2 Raja-Raja 5:1-27
5 Naaman eme peminpin pasuken raja Siria. Ia kalak si terpandang janah penting akap raja, perban arah ia iban Jahwe kalak Siria menang.* Ia pejuang si megegeh, tapi ia kena kusta.*
2 Sanga iserang kalak Siria daerah Israel, lit sekalak diberu si kitik denga si enggo itangkap ras ibaba kalak e, jenari iban ia jadi pelayan diberu Naaman.
3 Nina anak e man diberu Naaman, “Adi nggit tuanku lawes ndahi nabi+ si lit i Samaria, pasti malem banna tuan arah kustana.”+
4 Emaka pesehna* man raja Siria kerna kai si kataken diberu arah Israel si kitik denga e.
5 Nina raja Siria man Naaman, “Laweslah kam gundari! Kukirim kari surat man raja Israel.” Lawes Naaman, babana 342 kilo* pirak, 6.000 logam emas, ras sepuluh uis.
6 Babana surat e man raja Israel si isina, “Radu ras surat enda, kusuruh Naaman ndahi kam gelah pepalemndu ia arah penakit kustana.”
7 Kenca baca raja Israel surat e, rigatkenna uisna janah nina, “Dibata kin aku si banci erban kalak nggeluh ntah pe mate?+ Kirimna dilaki enda ku jenda janah suruhna gelah kupepalem ia arah penakit kustana! Enggo jelas idah kena maka ndarami masalah kap ia e.”
8 Tapi sanga begi Elisa eme pelayan Dibata si benar maka enggo rigatken raja Israel uisna, mis kirimna pesan enda man raja, nina, “Engkai maka rigatkenndu uisndu? Suruh ia reh ndahi aku, gelah tehna maka lit nabi bas Israel.”+
9 Emaka reh Naaman naik kuda-kudana ras gereta-gereta perangna janah tedis ia i lebe-lebe pintu rumah Elisa.
10 Tapi suruh Elisa kalak ngataken man Naaman, “Bersihken dirindu pitu kali+ bas Lau Jordan.+ Malem kari kulitndu janah lanai kam najis.”
11 Megi si e merawa kel Naaman janah lawes atena, nina, “Kuakap ndai reh ia ku darat njumpai aku janah tedis ia i je. Dung e lebuhna gelar Jahwe Dibatana janah gerak-gerakkenna tanna i datas kustaku gelahna malem.
12 La kin jilen Lau Abana ras Lau Parpar si lit i Damaskus+ asangken kerina lau si lit bas Israel? Engkai maka la ku je aku suruhna mbersihken diri janah malem?” Emaka mulih ia arah je nari janah merawa kel ia.
13 Deheri pelayan-pelayanna ia janah nina, “Tuanku,* adi si mesera pe ndai suruh nabi e man bandu, pasti lakokenndu. Gundari mbersihken diri ngenca kam suruhna gelah kam malem.”
14 Emaka lawes ia janah masuk ia ku Lau Jordan pitu kali, bagi si perentahken pelayan Dibata si benar e.+ Kenca si e malem kulitna* janah enggo bagi kulit anak-anak.+ Lanai ia najis.+
15 Kenca si e, mulihken ia ndahi pelayan Dibata si benar e+ ras kerina rombongenna janah tedis ia i lebe-lebe pelayan Dibata si benar e. Nina man bana, “Gundari enggo kuteh maka la lit Dibata i belang-belang doni enda selain bas Israel.+ Emaka aloken hadiah* budakndu enda.”
16 Tapi nina Elisa, “Ersumpah aku i lebe-lebe Jahwe si nggeluh, Dibata si kulayani,* labo aku nggit ngalokenca.”+ Pindona kel gelah aloken Elisa tapi tetap tulak Elisa.
17 Dungna nina Naaman, “Adi bage, pediatlah baba budakndu enda taneh negri enda asa si terbaba dua bagal.* Sebap lanai ate budakndu enda mpersembahken persembahen tutungen ntah pe korban man dibata si apai pe selain man Jahwe.
18 Tapi mbera-mbera ampuni Jahwe budakndu enda kerna si enda: Adi masuk tuanku raja ku ingan ersembah man Rimon guna sujud i je, arus tagangina tanku, emaka aku pe arus ikut sujud bas ingan ersembah man Rimon e. Sanga aku sujud bas ingan ersembah man Rimon e, mbera-mbera ampuni Jahwe budakndu enda.”
19 Megi si e nina Elisa man bana, “Mulihlah alu dame.” Kenca enggo agak ndauh ia lawes,
20 nina Gehasi+ bas ukurna, ‘La nggit tuanku ngaloken hadiah si baba Naaman kalak Siria e.+ Ersumpah aku i lebe-lebe Jahwe si nggeluh, kuayakilah ia gelah kudat sitik bas ia nari.’ Gehasi e pelayan Elisa. Elisa e pelayan Dibata si benar.+
21 Emaka ayaki Gehasi me Naaman. Sanga idah Naaman lit kalak si ngayaki ia, nusur Naaman arah gereta nari janah jumpaina ia, nina, “Me labo lit kai pe?”
22 Nina Gehasi, “Labo lit kai pe. Suruh tuanku ndai aku ngataken man bandu maka e denga kel, reh dua anak perana keturunen nabi-nabi arah daerah pegunungen Eperaim nari. Emaka mindo kel tuanku gelah berekenndu kira-kira 34 kilo* pirak ras dua baju ganti.”+
23 Nina Naaman, “Ndi, buat kira-kira 68 kilo.”* Lalap suruh Naaman gelah buatna,+ janah masukkenna pirak si buena kira-kira 68 kilo e ku dua kantong janah berekenna ka dua baju ganti. Berekenna man dua pelayanna guna mabasa i lebe-lebe Gehasi.
24 Seh kenca Gehasi i Opel,* buat Gehasi barang-barang ndai arah kalak e janah tamana ku rumah. Dung e suruhna kalak e mulih. Kenca lawes kalak e,
25 masuk ia janah tedis ia i deher tuanna. Emaka nina Elisa man bana, “Ja nari kam ndai, Gehasi?” Tapi nina Gehasi, “Labo ku japa pe, Tuan.”+
26 Nina Elisa man bana, “Akapndu kin la kuteh? Ayakindu kalak ah ndai janah nusur ia arah geretana njumpai kam. Gundari kin waktuna ngaloken pirak, uis, kebun saitun, kebun anggur, biri-biri, lembu, budak si dilaki, ntah pe budak si diberu?+
27 Emaka gundari, kam ras keturunenndu kena kusta+ Naaman seh rasa lalap.” Lawes Gehasi arah lebe-lebe Elisa nari, mis ia kena kusta si mbentar bagi salju.+
Cataten i teruh
^ Ntah “selamat.”
^ Ntah “kena penakit kulit.”
^ Mungkin maksudna eme Naaman.
^ As. “Bapakku.”
^ As. “dagingna.”
^ As. “pasu-pasu.”
^ As. “si i lebe-lebeNa aku tedis.”
^ Keturunen kelede jantan ras kuda beruna.
^ Letakna i Samaria, banci jadi bukit ntah pe tembok kota.
