2 Raja-Raja 8:1-29
8 Nina Elisa man diberu si anakna pernah pekekena,+ “Enggo kataken Jahwe maka terjadi pagi kelihen bas negri enda+ pitu tahun dekahna. Emaka laweslah kam ras keluargandu. Tadinglah kena jadi kalak asing i ja pe ate kena tading.”
2 Emaka lakoken diberu e bagi si kataken pelayan Dibata si benar e. Lawes ia ras keluargana janah tading kalak e i negri Pilisti+ pitu tahun dekahna.
3 Kenca pitu tahun, mulih diberu e arah negri Pilisti nari. Pindona man raja gelah rumahna ras jumana iulihken man bana.
4 Raja sangana ngerana ras Gehasi, pelayan arah pelayan Dibata si benar, nina, “Ceritaken man bangku kerina si luar biasa si enggo lakoken Elisa.”+
5 Sanga ceritaken Gehasi man raja maka pernah pekeke Elisa kalak mate,+ reh diberu si anakna pernah pekeke Elisa ndai. Ngadap raja atena mindo rumahna ras jumana.+ Mis nina Gehasi, “O Tuanku Raja, enda kap diberu e, janah enda anakna si pekeke Elisa.”
6 Emaka sungkun raja diberu e, janah ceritaken diberu e uga kejadinna. Kenca si e, lebuh raja sekalak pegawai istana janah nina, “Ulihken kerina erta diberu e bage pe kerina hasil jumana, mulai tadingkenna tanehna e ngasa gundari.”
7 Lawes Elisa ku Damaskus.+ Sanga si e Benhadat+ raja Siria sangana sakit. Emaka ilaporken man raja, “Pelayan Dibata si benar+ enggo reh ku jenda.”
8 Emaka nina raja man Hasael,+ “Lawes kam, jumpai pelayan Dibata si benar e.+ Baba hadiah man bana. Pindo gelah sungkunna Jahwe, malem ntah lang kari penakitku enda.”
9 Emaka lawes Hasael ndahi Elisa janah babana hadiah man bana. Hadiahna e eme kerina barang-barang si mejile i Damaskus. Barang e buena asa kai si terbaba 40 unta. Dahina Elisa janah nina, “Budakndu* Benhadat raja Siria, nuruh aku nungkun man bandu malem ntah lang penakitna.”
10 Nina Elisa, “Kataken man bana, pasti ia malem. Tapi situhuna enggo kataken Jahwe man bangku maka pasti ia mate.”+
11 Lalap tatapna Hasael, dungna kuatir Hasael. Kenca si e, ngandung pelayan Dibata si benar e.
12 Emaka nungkun Hasael, “Engkai maka kam ngandung, Tuanku?” Nina ngaloi, “Perban kuteh maka ngeri kel pagi perbahanenndu man kalak Israel.+ Tutungndu pagi kota-kotana si erbenteng, bunuhndu prajurit-prajurit pilihenna alu pedang, pekpekindu pagi anak-anakna ngasa mate, janah rigatkenndu pagi beltek diberu si sangana hamil.”+
13 Nina Hasael, “Budakndu enda biang kap ngenca, la mungkin kulakoken si bage.” Tapi nina Elisa, “Enggo kataken Jahwe man bangku maka jadi raja Siria pagi kam.”+
14 Kenca si e tadingkenna Elisa janah mulih ia ndahi tuanna. Sungkun tuanna ia, “Kai nina Elisa man bandu?” Nina, “Katakenna man bangku, pasti kam malem.”+
15 Paginna buat Hasael selimut, masukkenna ku lau, janah tutupina ayo raja alu selimut e ngasa mate raja e.+ Emaka Hasael si jadi raja nggantiken ia.+
16 Bas tahun pelimaken pemerentahen Jehoram+ anak Ahap raja Israel, Jehoram+ anak Josapat jadi raja i Juda amin gia Josapat jadi raja denga i je.
17 Umur Jehoram 32 tahun sanga ia jadi raja. Waluh tahun dekahna ia merentah i Jerusalem.
18 Ikutkenna perbahanen raja-raja Israel,+ bagi si lakoken keluarga Ahap,+ sebap empoina anak Ahap.+ Lalap lakokenna kai si jahat akap Jahwe.+
19 Tapi la ate Jahwe engkernepken kerajan Juda perban Daud budakNa,+ sebap enggo erjanji Dibata man Daud maka keturunenna+ pagi si lalap jadi raja.*
20 Sanga Jehoram merentah, mberontak kalak Edom ngelawan Juda,+ ban kalak e rajana sendiri.+
21 Emaka lawes Jehoram ku Sair ras kerina gereta perangna. Sanga berngi, maju kalak e janah talukenna kalak Edom si ngepung kalak e bage pe peminpin-peminpin pasuken si ergereta. Emaka kiamen prajurit-prajurit ku kemahna masing-masing.
22 Tapi seh ngasa gundari, Edom terus mberontak ngelawan Juda. Paksa si e, Lipna+ pe mberontak.
23 Cerita si debanna kerna sejarah Jehoram ras kerina si lakokenna, kerinana itulis bas buku sejarah raja-raja Juda.
24 Dungna mate Jehoram janah ikuburken ras nini bulangna i Kota Daud.+ Anakna si nggantiken ia jadi raja eme Ahasia.+
25 Bas tahun pe-12-ken pemerentahen Jehoram anak Ahap raja Israel, Ahasia anak Jehoram raja Juda jadi raja.+
26 Umur Ahasia 22 tahun sanga ia jadi raja, janah lit sada tahun ia merentah i Jerusalem. Gelar mamakna Atalia,+ kempu* Omri+ raja Israel.
27 Ikutken Ahasia kai si lakoken keluarga Ahap.+ Lalap lakokenna kai si jahat menurut Jahwe bagi si lakoken keluarga Ahap, sebap erjabu bapakna ras sekalak diberu arah keluarga Ahap.+
28 Emaka lawes Ahasia ras Jehoram anak Ahap erperang ngelawan Hasael raja Siria bas Ramot i Gileat.+ Tapi luka Jehoram iban kalak Siria.+
29 Emaka mulih Raja Jehoram ku Jesreel+ gelah malem luka-lukana si iban kalak Siria sanga lawanna Hasael raja Siria+ i Rama. Lawes Ahasia anak Jehoram raja Juda ku Jesreel ngenen Jehoram anak Ahap perban sangana ia luka.*
Cataten i teruh
^ As. “Anakndu.”
^ As. “maka lalap berekenNa man bana lampu.”
^ As. “anak.”
^ Ntah “sakit.”
