2 Raja-Raja 4:1-44
4 Lit sekalak diberu arah keturunen nabi-nabi+ reh ndahi Elisa, nina, “Tuan, dilakiku enggo mate, kam pe tehndu maka lalap ia mbiar man Jahwe.+ Tapi gundari, buat kalak si mereken pinjamen atena duana anakku, ibanna atena jadi budakna.”
2 Emaka nina Elisa man bana, “Kai si banci kusampati? Kai si lit bas rumahndu?” Nina diberu e, “Kai pe la lit bas rumah budakndu enda selain sada botol minak ngenca.”+
3 Kenca si e nina Elisa, “Pinjamlah baskom-baskom si kosong arah kerina tetanggandu. Melala baba.
4 Dung e, masuk kam ras anak-anakndu si dilaki ku rumah janah tutup pintundu. Isi kerina baskom-baskom ndai alu minak, janah pisahken si enggo dem.”
5 Emaka lawes diberu e.
Kenca masuk diberu e ras anak-anakna ku rumah, tutupna pintu. Bereken anak-anakna e baskom-baskom ndai man bana janah terus tuangkenna minak e.+
6 Kenca dem baskom-baskom e, nina diberu e man salah sada anakna, “Buat baskom si deban ku jenda.”+ Tapi nina anakna e, “Enggo keri.” Emaka ngadi minak e maler.+
7 Jenari, dahi diberu e pelayan Dibata si benar e janah katakenna kai si terjadi, emaka nina Elisa, “Dayakenlah minak e janah lunasi utangndu. Sisana banci pakendu guna keperlunndu ras anak-anakndu.”
8 Bas sada wari, lawes Elisa ku Sunem.+ I je lit sekalak diberu si terpandang. Pindoken diberu e kel gelah man Elisa i rumahna.+ Tiap lewat Elisa, singgah ia i je guna man.
9 Nina diberu e man dilakina, “Kalak si rusur ku jenda pasti pelayan si badia arah Dibata.
10 Siban min ruangen si kitik i teruh atap,+ janah sitama i je ingan medem, meja, kursi, ras lampu. Tiap reh ia ku jenda, banci ia tading i je.”+
11 Bas sada wari reh Elisa ku je, janah masuk ia ku bas ruangen si lit i teruh atap e guna tayang.
12 Jenari nina man Gehasi+ pelayanna, “Lebuh lebe diberu arah Sunem e.”+ Emaka lebuh Gehasi diberu e.
13 Nina Elisa man Gehasi, “Sungkun diberu ah ndai, ‘Kai nge si banci sampati kami?+ Lit nge atendu si man pesehenndu man raja+ ntah pe man peminpin pasukenna? Sebap enggo latih kapndu perban kami.’”+ Nina diberu e, “La lit, enggo kuakap aman tading ras keluargaku.”
14 Nina Elisa, “Kai nge si banci silakoken man bana?” Nina Gehasi, “La lit anakna dilaki,+ janah dilakina enggo metua.”
15 Minter kataken Elisa, “Lebuh diberu e.” Emaka lebuhna diberu e, janah tedis diberu e i pintu.
16 Nina Elisa man diberu e, “Tahun si reh bas waktu si bagenda, lahirkenndu sekalak anak dilaki.”+ Tapi nina diberu e, “Ula min kam erbual man budakndu enda Tuanku, kam pelayan Dibata si benar kap.”
17 Tapi hamil diberu e, janah bas tahun si reh pas bas waktu sanga Elisa erjanji man diberu e, lahirkenna sekalak anak dilaki.
18 Reh galangna anak e. Bas sada wari, idahi anak e bapakna. Bapakna sangana ras kalak si rani.
19 Terus katakenna man bapakna, “Andih, mesui takalku!” Emaka suruh bapakna pelayanna, nina, “Taruhken ia ku mamakna.”
20 Ibaba me anak e ku mamakna, janah ampu mamakna ia ngasa ciger, dung e mate anak e.+
21 Kenca si e, baba mamakna ia ku kamar pelayan Dibata si benar e+ janah tamana anakna e das ingan medem. Jenari ndarat ia janah tutupna pintu.
22 Kenca si e lebuhna dilakina janah nina, “Suruhlah sekalak pelayan maba kelede man bangku. Mis ateku lawes ndahi pelayan Dibata si benar, jenari mulih kari aku.”
23 Tapi nina dilakina, “Man kadendu ndahi ia? Sendah labo bulan baru+ ntah pe wari Sabat.” Nina diberu e, “Labo kai pe.”
24 Jenari pasang diberu e pelana ku kelede janah nina man pelayanna, “Meter ban kelede e erdalan. Ula ukuri aku. Ngata kari aku maka kam ngadi.”
25 Lawes diberu e ndahi pelayan Dibata si benar e i Gunung Karmel. Kenca idah pelayan Dibata si benar e ia arah ndauh nari, nina man Gehasi pelayanna, “Nen min ah! Reh diberu arah Sunem nari.
