2 Samuel 10:1-19
-
Kemenangen nandangi Ammon ras Siria (1-19)
10 Piga-piga waktu kenca si e, mate raja Ammon,+ anakna si nggantiken ia jadi raja eme Hanun.+
2 Nina Daud, “Kucidahken ateku kekelengenku si setia man Hanun anak Nahas, bagi bapakna mbarenda si enggo ncidahken kekelengenna si setia man bangku.” Emaka suruh Daud pelayan-pelayanna ndahi Hanun guna ngapuli ia perban enggo mate bapakna. Tapi sanga seh pelayan-pelayan Daud bas negri kalak Ammon,
3 nina pejabat-pejabat kalak Ammon man Hanun, “O Tuan, kapndu kin guna ngergai bapakndu maka suruh Daud pelayan-pelayanna reh ngapuli kam? La lah jadi mata-mata nge maka suruhna pelayan-pelayanna e reh? La lah perdiatekenna tena kota enda gelah banci talukenna?”
4 Emaka tangkap Hanun pelayan-pelayan Daud e. Cukurna janggut kalak e+ sembelah, potongna uis kalak e seh ngasa awakna nari ngenca. Kenca si e, suruhna kalak e mulih.
5 Sanga ipeseh kerna si e man Daud, mis suruhna kalak njumpai kalak ndai, sebap enggo seh kel melana akap kalak e. Nina raja man kalak e, “Tadinglah kena i Jeriho+ seh ngasa turah ka janggut kena, kenca si e, mulihlah kena.”
6 Sanga teh kalak Ammon maka enggo segat kel ate Daud man kalak Ammon, sewa kalak e kalak Siria si tading i Betrehop+ bage pe si tading i Soba,+ lit 20.000 prajurit si erdalan si sewa kalak e. Sewa kalak e ka 12.000 prajurit arah Tob nari.+ Selain si e, upahi kalak e raja Maaka+ ras 1.000 prajuritna.
7 Sanga begi Daud kerna si e, utusna Joap ras kerina pasukenna, bage pe pejuang-pejuangna si megegehna.+
8 Emaka ban kalak Ammon barisen perang i dalan masuk ku gerbang kota. Tapi kalak Siria arah Soba ras arah Rehop, kalak Tob, bage pe Maaka lit bas taneh si mbelang.
9 Sanga idah Joap maka reh serangen arah lebe nari bage pe arah pudi nari, pilihna piga-piga prajurit Israel si hebatna, tamana kalak e bas barisen perang guna nyerang kalak Siria.+
10 Prajurit si debanna ipinpin Abisai,+ eme senina Joap. Suruh Joap ia ngaturken barisen perang guna nyerang kalak Ammon.+
11 Nina Joap, “Adi gegehen kalak Siria asangken aku, arus kam reh nelamatken aku. Tapi adi gegehen kalak Ammon asangken kam, reh aku nelamatken kam.
12 Arus kita megegeh ras perpang+ guna bangsata bage pe guna kota-kota Dibatata, lakoken Jahwe kari kai si mehuli akapNa.”+
13 Maju Joap ras pasukenna nyerang kalak Siria, dungna kiamen kalak Siria e.+
14 Sanga idah kalak Ammon enggo kiamen kalak Siria, kiam ka kalak e arah Abisai, senina Joap. Jenari masuk kalak e ku bas kota. Kenca serang Joap kalak Ammon, mulih ia ku Jerusalem.
15 Sanga teh kalak Siria maka ia enggo taluken Israel, pulung kalak e mulihi.+
16 Lebuh Hadadeser+ kalak Siria si lit i daerah Lau.*+ Emaka reh kalak e ku Helam. Si minpinsa eme Sobah, kepala pasuken Hadadeser.
17 Sanga begi Daud kerna si e, mis pepulungna kerina pasuken Israel. Sebrangi kalak e Lau Jordan, seh kalak e i Helam. Kenca si e, aturken kalak Siria barisen perangna i je guna nyerang Daud.+
18 Tapi kiamen kalak Siria arah pasuken Israel nari. Bunuh Daud 700 prajurit Siria si ergereta, ras 40.000 si erkuda. Serangna ka Sobah peminpin kalak e, mate me Sobah i je.+
19 Sanga kerina raja e, eme pelayan-pelayan Hadadeser enggo sadar maka kalak e enggo taluken Israel, mis kalak e erdame ras Israel janah patuh man Israel.+ Kalak Siria pe lanai pang nampati kalak Ammon.
Cataten i teruh
^ Eme daerah Lau Eprat.
