2 Raja-Raja 21:1-26
21 Manase+ jadi raja sanga umurna 12 tahun janah lit 55 tahun dekahna ia merentah i Jerusalem.+ Gelar mamakna eme Hepsiba.
2 Lakokenna kai si jahat menurut Jahwe. Ikutkenna kebiasan bangsa-bangsa+ si enggo pelawes Jahwe arah lebe-lebe kalak Israel, eme kebiasan si ciga ate Dibata.+
3 Bangunna ka mulihi ingan-ingan ersembah* si enggo iruntuhken Hiskia bapakna.+ Banna ka ingan-ingan nutung* persembahen man Baal bage pe tiang-tiang si badia,*+ bagi si lakoken Ahap raja Israel.+ Sujud ia janah layanina kai pe si lit bas langit.+
4 Bangunna ka ingan-ingan nutung persembahen bas rumah Jahwe,+ padahal enggo kataken Jahwe, “Kutama pagi gelarKu bas Jerusalem.”+
5 Bangunna ka ingan-ingan nutung persembahen bas dua halamen rumah Jahwe+ man kerina si lit bas langit.+
6 Persembahkenna ka anak-anakna si dilaki jadi korban tutungen. Pakena ilmu sihir bage pe ilmu ramal,+ pilihna ka kalak si beluh ngelebuh begu kalak mate bage pe si meteh wari.+ Melala kel perbahanen jahat si lakokenna si erban Jahwe merawa man bana.
7 Tamana ka ku rumah Dibata patung tiang si badia*+ si ibanna, padahal enggo kataken Jahwe man Daud ras anakna Salomo, nina, “Arah kerina suku Israel, enggo Kupilih rumah enda bage pe Jerusalem jadi ingan gelarKu seh rasa lalap.+
8 Adi patuhi kalak Israel kerina si enggo Kuperentahken+ janah ikutken kalak e kerina Undang-Undang si enggo perentahken pelayanKu Musa, lanai pagi Kupelawes Israel arah negri si enggo Kubereken man nini bulangna.”+
9 Tapi la kalak e patuh, janah lalap kalak e isesatken Manase, emaka perbahanen kalak e jahaten asangken bangsa-bangsa si enggo ikernepken Jahwe i lebe-lebe kalak Israel.+
10 Lalap Jahwe ngerana arah nabi-nabiNa,+ nina,
11 “Manase raja Juda ngelakoken kerina si erban ciga ate Dibata. Perbahanenna jahaten asangken kerina kalak Amori+ si lit sope ia,+ janah banna kalak Juda erdosa alu berhala-berhalana si ciga ate* Dibata.
12 Emaka bagenda nina Jahwe Dibata Israel, ‘Kuban pagi bencana man Jerusalem+ ras Juda janah ise pe si megisa pasti sengget.+
13 Kupakeken man Jerusalem alat pengukur+ si ipake man Samaria,+ janah Kupakeken alat pengukur tegak lurus* si ipake man keluarga Ahap.+ Bersih pagi Kusapu Jerusalem bagi ngelap mangkok seh asa bersih janah Kutungkupken.+
14 Kutadingken pagi umatKu si nggeluh denga,*+ janah Kuserahken kalak e ku tan musuh. Kerina musuh kalak e naban kalak e janah irampasi musuh-musuh ertana.+
15 Si enda Kulakoken perban lakoken kalak e kai si jahat Kuakap janah lalap ban kalak e Aku merawa, mulai kin nini bulang kalak e ndarat arah Mesir nari seh asa gundari.’”+
16 Enterem kel kalak si la ersalah ibunuh Manase, piah dem Jerusalem alu dareh kalak e, arah ujung ku ujung.+ Selain si e, erdosa ka ia perban banna kalak Juda erdosa janah ngelakoken kai si jahat akap Jahwe.
17 Cerita si debanna kerna sejarah Manase, kerina si lakokenna, bage pe dosa-dosa si lakokenna, kerina itulis bas buku sejarah raja-raja Juda.
18 Dungna mate Manase janah ikuburken bas taman istanana, eme taman Ussa.+ Kenca si e, anakna si nggantiken ia jadi raja eme Amon.
19 Umur Amon+ 22 tahun sanga ia jadi raja, janah ia merentah sedekah dua tahun i Jerusalem.+ Gelar mamakna Mesulemet anak Harus arah Jotba nari.
20 Lalap lakokenna kai si jahat akap Jahwe bagi si enggo ilakoken bapakna Manase.+
21 Lalap ikutkenna dalan-dalan bapakna. Layanina janah sujud ia man berhala-berhala si ciga ate Dibata, eme berhala-berhala si ilayani bapakna.+
22 Tadingkenna Jahwe Dibata nini bulangna, janah la ikutkenna dalan-dalan Jahwe.+
23 Bas pudi wari, ersekongkol pelayan-pelayan Amon ngelawan ia, janah dungna raja e ibunuh bas istanana.
24 Tapi ibunuh rakyat negri e kerina kalak si ersekongkol ngelawan Raja Amon. Kenca si e, ban kalak e anakna si nggantiken ia jadi raja eme Josia.+
25 Cerita si debanna kerna sejarah Amon ras kai si lakokenna, kerina itulis bas buku sejarah raja-raja Juda.
26 Emaka ikuburken ia bas kuburenna i taman Ussa,+ jenari anakna si nggantiken ia jadi raja eme Josia.+
Cataten i teruh
^ As. “ingan-ingan si meganjang.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Ntah “unting-unting.”
^ As. “Kutadingken pagi warisenKu si sisa.”
