2 Raja-Raja 23:1-37
23 Emaka, kirim raja pesan guna ngelebuh kerina peminpin Juda ras Jerusalem.+
2 Kenca si e, lawes raja ku rumah Jahwe ras kerina peminpin Juda, kerina penduduk Jerusalem, imam-imam, nabi-nabi, ras kerina rakyat, la soal si metua ntah pe si nguda.* Bacaken raja i lebe-lebe kalak e buku+ perjanjin+ si idat bas rumah Jahwe ndai.+
3 Tedis raja i deher tiang janah banna perjanjin i lebe-lebe Jahwe+ maka ikutkenna Jahwe, perentah-perentahNa, pengingetNa, ras peraturenNa alu bulat ukur ras asa gegehna. Idalankenna ka perjanjin si itulis bas undang-undang e. Kerina rakyat setuju man perjanjin e.+
4 Kenca si e, perentahken raja Imam si Mbelin Hilkia+ bage pe imam-imam si debanna ras penjaga pintu gelah masuk kalak e ku rumah Jahwe guna mpedarat kerina peralaten si iban man Baal, man tiang si badia,*+ bage pe man kerina si lit bas langit. Tutung raja kerina e i Lembah Kidron si lit i darat Jerusalem. Kenca si e babana abuna ku Betel.+
5 Pelawesna imam-imam si ngelayani dibata-dibata asing si lantik raja-raja Juda guna erban asap korban bas ingan-ingan ersembah* si lit i kota-kota Juda ras i sekeliling Jerusalem. Pelawesna ka kalak si nutung korban gelah ku datas asapna man Baal, matawari, bulan, bintang-bintang, ras kerina si lit bas langit.+
6 Pedaratna ka tiang si badia*+ arah rumah Jahwe ku darat Jerusalem, eme ku Lembah Kidron janah tutungna i je.+ Hancurkenna seh jadi abu jenari amburkenna abuna ku kuburen rakyat.+
7 Runtuhkenna ka rumah-rumah ingan tading dilaki-dilaki si jadi pelacur+ bas ingan-ingan ersembah, janah rumah e lit bas rumah Jahwe. I je ka diberu-diberu erban kain kemah guna tiang si badia.*
8 Pelawesna kerina imam arah kota-kota Juda gelah najis ingan-ingan ersembah si ipake imam-imam guna nutung korban, mulai Geba nari+ seh ku Berseba.+ Alu bage, ingan e lanai cocok igunaken jadi ingan ersembah. Runtuhkenna ka ingan-ingan ersembah i gerbang Josua peminpin kota e, si lit bas sebelah kiri sanga masuk kalak ku gerbang kota.
9 Imam-imam si lit bas ingan-ingan ersembah e la ngelayani bas ingan nutung* persembahen Jahwe si lit i Jerusalem,+ tapi tetap denga kalak e man roti si la itama ragi radu ras senina-seninana.
10 Topet*+ si lit i Lembah Anak-Anak Hinnom*+ pe ban Josia najis gelah ingan e lanai cocok igunaken jadi ingan ersembah. Alu bage, lanai lit sekalak pe nutung anakna si dilaki ntah pe si diberu jadi korban man Moloh.+
11 Kuda-kuda si ipake raja-raja Juda guna nembah matawari pe la berena masuk ku rumah Jahwe arah ruangen* Natan Melek eme pegawai istana, si lit i halamen. Tutungna gereta-gereta si ipake guna matawari.+
12 Hancurken raja ka ingan-ingan nutung persembahen si iban raja-raja Juda i datas ruangen Ahas si lit i teruh atap.+ Runtuhkenna ka ingan-ingan nutung persembahen si iban Manase si lit bas duana halamen rumah Jahwe.+ Kerina e hancurkenna seh jadi abu, janah amburkenna abu e ku Lembah Kidron.
13 Ban raja ka najis ingan-ingan ersembah si lit i lebe-lebe Jerusalem eme i sebelah selatan Gunung Saitun,* si bangun Salomo raja Israel guna Dewi Astarte eme dibata kalak Sidon si ciga ate Dibata, guna Dewa Kemos eme dibata Moap si ciga ate Dibata, bage pe Dewa Milkom+ eme dibata kalak Ammon si ciga ate Dibata.+ Alu bage, ingan e lanai cocok igunaken jadi ingan ersembah.
14 Hancurkenna tugu-tugu si badia janah runtuhkenna tiang-tiang si badia,*+ jenari demina ingan e alu tulan-tulan manusia.
15 Hancurkenna ingan nutung persembahen si lit i Betel, eme ingan ersembah si ban Jerobeam anak Nebat si erban kalak Israel ngelakoken dosa.+ Kenca hancurkenna ingan nutung persembahen ras ingan ersembah e, tutungna ingan ersembah e seh jadi abu, janah tutungna ka tiang si badia e.+
16 Sanga inen Josia kuburen-kuburen si lit i datas gunung, buatna tulan-tulan arah kuburen-kuburen e nari janah tutungna i datas ingan nutung persembahen. Banna bage, gelah ingan nutung persembahen e lanai cocok jadi ingan ersembah. Si enda terjadi tepat bagi si enggo pernah kataken Jahwe arah nabiNa.+
17 Kenca si e nina, “Lit kuidah i jah batu nisan. Kuburen ise kin ah?” Nina kalak si lit bas kota e bana, “Ah kuburen nabi Dibata arah Juda nari,+ si mbarenda ngataken kerna kai si enggo ilakokenndu enda man ingan nutung persembahen si lit i Betel.”
