2 Raja-Raja 9:1-37
9 Lebuh Nabi Elisa sekalak arah keturunen nabi-nabi janah nina man bana, “Iketken uisndu bas awakndu, baba botol enda si isina minak, jenari minter kam lawes ku Ramot i Gileat.+
2 Seh kam kari jah, darami Jehu+ anak Josapat, ia kempu Nimsi. Ia sangana ras peminpin-peminpin si deban, emaka lebuhlah ia, jenari baba ia ku ruangen si arah basna kel.
3 Kenca si e, buatlah botol si isina minak ndai janah tuangken ku takalna, jenari kataken man bana, ‘Bagenda nina Jahwe, “Kulantik kam jadi raja Israel.”’+ Dung e bukandu pintu janah minter kam kiam arah je nari.”
4 Emaka lawes pelayan Nabi Elisa e ku Ramot i Gileat.
5 Kenca seh ia, peminpin-peminpin pasuken sangana kundul i je. Emaka nina pelayan e, “O Tuan peminpin pasuken, lit kubaba berita man bandu.” Emaka nungkun Jehu, “Man peminpin pasuken si apai?” Nina, “Man bandu, Tuan.”
6 Tedis Jehu janah masuk ia ku rumah. Dung e, tuangken pelayan e botol si isina minak ku takalna janah nina pelayan e man bana, “Bagenda nina Jahwe Dibata Israel, ‘Kulantik kam jadi raja umat Jahwe, eme Israel.+
7 Arus bunuhndu keluarga Ahap tuanndu, janah Kubalas Isebel perban bunuhna* nabi-nabiKu bage pe umat Jahwe si debanna.+
8 Kerina keluarga Ahap arus ibunuh. Kubunuh pagi tiap dilaki si lit bas keluarga Ahap, termasuk si mesera ras si lemah bas Israel.+
9 Kuban pagi keluarga Ahap bagi keluarga Jerobeam+ anak Nebat ras keluarga Baasa+ anak Ahia.
10 Kerna Isebel, ipangani biang pagi ia bas juma si lit i Jesreel+ janah la ia ikuburken.’” Kenca si e ibuka pelayan e pintu janah kiam ia.+
11 Kenca mulihken Jehu ku peminpin-peminpin pasuken si debanna, nungkun kalak e man bana, “Me labo lit kai pe? Engkai maka dahi kalak adon ah kam?” Nina njawapsa, “Kena pe teh kena nge uga ia kalakna janah sada pe katana labo masuk akal.”
12 Tapi nina kalak e, “Ula kam erbual! Katakenlah situhuna kai si katakenna.” Kenca si e nina, “Bagenda nina man bangku, janah nina ka, ‘Bagenda nina Jahwe, “Kulantik kam jadi raja Israel.”’”+
13 Megi si e, minter talangi kalak e jubahna masing-masing janah tama kalak e i tangga si nandangi ilewati Jehu.+ Jenari embus kalak e trompet tanduk janah nina, “Jehu enggo jadi raja!”+
14 Kenca si e, ersekongkol Jehu+ anak Josapat kempu Nimsi ngelawan Jehoram.
Jehoram sangana erjaga-jaga bas Ramot i Gileat+ ras pasuken Israel perban Hasael+ raja Siria.
15 Kenca si e, mulih Raja Jehoram ku Jesreel+ guna nambari luka-lukana si iban kalak Siria sanga serangna Hasael raja Siria.+
Nina Jehu, “Adi erpihak kena man bangku, ula sada pe si kiam arah kota janah ngelaporken kerna si e ku Jesreel.”
16 Kenca si e nangkihi Jehu geretana janah lawes ia ku Jesreel, perban Jehoram lit i je. Jehoram sangana tayang perban lukana, Ahasia raja Juda pe sangana i je guna ngenen Jehoram.
17 I Jesreel lit penjaga si tedis i menara, idahna pasuken Jehu reh. Emaka nina penjaga e, “Lit pasuken si reh.” Nina Jehoram, “Suruh sekalak prajurit njumpaisa, janah sungkun, ‘Mehuli nge tujun kena reh?’”
18 Emaka lawes prajurit si erkuda e njumpai Jehu janah nina, “Bagenda nina raja, ‘Mehuli nge tujun kena reh?’” Tapi nina Jehu, “Labo urusenndu e. Ikutken aku arah pudi!”
Ngelapor penjaga, nina, “Enggo jumpai prajurit ndai kalak ah, tapi la ia mulih.”
