2 Raja-Raja 3:1-27
3 Jehoram+ anak Ahap jadi raja Israel i Samaria bas tahun pe-18-ken pemerentahen Josapat raja Juda. Lit 12 tahun dekahna Jehoram merentah.
2 Terus lakokenna kai si jahat iakap Jahwe, tapi la bagi bapakna ras mamakna kelekna, sebap hancurkenna tugu si badia Baal si enggo iban bapakna.+
3 Amin gia bage, lakokenna dosa-dosa si seri ras si lakoken kalak Israel, eme dosa si lakoken kalak e perban pengaruh Jerobeam anak Nebat.+ La tadingkenna dosa-dosa e.
4 Mesa raja Moap ngasuhi biri-biri, janah lalap galarina upeti* man raja Israel, eme 100.000 anak biri-biri ras 100.000 biri-biri jantan si lenga ipangkas.
5 Kenca mate Ahap,+ mberontak raja Moap man raja Israel.+
6 Emaka lawes Raja Jehoram arah Samaria nari janah pepulungna pasuken Israel.
7 Kirimna ka pesan man Josapat raja Juda, nina, “Enggo mberontak raja Moap man bangku. Nggit nge kam lawes ras aku erperang ngelawan Moap?” Nina ngaloi, “Banci. Lawes kari aku ras kam,+ ikut ras prajurit-prajuritku bage pe kuda-kudaku.”+
8 Kenca si e nungkun Josapat, “Arah ja kari kita lewat?” Nina, “Arah Taneh Mesawang* Edom.”
9 Lawes raja Israel radu ras raja Juda bage pe raja Edom.+ Kenca pitu wari kalak e erdalan, lanai lit lau man pasuken kalak e bage pe man binatang-binatang si baba kalak e.
10 Nina raja Israel, “Cilaka! Pepulung Jahwe telu raja enda gelah ibereken ku tan Moap saja ngenca!”
11 Emaka nina Josapat, “Lit nge jenda nabi Jahwe? Gelah banci sisungkun Jahwe arah ia.”+ Nina salah sada pelayan raja Israel, “Lit, gelarna Elisa+ anak Sapat, mbarenda ia pelayan Elia.”*+
12 Kenca si e nina Josapat, “Jahwe ngerana arah ia.” Emaka lawes raja Israel ras Josapat bage pe raja Edom ndahisa.
13 Nina Elisa man raja Israel, “Engkai maka dahindu aku?+ Dahilah nabi-nabi bapakndu ras nabi-nabi mamakndu.”+ Tapi nina raja Israel bana, “Lang, enggo pepulung Jahwe telu raja gelah iserahken ku tan Moap.”
14 Nina Elisa, “Ersumpah aku i lebe-lebe Jahwe si nggeluh, Dibata si kulayani* eme penguasa malekat, adi la kin perban Josapat+ raja Juda labo aku nggit ngenen kam, janah la diateku pe kam.+
15 Gundari, baba ku jenda kalak si mainken harpa.”*+ Kenca imainkenna harpa* e, mis reh kesah si badia* Jahwe ku Elisa.+
16 Nina Elisa, “Bagenda nina Jahwe, ‘Ban parik-parik i lembah* enda,
17 sebap nina Jahwe, “Labo kari idah kena angin bage pe udan. Tapi dem kari lembah* e alu lau.+ Kena, asuh-asuhen kena, bage pe binatang-binatang kena si deban minem kari arah je nari.”’
18 Perkara kitik nge enda bas Jahwe,+ janah kalak Moap pe berekenNa kari ku tan kena.+
19 Arus hancurken kena kerina kota si erbenteng+ bage pe kerina kota pilihen. Tabah kerina batang kayu si mejile, tutup kerina mata lau, janah cedai kerina taneh si subur alu batu-batu.”+
20 Paginna erpagi-pagi, bas waktu mpersembahken persembahen pangan,*+ maler lau arah Edom nari janah enggo dem lembah e alu lau.
21 Kerina kalak Moap megi maka telu raja e reh nyerang kalak e, emaka pepulung kalak e kerina dilaki si beluh make senjata, janah erjaga-jaga kalak e i perbatasen.
22 Sanga medak kalak Moap erpagi-pagi, ersinar matawari ku lau e, emaka sanga idah kalak Moap arah sebrang nari, teridah lau e megara bagi dareh.
23 Nina kalak e, “Dareh kap ah! Pasti enggo sibunuhen raja-raja ndai alu pedang. O kalak Moap, ota kita njarah!”+
24 Sanga masuk kalak Moap ku perkemahen Israel, maju pasuken Israel janah serangna kalak Moap, emaka kiamen kalak Moap.+ Terus ayaki pasuken Israel kalak e seh ku Moap, janahna munuhi kalak Moap e.
25 Hancurken pasuken Israel kota-kotana, janah benteri kalak e kerina taneh si subur alu batu, emaka enggo dem taneh e alu batu. Tutup kalak e kerina mata lau+ janah tabahna kerina batang kayu si mejile.+ Dungna tembok kota Kir Hareset+ ngenca si tading, emaka ikepung pasuken Israel kota e, janah serangna alu mbenteri batu make alat si iban arah nali nari,* jenari hancurkenna kota e.
26 Kenca sadar raja Moap maka talu ia bas peperangen e, babana 700 prajuritna si make pedang guna nerobos ku arah raja Edom,+ tapi la kalak e berhasil.
27 Emaka buatna anakna sintua si nandangi nggantiken ia jadi raja janah persembahkenna jadi korban tutungen+ i das tembok. Dungna, kena rawa kel Israel emaka mundur pasuken Israel e janah mulih kalak e ku negrina.
Cataten i teruh
^ Taneh si mbelang si jarang iingani.
^ Ntah “si nuangken lau ku tan Elia.”
^ As. “si i lebe-lebeNa aku tedis.”
^ As. “reh tan.”
^ Harpa eme alat musik si ersenar bagi gitar, tapi bentukna beda.
^ Ntah “babalah pemain musik.”
^ Ntah “alu kalimbawang.”
