2 Samuel 1:1-27
1 Kenca mate Saul, kenca enggo mulih Daud arah naluken* kalak Amalek, tading Daud i Siklak+ dua wari dekahna.
2 Bas wari peteluken, reh sekalak dilaki arah perkemahen Saul nari. Uisna enggo irigatken, lit abu bas takalna. Sanga jumpa ia ras Daud, sujud ia man Daud.
3 Sungkun Daud ia, “Ja nari kam?” Nina, “Kiam aku arah perkemahen kalak Israel nari.”
4 Sungkun Daud ka, “Kai kin si terjadi? Ceritaken dage man bangku.” Nina ngaloi, “Kiamen kalak arah peperangen nari, enterem si mate. Saul ras Jonatan anakna pe enggo mate.”+
5 Emaka sungkun Daud ka dilaki si nguda si reh maba berita ndai, “Ja nari tehndu maka Saul ras Jonatan anakna enggo mate?”
6 Nina dilaki si nguda e, “Rembang aku i Gunung Gilboa,+ kuidah Saul sangana tertande ku tombakna. Kuidah ka gereta perang ras prajurit si erkuda si ngayaki ia enggo reh deherna.+
7 Sanga tulihken Saul, idahna aku, lebuhna aku. Emaka ningku, ‘Kai Tuan, enda aku.’
8 Sungkunna aku, ‘Ise kam?’ Ningku, ‘Aku kalak Amalek.’+
9 Nina bangku, ‘Mesui kel kuakap, tapi aku nggeluh denga. Mari ku jenda, bunuh aku.’
10 Emaka kudeheri ia janah kubunuh,+ sebap kuteh maka labo mungkin ia selamat perban parah kel lukana. Kubuat mahkota si lit bas takalna bage pe gelang si lit bas tanna, jenari kubaba man bandu, Tuanku.”
11 Megi si e, rigatken Daud uisna, kerina kalak si lit ras ia pe bage ka banna.
12 Emaka ngandung kalak e, erpuasa+ kalak e seh ngasa berngi perban Saul ras Jonatan anakna, bage pe perban enterem umat Jahwe ras kalak Israel+ si ibunuh alu pedang.
13 Sungkun Daud dilaki si nguda si maba berita ndai, “Ja nari kin asalndu?” Nina, “Aku kalak Amalek, penduduk asing si tading bas Israel.”
14 Nina Daud, “Engkai maka pang kam munuh kalak si pilih Jahwe?”+
15 Emaka lebuh Daud sada anak buahna, nina, “Mari ku jenda, bunuh ia.” Emaka serang anak buah Daud ia alu pedang, dungna mate ia.+
16 Nina Daud man dilaki si nguda ndai, “Kam si ertanggung jawap bas kematenndu, sebap kam si ngakuisa maka enggo bunuhndu kalak si pilih Jahwe.”+
17 Kenca si e, endeken Daud lagu ceda ate* kerna Saul ras anakna Jonatan.+
18 Katakenna ka gelah kalak Juda arus iajari lagu e si erjudul “Busur Panah,” si itulis bas buku Jasar,+ isina:
19 “O Israel, bas ingan-inganndu si meganjang, kalak si mulia enggo mate ibunuh.+
Pejuang-pejuangndu si megegeh enggo mate bas peperangen!
20 Ula ceritaken e i Gat;+Ula umumken e bas dalan-dalan Askelon,Gelah ula meriah akap singuda-nguda si lit bas Pilisti,Gelah ula meriah akap singuda-nguda arah bangsa si la isunat.
21 O kena pegunungen i Gilboa,+Ula min lit embun ntah pe udan si nusur ku kena,Ntah pe juma si ngasilken sumbangen si badia,+Perban perisai* pejuang-pejuang si megegeh enggo najis i je,Janah perisai Saul lanai iminaki.
22 Busur panah Jonatan ras pedang Saul dem alu dareh musuh,Janah tebakna daging* musuh si megegeh,Busur panah ras pedang kalak e la pernah gagal.+
23 Segedang geluhna, Jonatan ras Saul keleng ate kalak janah ngena ate kalak,+Kematen pe la ngasup nirangken kalak e.+
Teren kalak e asangken kuliki,+Gegehen asangken singa.+
24 O singuda-nguda si lit bas Israel, tangisilah Saul,Enggo pakekenna uis si megara ras si mehaga man kena,Enggo hiasina uis kena alu emas.
25 Pejuang-pejuang si megegeh enggo mate bas perang!
Jonatan mate ibunuh bas ingan-inganndu si meganjang!+
26 Ceda kel ateku perban kam, o seninaku Jonatan;Keleng kel ateku kam.+
Kekelengenndu man bangku lebihen asangken kekelengen sekalak diberu.+
27 Pejuang-pejuang si megegeh enggo mate ibunuhJanah senjata perangna pe enggo kernep!”