19 Emaka suruhna ka prajurit si erkuda si peduaken. Kenca jumpa ras kalak e, nina, “Bagenda nina raja, ‘Mehuli nge tujun kena reh?’” Tapi nina Jehu, “Labo urusenndu e. Ikutken aku arah pudi!”
20 Kenca si e, ngelapor penjaga, “Enggo jumpai prajurit ndai kalak ah, tapi la ia mulih, janah cara dilaki si reh maba gereta e bagi Jehu kempu* Nimsi, perban carana maba gereta bagi kalak adon.”
21 Nina Jehoram, “Sikapken gereta!” Emaka isikapken gereta perangna janah lawes Jehoram raja Israel ras Ahasia+ raja Juda alu gereta perangna masing-masing njumpai Jehu. Jumpa kalak e i juma Nabot+ kalak Jesreel.
22 Kenca jumpa Jehoram ras Jehu, nina Jehoram, “Mehuli nge tujunndu reh, Jehu?” Tapi nina Jehu, “Labo mungkin mehuli tujunku adi mamakndu Isebel+ lalap jadi pelacur* janah pakena erbage-bage ilmu sihir.”+
23 Mis iputar Jehoram geretana guna kiam, janah nina man Ahasia, “O Ahasia, enggo itipu kita!”
24 Ibuat Jehu panahna, ipanahna gurung Jehoram, janah tembus ku jantungna. Emaka mate Jehoram bas gereta perangna.
25 Kenca si e nina Jehu man Bidkar ajudanna, “Angkat ia, benterken ku juma Nabot kalak Jesreel.+ Ingetlah, sanga ras-ras kita maba kuda i pudi Ahap bapakna, enggo umumken Jahwe hukumen man bana,+
26 ‘Nina Jahwe, “Nderbih, enggo Kunen Nabot ras anak-anakna si dilaki ibunuh.”+ Nina Jahwe ka, “Pasti Kubalas+ kam bas juma enda ka.”’ Emaka gundari angkatlah ia janah benterken ku juma e, bagi si enggo kataken Jahwe.”+
27 Kenca idah Ahasia+ raja Juda kai si terjadi, kiam ia arah taman si mbelang.* Kenca si e, ayaki Jehu ia janah nina, “Bunuh ka ia!” Emaka serang kalak e ia bas geretana i dalan ku Gur deher Ibleam.+ Tapi terus ia kiam ku Megido, janah mate ia i je.
28 Kenca si e, baba pelayan-pelayanna ia alu gereta ku Jerusalem, janah kuburken kalak e ia bas kuburenna ras nini bulangna i Kota Daud.+
29 Mbarenda, Ahasia+ jadi raja Juda bas tahun pe-11-ken pemerentahen Jehoram anak Ahap.
30 Sanga begi Isebel+ reh Jehu ku Jesreel,+ tamana celak mbiring ku matana, surina bukna, janah nenna ku teruh arah jendela nari.
31 Sanga masuk Jehu arah gerbang nari, nina Isebel, “Ingetndu nge kai si terjadi man Simri, si munuh tuanna?”+
32 Inen Jehu ku datas, ku jendela, janah nina, “Ise si erpihak ku aku? Ise?”+ Minter reh dua ntah telu pegawai istana janah nenna ku teruh.
33 Nina Jehu, “Benterken ia ku teruh!” Emaka benterken kalak e ia ku teruh, darehna engkenai dingding ras kuda-kuda, jenari perjaki kuda-kuda e ia.
34 Masuk Jehu, dung e man ras minem ia. Kenca si e, nina, “Urus mayat diberu si kena sumpah e janah kuburken ia, sebap ia anak raja.”+
35 Tapi sanga kuburken kalak e atena ia, tengkorakna nari ngenca tading i je, ras nahena, bage pe tapak-tapak tanna.+
36 Sanga mulih kalak e janah katakenna man Jehu, nina Jehu, “Enggo terjadi kata-kata Jahwe+ si katakenNa arah Elia kalak Tisbe pelayanNa, nina, ‘Pangani biang pagi daging Isebel bas juma si lit i Jesreel.+
37 Mayat Isebel jadi pupuk pagi i juma bas taneh i Jesreel. Emaka ise pe lanai banci nandai maka ia Isebel.’”
Cataten i teruh
^ Ntah “perban dareh.”
^ As. “anak.”
^ Ntah “lalap nembah berhala.”
^ As. “taman rumah.”
