2 Raja-Raja 24:1-20
24 Bas jaman Joyakim, reh Nebukadnesar+ raja Babilon nyerang Joyakim. Dungna, Joyakim jadi pelayan Nebukadnesar telu tahun dekahna. Tapi bas pudi wari, mberontak ia.
2 Kenca si e, mulai iban Jahwe rehen gerombolen perampok arah Kaldea,+ Siria, Moap, ras Ammon guna nyerang ras ngancurken Juda. Enda terjadi bagi si enggo kataken Jahwe+ arah nabi-nabiNa.
3 Si enda terjadi man Juda pasti perban enggo perentahken Jahwe gelah Juda ipelawes arah lebe-lebeNa nari.+ Si e ilakokenNa perban kerina dosa si enggo ilakoken Manase,+
4 bage pe perban enggo enterem kel kalak si la ersalah ibunuhna,+ piah dem ibanna Jerusalem alu dareh kalak e, janah Jahwe la nggit ngampunisa.+
5 Cerita si debanna kerna sejarah Joyakim ras kerina si lakokenna itulis bas buku sejarah raja-raja Juda.+
6 Dungna mate Joyakim.+ Anakna si jadi raja nggantiken ia eme Joyakin.
7 Rebut raja Babilon kerina negri jang raja Mesir,+ mulai Lau* Mesir nari+ seh ku Lau Eprat.+ Emaka mulai je nari raja Mesir lanai pernah ndarat arah negrina nari.
8 Umur Joyakin+ 18 tahun sanga ia jadi raja, janah telu bulan dekahna ia merentah bas Jerusalem.+ Gelar mamakna Nehusta anak Elnatan arah Jerusalem nari.
9 Lalap lakokenna kai si jahat menurut Jahwe bagi kerina si ilakoken bapakna.
10 Paksa si e, pelayan-pelayan Nebukadnesar raja Babilon nyerang Jerusalem janah ikepung kalak e kota e.+
11 Sanga kepung pelayan-pelayanna kota e, masuk Nebukadnesar raja Babilon ku bas kota e.
12 Nyerah Joyakin raja Juda man raja Babilon+ radu ras mamakna, pelayan-pelayanna, pejabat-pejabatna, ras pegawai-pegawai istanana.+ Emaka bas tahun pewaluhken pemerentahen raja Babilon, tabanna me Joyakin.+
13 Kenca si e, ibuat raja Babilon kerina erta si lit bas rumah Jahwe bage pe si lit bas istana.+ Jenari potong-potongna kerina peralaten emas si iban Salomo raja Israel i rumah pertoton Jahwe.+ Enda terjadi bagi si enggo ikataken Jahwe.
14 Itaban ka kerina penduduk Jerusalem, kerina pejabatna,+ kerina pejuangna si megegeh, bage pe kerina tukang si ahli ras tukang besi,*+ buena lit 10.000 kalak. La lit sekalak pe si itadingkenna selain kalak si seh kel serana.+
15 Labo Joyakin+ saja si itaban ku Babilon,+ tapi ikut ka mamakna, diberu-diberuna, pegawai-pegawai istanana, ras kalak si penting i negri e. Babana kalak e jadi tabanen arah Jerusalem nari ku Babilon.
16 Taban raja Babilon ka kerina pejuang si buena 7.000 kalak, bage pe 1.000 tukang si ahli ras tukang besi. Kerina dilaki si megegeh ras terlatih bas perang e ibaba ku Babilon.
17 Angkat raja Babilon me Mattania eme senina bapak Joyakin+ jadi raja guna nggantiken Joyakin, janah igantina gelarna jadi Sedekia.+
18 Umur Sedekia 21 tahun sanga ia jadi raja. Lit 11 tahun dekahna ia merentah bas Jerusalem. Gelar mamakna Hamutal+ anak Jeremia arah Lipna nari.
19 Lalap lakokenna kai si jahat menurut Jahwe, bali bagi kerina si ilakoken Joyakim.+
20 Merawa Jahwe man Jerusalem bage pe man Juda janah pelawesNa kalak e arah lebe-lebeNa nari,+ e me sebapna kerina e terjadi man kalak e. Bas pudi wari, mberontak Sedekia man raja Babilon.+
Cataten i teruh
^ Ntah banci saja “ras kalak si mbangun tembok perlindungen.”
