2 Raja-Raja 18:1-37
18 Bas tahun peteluken pemerentahen Hoshea+ anak Ela raja Israel, Hiskia+ anak Ahas+ raja Juda jadi raja.
2 Ia jadi raja sanga umurna 25 tahun, janah lit 29 tahun dekahna ia merentah i Jerusalem. Gelar mamakna Abi* anak Sakaria.+
3 Lalap lakokenna kai si benar menurut Jahwe,+ bagi si lakoken Daud nini bulangna.+
4 Ia me si engkernepken ingan-ingan ersembah,*+ ngancurken tugu-tugu si badia, ras nabah tiang-tiang si badia.*+ Hancurkenna ka nipe tembaga si iban Musa,+ sebap seh paksa si e lalap denga itutung kalak Israel korban man nipe e gelah ku datas asapna, si biasana igelari kalak e Nehustan.*
5 Andalkenna Jahwe+ Dibata Israel. Sope lenga ia bage pe kenca ia, la lit raja Juda si bagi ia.
6 Setia ia man Jahwe+ janah lalap ia patuh. Lalap dalankenna perentah-perentah si bereken Jahwe arah Musa.
7 Emaka Jahwe lit ras ia. Ku japa pe ia lawes, lalap pentar perbahanenna. Mberontak ia man raja Assur janah la ia nggit ngelayanisa.+
8 Talukenna ka kalak Pilisti+ seh ku Gasa bage pe daerah-daerahna, arah menara penjaga nari seh ku menara si erbenteng.*
9 Bas tahun si peempatken pemerentahen Raja Hiskia, eme bas tahun si pepituken pemerentahen Hoshea+ anak Ela raja Israel, reh Salmaneser raja Assur nyerang Samaria janah kepungna kota e.+
10 Kenca hampir telu tahun, irebut kalak e kota Samaria.+ Enda terjadi bas tahun si peenemken pemerentahen Hiskia, eme bas tahun si pesiwahken pemerentahen Hoshea raja Israel.
11 Kenca si e, taban raja Assur kalak Israel+ ku Assur janah suruhna kalak e tading i Halah ras i Habor si lit i deher Lau Gosan bage pe bas kota-kota kalak Media.+
12 Enda terjadi perban la begiken kalak e sora Jahwe Dibata kalak e, tapi lalap langgar kalak e perjanjinNa, eme kerina perentah si bereken Musa pelayan Jahwe.+ La kalak e nggit megiken janah la kalak e nggit patuh.
13 Bas tahun si pe-14-ken pemerentahen Raja Hiskia, reh Sanherip raja Assur+ nyerang kerina kota si erbenteng si lit i Juda janah irebutna.+
14 Emaka Hiskia raja Juda ngirim pesan man raja Assur i Lakis, “Aku enggo salah. Ula nai min aku iserangndu. Kubereken pagi kai pe si ipindondu.” Emaka ipindo raja Assur man Hiskia 10 ton 260 kilo* pirak ras 1 ton 26 kilo* emas.
15 Bereken Hiskia kerina pirak bas rumah Jahwe ras bas ingan nimpan erta si lit bas istana.+
16 Buat Hiskia pintu-pintu rumah pertoton+ Jahwe ras kusen-kusen pintu si enggo ilapisi Hiskia raja Juda alu emas,+ janah berekenna e man raja Assur.
17 Suruh raja Assur peminpin pasuken,* peminpin pegawai istana,* ras peminpin pengurus inemen* bage pe pasuken si mbelin arah Lakis+ nari ndahi Raja Hiskia i Jerusalem.+ Lawes kalak e ku Jerusalem janah seh kalak e i deher paleren lau Kolam Atas, si lit i pasar galang si nuju ku ingan tukang cuci.+
18 Sanga lebuh kalak e gelah reh raja ku darat, si ndarat njumpai kalak e eme Eliakim+ anak Hilkia si ngawasi istana, Sepna+ selaku sekertaris, ras Joah anak Asap selaku tukang catat.
19 Emaka nina peminpin pengurus inemen e, “Kataken man Hiskia, ‘Bagenda nina raja Assur si mulia, “Engkai maka bage kel kam tekna?+
20 Nindu lit carandu ras gegehndu guna erperang, tapi e kerina labo tuhu. Ise kin si andalkenndu maka pang kam mberontak ngelawan aku?+
21 Nenlah! Mesir si andalkenndu e+ bagi buluh si enggo meripuk, janah jukjukna tapak-tapak tan kalak si make ia jadi tongkat. Bage me kedungen kalak si erpengarapen man raja Mesir.