18 Emaka nina, “La banci ise pe ngkuit tulan-tulanna, pediat saja je.” Emaka pediat kalak e tulan-tulan e tetap i je, bage pe tulan-tulan nabi si reh Samaria nari.+
19 Hancurken Josia ka ingan-ingan ersembah bas ingan-ingan si meganjang si lit i kota-kota Samaria,+ eme ingan-ingan si iban raja-raja Israel si erban Dibata merawa. Lakokenna bage bas ingan-ingan e bagi si lakokenna bas Betel.+
20 Korbankenna ka kerina imam-imam si ngelayani bas ingan-ingan ersembah i datas ingan nutung persembahen. Tutungna ka tulan-tulan manusia i datasna.+ Kenca si e mulih ia ku Jerusalem.
21 Dung e perentahken raja man kerina rakyat, “Rayakenlah Paskah+ man Jahwe Dibata kena, bagi si itulis bas buku perjanjin enda.”+
22 La pernah lit Paskah si bage mulai kin jaman hakim-hakim merentah Israel ntah pe bas jaman raja-raja Israel bage pe raja-raja Juda.+
23 Bas tahun si pe-18-ken pemerentahen Raja Josia, irayaken me Paskah guna Jahwe i Jerusalem.
24 Pelawes Josia ka kerina kalak si beluh ngelebuh begu kalak mate bage pe peramal.+ Hancurkenna ka patung-patung berhala,*+ berhala-berhala si ciga ate* Dibata, ras kerina si ciga ate Dibata si lit i negri Juda ras i Jerusalem. Si e lakokenna guna ndalanken kai si ikataken bas Undang-Undang Musa+ si itulis bas buku si idat Imam Hilkia bas rumah Jahwe.+
25 Lenga pernah lit raja si bagi Josia, si matuhi kerina Undang-Undang Musa ras mulihken ku Jahwe asa kerina pusuhna, kerina geluhna,+ ras kerina gegehna. Janah kenca ia, lanai lit raja si bali bagi ia.
26 Amin gia bage, merawa denga kel Jahwe man Juda perban kerina perbahanen Manase si enggo erban Ia merawa.+
27 Nina Jahwe, “Kupelawes pagi Juda arah lebe-lebeKu nari,+ bagi Aku mpelawes Israel.+ Kutulak kota Jerusalem si enggo Kupilih, bage pe ingan si enggo Kukataken, ‘GelarKu tetap lit i je.’”+
28 Cerita si debanna kerna sejarah Josia ras kerina si lakokenna itulis bas buku sejarah raja-raja Juda.
29 Bas jaman Josia, reh Neko raja Mesir njumpai raja Assur i Lau Eprat. Jenari lawes Raja Josia guna ngelawan ia. Tapi sanga idah Neko ia, ibunuhna ia i Megido.+
30 Emaka baba pelayan-pelayan Josia mayatna alu gereta arah Megido nari ku Jerusalem, janah ikuburken ia i kuburenna. Kenca si e, ilantik rakyat negri e Jehoahas anak Josia jadi raja nggantiken bapakna.+
31 Umur Jehoahas+ 23 tahun sanga ia jadi raja, janah telu bulan dekahna ia merentah i Jerusalem. Gelar mamakna Hamutal+ anak Jeremia arah Lipna nari.
32 Mulai lakokenna kai si jahat menurut Jahwe, bagi kerina si ilakoken nini bulangna.+
33 Penjaraken Neko+ ia i Ripla+ bas negri Hamat, gelah la banci ia merentah i Jerusalem. Janah paksa Neko negri e nggalari 3.420 kilo* pirak ras kira-kira 34 kilo* emas.+
34 Selain si e, angkat Neko me Eliakim anak Josia jadi raja nggantiken Josia bapakna janah gantina gelarna jadi Joyakim. Tapi Jehoahas babana ku Mesir,+ dungna mate ia i jah.+
35 Bereken Joyakim man raja Mesir emas ras pirak, tapi paksana negri e nggalari pajak guna mereken pirak si ipindo raja Mesir. Emaka suruhna rakyat negri e mereken pirak ras emas si buena bagi si enggo itetapken man tiap kalak guna ibereken man Neko.
36 Joyakim+ jadi raja sanga umurna 25 tahun, janah 11 tahun dekahna ia merentah i Jerusalem.+ Gelar mamakna Sabaidah anak Pedaya arah Ruma nari.
37 Lalap lakokenna kai si jahat menurut Jahwe,+ bagi kerina si lakoken nini bulangna.+
Cataten i teruh
^ Ntah “si lemah ntah pe si megegeh.”
^ As. “ingan-ingan si meganjang.”
^ Ingan kalak Israel si murtad ngorbanken anakna si lit i darat Jerusalem.
^ Ntah “ruangen ingan man.”
^ Maksudna, Gunung Pengkernepen, terutama bagin si arah datasna i selatan gunung e, si igelari ka Gunung Penghinan.
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Ntah “dewa keluarga.” As. “terapim.”
^ As. “ras 1 talenta.”
