sujud, janah man Aku saja kena mpersembahken korban.
37 Arus lalap tuhu-tuhu ikutken kena peraturenKu, keputusenKu, Undang-UndangKu, bage pe perentah si Kutulisken man kena,+ janah ula sembah kena* dibata-dibata si deban.
38 Ula lupaken kena perjanjin si enggo Kuban ras kena,+ janah ula sembah kena dibata-dibata si deban.
39 Tapi si arus isembah kena eme Aku, Jahwe Dibata kena, sebap Aku kap si enggo nelamatken kena arah musuh-musuh kena nari.”
40 Tapi la patuhi kalak e, janah ikutken kalak e agamana si dekah.+
41 Mbiar bangsa-bangsa e man Jahwe,+ tapi sembahna ka patung-patung ukiren si ibanna. Seh asa gundari ilakoken anak-anakna ras kempu-kempuna bagi si ilakoken nini bulangna.
Cataten i teruh
^ As. “Paro; Firaun.” Penggelaren man raja Mesir.
^ As. “Mbiar kalak e man.”
^ As. “ingan-ingan si meganjang.”
^ Maksudna, bas kerina ingan, la soal sitik ntah pe melala pendudukna.
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Eme kerna kai pe si cidahken Dibata ku bas pikiren sekalak jelma.
^ Ntah “mekeng.”
^ As. “terus dayakenna dirina guna ngelakoken.”
^ Ntah “nembah.”
^ Ntah “uga agama.”
^ As. “mbiar man.”
^ Ntah “dibata-dibatana.”
^ Ntah “carana ersembah.”
^ As. “Ula mbiar man.”
^ As. “Ula mbiar man.”
