2 Raja-Raja 20:1-21
20 Bas sada wari, sakit Hiskia janah nandangi mate.+ Reh Nabi Jesaya anak Amos ndahi ia janah nina, “Bagenda nina Jahwe, ‘Berekenlah petunjuk man keluargandu,* sebap kam nandangi mate. Labo pagi kam malem.’”+
2 Emaka alaken Hiskia ku dingding, jenari ertoto ia man Jahwe,
3 “O Jahwe, mindo kel aku man baNdu, inget min uga aku alu setia janah bulat kel ukurku ngikutken dalan-dalanNdu, kulakoken kai si mehuli akapNdu.”+ Jenari tangis kel Hiskia.
4 Kenca si e lawes Jesaya, tapi lenga pe ia seh bas halamen tengah, ngerana Jahwe man bana, nina,+
5 “Dahi ka mulihi Hiskia peminpin umatKu janah kataken bana, ‘Bagenda nina Jahwe Dibata nini bulangndu Daud, “Enggo Kubegi totondu. Enggo Kuidah mambur iluhndu.+ Emaka malem kam pagi Kuban.+ Bas wari si peteluken, laweslah kam ku rumah Jahwe.+
6 Kutambahi pagi umurndu 15 tahun nari janah Kuselamatken pagi kam ras kota enda arah tan raja Assur nari.+ Kupertahanken kota enda guna kepentingenKu bage pe guna kepentingen pelayanKu Daud.”’”+
7 Kenca si e nina Jesaya, “Babalah buah ara si kerah si enggo ipihpihken.” Emaka baba kalak e janah tamana ku bisul Hiskia, jenari mulai malem penakitna.+
8 Sope si e, nungkun Hiskia man Jesaya, “Kai tandana+ ipepalem Jahwe pagi aku janah bas wari si peteluken banci aku lawes ku rumah Jahwe?”
9 Nina Jesaya ngaloi, “Enda tanda arah Jahwe guna mbuktiken maka pasti lakoken Jahwe kai si enggo katakenNa: Apai pilihndu, bayangen tangga* e maju sepuluh langkah ntah mundur sepuluh langkah?”+
10 Nina Hiskia, “Pasti menukah bayangen e maju sepuluh langkah, tapi labo banci bayangen e mundur sepuluh langkah.”
11 Erlebuh Nabi Jesaya man Jahwe, emaka ban Dibata bayangen tangga Ahas mundur sepuluh langkah.+
12 Sanga si e, raja Babilon eme Berodak Baladan anak Baladan ngirim surat ras hadiah man Hiskia perban begina Hiskia sangana sakit.+
13 Meriah ukur Hiskia ngalo-ngalo kalak si isuruh raja e. Cidahkenna kerina isi ingan nimpan ertana+ man kalak e, termasuk pirak, emas, minak balsem* ras minak si merga si debanna, bage pe perlengkapen senjatana. Cidahkenna kerina si lit bas ingan-ingan nimpan ertana. Cidahken Hiskia man kalak e kerina si lit bas istanana bage pe bas kerajanna, la lit sada pe si la cidahkenna.
14 Kenca si e, dahi Nabi Jesaya me Raja Hiskia, janah sungkunna, “Kai nina kalak ndai? Ja nari kalak e?” Ngaloi Hiskia, “Kalak e reh arah ingan si ndauh nari, arah Babilon.”+
15 Sungkun Jesaya ka, “Kai si idah kalak e bas istanandu?” Nina Hiskia, “Enggo idah kalak e kerina si lit bas istanaku. Kucidahken kerina si lit bas ingan-ingan nimpan ertaku, la lit sada pe si la kucidahken.”
16 Nina Jesaya man Hiskia, “Begikenlah kai si ikataken Jahwe,+
17 nina Jahwe, ‘Reh pagi waktuna maka kerina si lit bas istanandu bage pe kerina si enggo pepulung nini bulangndu seh asa gundari, ibaba pagi ku Babilon+ janah la lit si itadingken.
18 Selain si e, piga-piga keturunenndu pe ibaba pagi+ janah iban jadi pegawai bas istana raja Babilon.’”+
19 Kenca si e, nina Hiskia man Jesaya, “Mehuli kap kata-kata Jahwe si pesehndu ena.”+ Nina Hiskia ka, “Mehuli kap e sebap lit pagi kedamen ras keamanen* segedang geluhku.”+
20 Cerita si debanna kerna sejarah Hiskia, kerina kehebatenna ras uga ia erban kolam+ bage pe paleren lau si ipalerkenna ku kota,+ kerina itulis bas buku sejarah raja-raja Juda.
21 Dungna mate Hiskia janah ikuburken ras nini bulangna.+ Anakna si nggantiken ia jadi raja+ eme Manase.+
Cataten i teruh
^ Ntah “istanandu.”
^ Mungkin tangga e igunaken guna ngenen waktu, bagi jam matawari.
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
^ Ntah “kebenaren.”
