2 Raja-Raja 22:1-20
22 Josia+ jadi raja sanga umurna waluh tahun, janah 31 tahun dekahna ia merentah i Jerusalem.+ Gelar mamakna Jedida anak Adaya arah Boskat nari.+
2 Lakokenna kai si benar menurut Jahwe janah ikutkenna kerina dalan Daud nini bulangna.+ La tadingkenna undang-undang Dibata.
3 Bas tahun pe-18-ken pemerentahen Raja Josia, isuruhna sekertarisna Sapan anak Asalia, kempu Mesullam, guna lawes ku rumah Jahwe,+ nina,
4 “Dahi Imam si Mbelin Hilkia,+ janah pindoken gelah pepulungna kerina sen si enggo ibaba ku rumah Jahwe,+ eme sen arah rakyat si enggo ipepulung kalak si ertugas njaga pintu.+
5 Sen e arus ibereken man kalak si ipilih guna ngawasi dahin bas rumah Jahwe. Bereken kalak e sen e man kalak si erdahin guna mpesikap kai si ceda* bas rumah Jahwe,+
6 eme man tukang si ahli, tukang bangunen, ras tukang batu. Ipake kalak e pagi sen e gelah banci nukur kayu ras batu-batu si enggo ipotong guna mpesikap rumah e.+
7 Cara kalak e nggunaken sen e la perlu ipersoalken sebap kalak e terteki.”+
8 Kenca si e, kataken Imam si Mbelin Hilkia man Sapan sekertaris e,+ “Lit kudat buku Undang-Undang Musa+ bas rumah Jahwe.” Emaka bereken Hilkia buku e man Sapan, jenari mulai baca Sapan.+
9 Kenca si e, Sapan sekertaris e ndahi raja janah nina, “Enggo pedarat pelayan-pelayanndu sen si lit bas rumah e, janah enggo berekenna e man kalak si pilihndu guna ngawasi dahin si lit bas rumah Jahwe.”+
10 Nina Sapan ka man raja, “Lit sada buku+ si bereken Imam Hilkia man bangku.” Mulai bacaken Sapan buku e i lebe-lebe raja.
11 Kenca begi raja kata-kata si lit bas buku Undang-Undang e, mis rigatkenna uisna.+
12 Jenari iperentahken raja man Imam Hilkia, Ahikam+ anak Sapan, Ahbor anak Mikaya, Sapan sekertaris e, bage pe Asaya pelayan raja, nina,
13 “Laweslah kam, pindo petunjuk man Jahwe kerna kata-kata si lit bas buku si enggo idat e, guna kepentingenku ras kepentingen rakyat, bage pe kepentingen kerina kalak Juda. Sebap enggo merawa kel Jahwe man banta+ perban nini bulangta la matuhi kata-kata si lit bas buku enda, janah la dalankenna kerina kata-kata si itulisken bas buku enda.”
14 Emaka lawes Imam Hilkia, Ahikam, Ahbor, Sapan, ras Asaya guna njumpai Nabiah Hulda.+ Ia diberu Salum. Salum eme anak Tikwa kempu Harhas. Dahin Salum ngurus lemari uis. Hulda tading bas Kota si Mbaru* i Jerusalem. I je kalak e ngerana ras ia.+
15 Nina man kalak e, “Bagenda nina Jahwe Dibata Israel, ‘Kataken man kalak si nuruh kena,
16 “Bagenda nina Jahwe, ‘Kuban terjadi bencana ku ingan enda bage pe man pendudukna, eme kerina si itulisken bas buku si enggo ibaca raja Juda.+
17 Enggo tadingken kalak e Aku janah ipersembahkenna korban man dibata-dibata si deban.+ Kerina perbahanen kalak e erban reh rawaKu. Emaka merawa kel Aku+ ku ingan enda janah rawaKu e lanai banci ngadi.’”+
18 Tapi man raja Juda si nuruh kena mindo petunjuk Jahwe, enda si arus kataken kena man bana, “Bagenda nina Jahwe Dibata Israel, ‘Enggo begindu kata-kata si lit bas undang-undang e.
19 Kenca begindu kata-kataKu kerna ingan enda ras pendudukna, maka sumpahi kalak pagi janah ngeri pagi akap kalak ingan enda ras pendudukna, dungna erpengangka kam janah ipeterukndu ukurndu+ i lebe-lebe Jahwe. Sanga Kuidah peterukndu ukurndu janah rigatkenndu uisndu,+ jenari tangis kam i lebe-lebeKu, emaka Kubegiken totondu, nina Jahwe.
20 E me sebapna Kupepulung kam ras nini bulangndu,* janah ikuburken pagi kam alu dame. La pagi idahndu bencana si Kubereken ku ingan enda.’”’” Kenca si e, ipeseh kalak e jawapen nabiah e man raja.
Cataten i teruh
^ Ntah “si retak.”
^ Ntah “bas Bagin si Peduaken.”
^ Kalimat enda ngertiken kematen.
