2 Raja-Raja 25:1-30
25 Bas tahun si pesiwahken pemerentahen Raja Sedekia, bas bulan si pe-10-ken, wari si pe-10-ken bas bulan e, reh Nebukadnesar+ raja Babilon ras kerina pasukenna guna nyerang Jerusalem.+ Erkemah ia i sekeliling kota e janah banna tembok guna ngepung kota e.+
2 Lalap kepungna kota e ngasa tahun si pe-11-ken pemerentahen Raja Sedekia.
3 Bas wari si pesiwahken bulan si peempatken, sanga terjadi kelihen si seh kel parahna+ bas kota e janah lanai lit pangan man rakyat negri e,+
4 iruntuhken me tembok kota e.+ Bas berngi e, sanga kalak Kaldea ngepung kota e, kiamen kerina prajurit arah gerbang si lit i antara tembok erlapis dua i deher taman raja. Raja pe lawes arah Araba,+
5 tapi ayaki prajurit Kaldea ia, janah idat kalak e raja i Gurun Pasir Jeriho, jenari kiamen prajurit-prajuritna nadingken ia.
6 Kenca si e tangkap kalak e raja+ janah ibaba kalak e ia ku raja Babilon i Ripla, jenari ihukum ia.
7 Ibunuh kalak e anak-anak Sedekia si dilaki i lebe-lebena. Kenca si e ipepentang Nebukadnesar mata Sedekia, iketna ia alu rante tembaga, jenari babana ia ku Babilon.+
8 Bas wari pepituken bulan pelimaken, bas tahun pe-19-ken pemerentahen Nebukadnesar raja Babilon, reh Nebusaradan+ ku Jerusalem.+ Nebusaradan e pelayan raja Babilon si jadi kepala pengawal istana.
9 Tutungna rumah Jahwe,+ istana,+ ras kerina rumah si lit i Jerusalem.+ Kerina rumah kalak si penting pe tutungna.+
10 Tembok si lit i sekeliling Jerusalem pe iruntuhken pasuken Kaldea si ikut ras kepala pengawal istana e.+
11 Nebusaradan kepala pengawal istana e naban rakyat si tading denga i kota e, bage pe kalak si erpihak man raja Babilon, ras kerina pendudukna.+
12 Tapi tadingken kepala pengawal istana e rakyat si seh kel serana si lit bas negri e. Banna kalak e erdahin bas kebun anggur bage pe jadi kalak si kerja paksa.+
13 Hancurken kalak Kaldea tiang-tiang tembaga+ si lit bas rumah Jahwe bage pe gereta-gereta+ ras Laut Tembaga+ si lit bas rumah Jahwe, jenari babana tembaga e ku Babilon.+
14 Baba kalak e ka belanga-belanga, sekop-sekop, alat guna mateken sumbu lampu, cangkir-cangkir, ras kerina peralaten si iban arah tembaga nari si ipake bas rumah pertoton.
15 Baba kepala pengawal istana e ka ingan rara ras mangkok-mangkok si iban arah emas+ ras pirak+ murni nari.
16 Tembaga si pake Salomo erban dua tiang, Laut Tembaga, ras gereta-gereta si lit bas rumah Jahwe, lanai tertimbang ban buena.+
17 Lit kira-kira waluh meter* ganjangna tiap tiang.+ Takal tiang e iban arah tembaga nari janah ganjangna sada meter lebih.* Jaring ras hiasen si bentukna bagi buah delima si lit i sekeliling takal tiang e pe iban arah tembaga nari.+ Seri kel duana tiang e.
18 Tangkap kepala pengawal istana e ka Seraya+ eme imam kepala, Sepanya+ eme imam si peduaken, ras telu penjaga pintu.+
19 Tangkapna ka arah kota e nari sekalak pegawai istana si jadi peminpin pasuken, lima penasehat pribadi raja, bage pe sekertaris peminpin pasuken si ngaturken rakyat negri e, ras 60 kalak rakyat biasa si lit i je.
20 Nebusaradan+ kepala pengawal istana e maba kalak e ku raja Babilon i Ripla.+
21 Bunuh raja Babilon kalak e i Ripla bas negri Hamat.+ Bage me kalak Juda itaban arah negrina.+
22 Nebukadnesar raja Babilon ngelantik Gedalya+ anak Ahikam+ kempu Sapan+ guna ngawasi kalak si lit denga i negri Juda.+
23 Sanga kerina peminpin pasuken ras pasukenna megi maka Gedalya enggo ilantik raja Babilon, mis jumpai kalak e Gedalya i Mispa. Kalak e eme Ismael anak Netania, Johanan anak Kareah, Seraya anak Tanhumet kalak Netopa, ras Jahasanya anak Maakat, radu ras pasuken-pasuken kalak e.+
24 Ersumpah Gedalya man kalak e bage pe man pasuken-pasuken kalak e, nina, “Ula kena mbiar jadi budak kalak Kaldea. Tadinglah i negri enda janah layani raja Babilon. Alu bage, labo pagi kena kaden pe.”+
25 Bas bulan si pepituken, reh Ismael+ anak Netania kempu Elisama ras sepuluh dilaki si debanna. Bunuhna Gedalya janah mate Gedalya radu ras kalak Jahudi bage pe kalak Kaldea si lit i Mispa.+ Ismael e keturunen raja.
26 Kenca si e, kerina kalak termasuk peminpin-peminpin pasuken lawes ku Mesir,+ sebap mbiar kalak e man kalak Kaldea.+
27 Bas tahun si pe-37-ken Joyakin+ raja Juda itaban, bas bulan si pe-12-ken, wari si pe-27-ken bas bulan e, Ewil-Merduk raja Babilon si jadi raja bas tahun e mbebasken Joyakin raja Juda arah penjara nari.+
28 Mehuli kel perbahanenna man Joyakin janah berena keduduken si ganjangen asangken kerina raja si ras ia i Babilon.
29 Emaka lanai pake Joyakin paken penjarana, janah lalap ia man i lebe-lebe raja segedang geluhna.
30 Tiap wari, lalap datna pangan arah raja segedang geluhna.