22 Adi ning kena tek kena man Jahwe Dibata kena,+ la kin enggo hancurken Hiskia ingan-ingan ersembah man baNa bage pe ingan-ingan nutung* persembahen?+ Janah la kin isuruh Hiskia nge Juda ras Jerusalem sujud i lebe-lebe ingan nutung persembahen enda?”+
23 Gundari, taruhen dage kena ras tuanku raja Assur: Kubereken man kena 2.000 kuda adi ngasup kin kena nikapken kalak si nangkihi kuda-kuda e kerina.+
24 Bicara dat kena pe gereta perang ras si nangkih kuda arah Mesir nari, ngasup kin kena naluken pelayan-pelayan tuanku? Gubernurna si rendahna kin pe, ngasup kin kena nalukenca?
25 Banci kin aku reh ku ingan enda guna ngancurkenca adi la kin ijinken Jahwe? Jahwe kap si ngatakenca man bangku, ‘Seranglah negri e janah hancurken.’”
26 Megi si e, nina Eliakim anak Hilkia, ras Sepna+ bage pe Joah man peminpin pengurus inemen e,+ “Bas bahasa Aram*+ min kam ngerana man budak-budakndu enda. Angkai kami nge. Ula min kam ngerana bas bahasa kalak Jahudi, sebap lit kalak si megiken i datas tembok.”+
27 Tapi nina peminpin pengurus inemen e man kalak e, “Akap kena kin man kena saja ras man tuan kena saja aku isuruh tuanku mpeseh kata-kata enda? Kata-kata enda pe guna kalak si kundul i datas tembok, si nandangi man kotorenna ras minem lau kencingna radu ras kena.”
28 Kenca si e tedis peminpin pengurus inemen e, janah megang ia ngerana bas bahasa kalak Jahudi, nina, “Begiken kata-kata raja Assur si mulia.+
29 Bagenda nina raja, ‘Ula kena nggit tipu Hiskia, sebap labo ia ngasup nelamatken kena arah tanku nari.+
30 Ula kena nggit ban Hiskia tek man Jahwe, alu ngataken, “Pasti kita selamatken Jahwe janah kota enda labo pagi ndabuh ku tan raja Assur.”+
31 Ula begiken Hiskia, sebap bagenda nina raja Assur, “Nyerahlah kena janah erdamelah ras aku. Tiap kalak arah kena man pagi arah batang anggur ras batang arana, janah minem pagi kena arah sumur* kena,
32 seh ngasa reh aku janah kubaba kena ku negri si bagi negri kena+ si dem alu biji-bijin,* anggur si mbaru, roti, kebun anggur, batang saitun, ras madu. Pasti kena lalap nggeluh janah la mate. Ula begiken Hiskia si enggo nipu kena alu ngataken, ‘Pasti kita selamatken Jahwe.’
33 Pernah kin dibata-dibata bangsa si deban nelamatken negrina arah tan raja Assur?
34 I ja dage dibata-dibata Hamat+ ras Arpad? I ja dage dibata-dibata Separwaim,+ Hena, ras Iwa? Selamatken dibata-dibata kalak e kin Samaria arah tanku nari?+
35 Dibata si apai si pernah nelamatken negrina arah tanku nari? Engkai maka akap kena banci selamatken Jahwe Jerusalem arah tanku nari?”’”+
36 Tapi sip kerina kalak e janah la lit kai pe jawapna, sebap enggo iperentahken raja, “Ula aloi kalak e.”+
37 Kenca si e, Eliakim anak Hilkia si ngawasi istana, bage pe Sepna selaku sekertaris, ras Joah anak Asap selaku tukang catat, reh ndahi Hiskia janah enggo irigatken kalak e uisna. Peseh kalak e kai si ikataken peminpin pengurus inemen ndai.
Cataten i teruh
^ Gelar e ipegendek arah gelar Abia.
^ As. “ingan-ingan si meganjang.”
^ Ntah “berhala nipe tembaga.”
^ Maksudna, bas kerina ingan, la soal sitik ntah pe melala pendudukna.
^ As. “30 talenta.”
^ Ntah “Rabsake.”
^ Ntah “Rabsaris.”
^ Ntah “Tartan.”
^ Ntah “Siria.”
^ Maksudna, lubang guna nimpan lau.