26 Kiamken, jumpai diberu e, sungkuni ia, ‘Sehat nge kam? Dilakindu ras anakndu pe me sehat nge?’” Nina diberu e ngaloisa, “Sehat kami kerina.”
27 Sanga jumpa diberu e ras pelayan Dibata si benar e i gunung, mis jemakna nahe pelayan Dibata si benar e.+ Deheri Gehasi ia janah pelawesna atena, tapi nina pelayan Dibata si benar e, “Pediat ia, sebap sangana ceda kel ukurna, tapi la kuteh kai sebapna, perban lenga kataken Jahwe man bangku.”
28 Nina diberu e, “O Tuanku, lit kin kupindo anak dilaki man bandu? La kin enggo kukataken gelah ula berekenndu arapen si palsu man bangku?”+
29 Mis kataken Elisa man Gehasi, “Iketken jubahndu ku awakndu,+ baba tongkatku, janah lawes kam. Adi jumpa kam ras kalak tengah dalan, ula perkuanken. Janah adi lit si mperkuanken kam, ula aloi. Seh kenca kari kam i jah, tama tongkatku e ku ayo anak e.”
30 Tapi nina diberu e, “Ersumpah aku i lebe-lebe Jahwe si nggeluh bage pe i lebe-lebe kam si nggeluh, maka labo aku lawes adi la kin kam ikut.”+ Emaka ikut Elisa lawes ras ia.
31 Leben Gehasi lawes asangken kalak e. Sanga ia enggo seh, tamana tongkat ndai ku ayo anak e, tapi la lit sora kai pe janah la lit tandana anak e nggeluh.+ Emaka mulihken ia njumpai Elisa, nina, “La medak anak e.”
32 Kenca seh Elisa bas rumah e, anak si enggo mate e ampar i datas ingan medem Elisa.+
33 Masuk Elisa ku bas kamar e janah tutupna pintuna, jenari ertoto ia man Jahwe.+
34 Nangkih ia ku datas ingan medem jenari langkem ia i datas anak e. Tamana babahna i datas babah anak e, matana i datas mata anak e, janah tapak tanna i datas tapak tan anak e. Terus ia langkem i datas anak e, janah mulai melas daging anak e.+
35 Dung e, erdalan Elisa ku jah ku je bas rumah e, kenca si e nangkih ia ku ingan medem janah langkem ka ia ku datas anak e. Kebacihen anak e pitu kali, jenari ibuka anak e matana.+
36 Lebuh Elisa me Gehasi, janah nina, “Lebuh diberu arah Sunem e.” Emaka lebuh Gehasi ia janah reh diberu e. Kenca si e nina Elisa man bana, “Enda, angkip anakndu enda.”+
37 Masuk ia janah sujud ia i nahe Elisa, dung e angkipna anakna e jenari ndarat ia.
38 Sanga seh Elisa i Gilgal, lit kelihen i negri e.+ Kundul keturunen nabi-nabi+ i lebe-lebena, janah nina man pelayanna,+ “Tanggerken sop i kudin si galang guna keturunen nabi-nabi e.”
39 Salah sada arah kalak e lawes ku juma muat gulen-gulen. Lit buatna buah-buahen si kitik si bentukna kibul* arah dukut-dukut nari. Buatina seh ngasa dem jubahna, jenari mulih ia. Potong-potongna buah e janah tamakenna ku bas kudin ndai. Tapi la tehna buah kai e situhuna.
40 Hidangken kalak e me sop e gelah pan kalak e. Tapi kenca pan kalak e, mis kataken kalak e, “O pelayan Dibata si benar, lit kap racun* bas kudin e ndai.” Emaka lanai banci pan kalak e sop e.
41 Nina Elisa, “Baba ku jenda tepung.” Kenca masukkenna tepung e ku bas kudin e, nina, “Hidangken ka man kerina kalak.” Emaka lanai lit racun bas kudin e.+
42 Lit sekalak dilaki si reh arah Baal Salisa,+ janah babana man pelayan Dibata si benar e 20 roti barli+ si iban arah hasil rani si pertama, bage pe sada kantong barli si mbaru.+ Kenca si e, nina Elisa, “Bereken ena man kalak e gelah ipanna.”
43 Tapi nina pelayanna, “Bias kin e man 100 kalak?”+ Nina Elisa, “Bereken saja gelah ipan kalak e, sebap nina Jahwe, ‘Man nge kari kalak e janah lit denga sisana.’”+
44 Ihidangken pangan e, jenari man kalak e janah lit denga sisana,+ bagi si enggo kataken Jahwe.
Cataten i teruh
^ Buah e banci saja bentukna bagi labu. Labu e erbage-bage jenisna. Mungkin si imaksud eme buah gundur, jambe, semangka, cimen, ras si debanna.
^ As. “kematen.”
