2 Raja-Raja 6:1-33
6 Nina keturunen nabi-nabi+ man Elisa, “Idahndu maka rumah inganta tading e kitiksa.
2 Pediat min kami lawes ku Lau Jordan. Kerina kari kami muat kayu si lit i je, ban kami kari ingan tading i je.” Emaka nina Elisa, “To, laweslah.”
3 Lit sekalak arah kalak ndai ngataken, “Nggit nge kam ikut ras pelayan-pelayanndu enda?” Nina Elisa, “Nggit.”
4 Emaka lawes ia ras kalak e, janah seh kalak e i Lau Jordan. Dung e tabah kalak e batang kayu.
5 Sanga sekalak arah kalak e nabah sada batang kayu, lepas takal kapakna ku lau. Emaka nina, “Cilaka Tuan, kupinjam kap kapak ah ndai!”
6 Nina pelayan Dibata si benar e, “Ku ja kin ndai naktakna?” Emaka tuduhkenna inganna. Kenca si e tektekna sada kayu janah benterkenna ku je, dung e bombang takal kapak ndai.
7 Nina Elisa, “Buat dage to.” Emaka buatna kapak ndai.
8 Bas sada wari, erperang raja Siria ngelawan Israel.+ Arih-arih ia ras pelayan-pelayanna janah katakenna man kalak e i ja kari inganna erkemah ras kalak e.
9 Kenca si e, kirim pelayan Dibata si benar+ berita man raja Israel, nina, “Ula kena lewat arah ingan e, sebap reh kari kalak Siria ku ingan e.”
10 Emaka persingeti raja Israel me kalak si tading bas ingan si kataken pelayan Dibata si benar e. Raja Israel pe terus ipersingeti pelayan Dibata si benar, emaka lalap* la deheri raja ingan e.+
11 Merawa kel raja* Siria, janah pepulungna pelayan-pelayanna, jenari nina man kalak e, “Kataken! Ise arah kita si erpihak ku raja Israel?”
12 Nina sekalak pelayanna, “Labo lit, Tuanku Raja! Elisa nabi Israel si ngatakenca man raja Israel kai si katakenndu bas kamarndu.”+
13 Nina raja Siria, “Darami i ja ia sangana, gelah kusuruh kalak nangkap ia.” Kenca si e, datna laporen maka Elisa sangana i Dotan.+
14 Mis kirimna kuda-kuda, gereta perang, bage pe pasuken si mbelin ku je. Seh kalak e sanga berngi janah kepungna kota e.
15 Paginna, bas erpagi-pagi si lampas, sanga medak pelayan arah pelayan Dibata si benar e, lawes ia ku darat janah idahna enterem pasuken ras kuda-kuda bage pe gereta perang ngepung kota e. Mis kataken pelayan e man Elisa, “Cilaka, Tuan! Uga nari siban e?”
16 Tapi nina, “Ula kam mbiar!+ Teremen si ras kita asangken si ras kalak e.”+
17 Kenca si e ertoto Elisa, nina, “O Jahwe, mindo kel aku, bukaNdu min matana gelah idahna.”+ Mis buka Jahwe mata pelayan e, janah idahna daerah pegunungen i sekeliling Elisa+ dem alu kuda-kuda ras gereta perang si erapi-api.+
18 Sanga reh kalak Siria ndahi Elisa, ertoto Elisa man Jahwe, nina, “Mindo kel aku, ban min kalak e pentang.”+ Emaka pentang kalak e ibanNa, bagi si ipindo Elisa.
19 Nina Elisa man kalak e, “Labo enda dalanna, labo enda kotana. Ikutken aku, gelah kutaruhken kena ku dilaki si darami kena.” Tapi baba Elisa kalak e ku Samaria.+
20 Sanga seh kalak e i Samaria, nina Elisa, “O Jahwe, bukalah mata kalak e gelah banci kalak e ngidah.” Emaka buka Jahwe mata kalak e janah idah kalak e maka kalak e sangana i tengah-tengah kota Samaria.
21 Sanga idah raja Israel kalak e, nina man Elisa, “O Bapakku, arus nge kubunuh kalak e?”
22 Tapi nina, “Bunuhndu nge kalak si tabanndu alu pedangndu ras panahndu? Ula bunuh kalak e. Bereken man kalak e roti ras lau,+ gelah man ras minem kalak e janah mulih ku tuanna.”
23 Emaka ban raja Israel pesta si mbelin man kalak e. Man ras minem kalak e i je. Kenca si e mulih kalak e ku tuanna. Dung e lanai pernah reh kelompok perampok Siria+ ku Israel.
24 Bas pudi wari, pepulung Benhadat raja Siria kerina pasukenna janah lawes kalak e ngepung Samaria.+
25 Perban Samaria ikepung, parah kel kelihen+ i kota e. Sada takal kelede+ ergana 80 logam pirak, janah sitik* kotoren merpati pe ergana 5 logam pirak.
26 Sanga erdalan-dalan raja Israel i datas tembok, serko sekalak diberu man bana, nina, “O Tuanku Raja, sampati kami!”
27 Nina raja njawapsa, “Adi Jahwe pe la sampatiNa kena, uga nge kuban nampati kena? Akap kena kin banci kubere pangan, anggur, ntah pe minak?”
28 Dung e nina raja, “Kai kin masalahna?” Nina diberu e njawapsa, “Nina diberu e man bangku, ‘Bereken anakndu gelah sipan sendah, pagi anakku sipan.’+
29 Emaka belgang kami anakku si dilaki janah pan kami.+ Paginna ningku man bana, ‘Bereken dage anakndu ndai gelah sipan.’ Tapi bunikenna anakna ndai.”
30 Kenca begi raja kata-kata diberu e, mis rigatken raja bajuna.+ Sanga erdalan ia i datas tembok, idah kalak pakena kain guni.
31 Kenca si e nina raja, “Ihukum Dibatalah aku janah tambahiNa hukumen e, adi la kin kuban retap takal Elisa anak Sapat ah ndai bas wari enda!”+
32 Suruh raja Israel kalak leben ndahi Elisa. Sanga si e, Elisa sangana kundul i rumahna ras peminpin-peminpin. Sope seh kalak si suruh raja e, nina Elisa man peminpin-peminpin e, “Isuruh anak pembunuh e+ kalak gelah retapkenna takalku. Sanga reh kari kalak si suruhna e, tutup kenalah pintu janah tahan pintu e. Sebap lit tuanna i pudina.”
33 Sanga ngerana denga Elisa, seh kalak si isuruh e, janah ngerana raja, “Kesusahen enda arah Jahwe nari. Engkai maka arus kutimai penampat Jahwe?”
