2 Raja-Raja 2:1-25
2 Sanga nandangi seh waktuna Elia+ iangkat Jahwe ku langit alu angin badai,+ lawes Elia ras Elisa+ arah Gilgal nari.+
2 Nina Elia man Elisa, “Jenda kam lebe, sebap suruh Jahwe aku ku Betel.” Tapi nina Elisa, “Ersumpah aku i lebe-lebe Jahwe si nggeluh bage pe i lebe-lebe kam si nggeluh, labo aku nggit nadingken kam.” Emaka lawes kalak e ku Betel.+
3 Kenca si e, reh keturunen nabi-nabi* si lit i Betel njumpai Elisa janah ning kalak e man bana, “La kin tehndu bas wari enda ibuat Jahwe ateNa tuanndu, janah lanai pagi ia jadi kepalandu?”+ Nina ngaloi, “Enggo kuteh, la padah sicakapken.”
4 Nina Elia ka, “O Elisa, tading kam lebe i jenda, suruh Jahwe aku ku Jeriho.”+ Tapi nina Elisa, “Ersumpah aku i lebe-lebe Jahwe si nggeluh bage pe i lebe-lebe kam si nggeluh, labo aku nggit nadingken kam.” Emaka lawes kalak e ku Jeriho.
5 Kenca si e, reh keturunen nabi-nabi si lit i Jeriho njumpai Elisa janah ning kalak e man bana, “La kin tehndu bas wari enda ibuat Jahwe ateNa tuanndu, janah lanai pagi ia jadi kepalandu?” Megi si e, nina, “Enggo kuteh, la padah sicakapken.”
6 Nina Elia man Elisa, “Tading kam lebe i jenda, suruh Jahwe aku ku Lau Jordan.” Tapi nina Elisa, “Ersumpah aku i lebe-lebe Jahwe si nggeluh bage pe i lebe-lebe kam si nggeluh, labo aku nggit nadingken kam.” Emaka lawes kalak e duana.
7 Lit 50 keturunen nabi-nabi si ngikutkenca. Sanga tedis Elia ras Elisa i pinggir Lau Jordan, itatap keturunen nabi-nabi kalak e arah ndauh nari.
8 Kenca si e, buat Elia jubahna,+ gulungna janah pekpekkenna jubah e ku lau. Terbagi dua lau e, emaka nyebrang kalak e duana i tengah-tengah lau e, i datas taneh si kerah.+
9 Seh kenca kalak e i sebrang, mis kataken Elia man Elisa, “Kataken kai atendu si kulakoken man bandu sope aku ibuat bas kam nari.” Nina Elisa, “Bereken min man bangku bagin*+ arah kesah Dibata si berekenNa man bandu.”+
10 Nina njawapsa, “Si mesera kap si pindondu e. Adi idahndu kari aku ibuat arah kam nari, datndu si pindondu e. Tapi adi lang, labo idatndu.”
11 Ercakap-cakap ia duana janahna erdalan. Rempet reh gereta si erapi-api si itarik kuda-kuda si erapi-api ka.+ Pisahkenna kalak e duana, dung e Elia iangkat ku langit alu angin badai.+
12 Sanga idah Elisa kai si terjadi, serko ia, “Bapakku, o bapakku! Gereta perang Israel ras si nangkih kudana!”+ Kenca lanai idahna Elia, jemakna jubahna janah rigatkenna jadi dua.+
13 Kenca si e buatna jubah+ Elia si naktak, jenari mulihken ia ku pinggir Lau Jordan janah tedis ia i je.
14 Kenca si e pekpekna lau e alu jubah Elia, janah nina, “I ja Jahwe Dibata Elia?” Sanga pekpekna lau e, terbagi dua lau e, emaka nyebrang Elisa.+
15 Kenca idah keturunen nabi-nabi i Jeriho e Elisa arah ndauh nari, ning kalak e, “Kesah si badia si lit bas Elia, gundari enggo lit bas Elisa.”+ Emaka jumpai kalak e Elisa janah sujud kalak e man bana.
16 Nina kalak e man Elisa, “Arah pelayan-pelayanndu lit 50 dilaki si banci iandalken. Pediatlah kalak e lawes ndarami tuanndu. Banci saja angkat kesah* Jahwe ia janah benterkenna ku salah sada gunung ntah pe lembah.”+ Tapi nina, “La padah.”
17 Tapi terus iasak kalak e ia seh ngasa mela kapna, emaka nina, “Suruh dage kalak e.” Emaka isuruh me 50 dilaki e, janah terus darami kalak e Elia telu wari dekahna, tapi la dat kalak e.
18 Sanga mulih kalak e, Elisa sangana tading i Jeriho.+ Emaka nina Elisa man kalak e, “La kin enggo kukataken man kena la padah kena lawes?”
19 Bas sada wari, nina kalak si lit bas kota e man Elisa, “Bagi si enggo idahndu Tuan, mejile letak kota enda,+ tapi launa la mejile janah tanehna la subur.”*
20 Nina Elisa njawapsa, “Baba ku jenda mangkok kitik si mbaru, tama sira ku bas.” Emaka baba kalak e man bana.
21 Lawes Elisa ku mata lau si lit bas kota e, benterkenna sira e ku je,+ jenari nina, “Bagenda nina Jahwe, ‘Enggo Kuban lau e mejile. Emaka lanai kari lit si mate ntah pe si la subur* perban lau e.’”
22 Seh ngasa gundari, lau e tetap mejile bagi si kataken Elisa.
23 I je nari lawes ia ku Betel. Sanga bas perdalanen, lit anak-anak dilaki si ndarat arah kota janah terus tokohina ia,+ nina kalak e, “Lawes ko botak! Lawes ko botak!”
24 Dungna tulihkenna ku pudi, inenna kalak e, janah sumpahina bas gelar Jahwe. Kenca si e, reh dua beruang beruna+ arah kerangen nari janah icabik-cabikna 42 kalak arah anak-anak e ndai.+
25 I je nari teruskenna erdalan ku Gunung Karmel.+ Kenca si e mulih ia ku Samaria.
Cataten i teruh
^ “Keturunen nabi” mungkin maksudna sekolah man nabi-nabi ntah kelompok nabi-nabi.
^ As. “2 bagin.”
^ Ntah “angkat angin arah.”
^ Ntah banci saja “janah erban diberu keguguren.”
^ Ntah banci saja “si keguguren.”