2 Samuel 12:1-31
12 Suruh Jahwe me Natan+ njumpai Daud. Emaka dahi Natan me Daud,+ nina, “Lit dua dilaki si tading bas sada kota. Sada bayak, sada nari mesera.
2 Dilaki si bayak e melala kel biri-birina ras lembuna.+
3 Tapi dilaki si mesera e kadena pe la lit, selain sada anak biri-biri si tukurna, biri-birina e beruna.+ Asuhi dilaki si mesera e anak biri-biri e, reh galangna anak biri-biri e i rumahna ras anak-anakna si dilaki. Amin gia sitik ngenca pangan dilaki e, berena deba man anak biri-biri e. Biri-biri e pe minem arah cangkirna, medem biri-biri e bas ampunna. Anak biri-biri e enggo anggapna bagi anakna si diberu.
4 Bas sada wari, reh tamu kalak bayak ndai. La ia nggit muat lembuna ntah pe biri-birina guna ihidangken man tamuna. Tapi buatna biri-biri dilaki si mesera ndai, tanggerkenna man tamuna.”+
5 Megi si e, merawa kel Daud kerna dilaki si bayak e, nina man Natan, “Ersumpah aku i lebe-lebe Jahwe si nggeluh,+ dilaki si bayak e patut mate!
6 Arus ka galarina ganti rugi biri-biri e empat kali lipat,+ sebap arah perbahanenna e teridah la lit perkuah atena.”
7 Kenca si e nina Natan man Daud, “Kam kap dilaki e! Bagenda nina Jahwe Dibata Israel, ‘Aku kap si milih kam jadi raja Israel,+ Kuselamatken kam arah tan Saul nari.+
8 Enggo Kubereken keluarga tuanndu+ ras diberu-diberuna man bandu,+ Kuban kam jadi raja bas Israel bage pe i Juda.+ Adi e pe lenga kapndu bias, Kubereken denga ka pagi terbuen.+
9 Engkai maka hinandu Jahwe* alu ngelakoken kai si jahat kapNa? Bunuhndu Uria kalak Het alu pedang!+ Kenca bunuhndu ia alu pedang kalak Ammon,+ buatndu ka diberuna.+
10 Emaka lalap pagi lit bencana* bas keluargandu,+ perban enggo hinandu Aku alu muat diberu Uria kalak Het e jadi diberundu.’
11 Bagenda nina Jahwe, ‘Kuban pagi bencana terjadi man bandu, bencana e rehna arah keluargandu.+ I lebe-lebe matandu, Kubuat pagi diberu-diberundu janah Kubereken man dilaki si deban.+ Pedemi dilaki e pagi diberu-diberundu janah kerina kalak ngidahsa.*+
12 Kulakoken pagi e terang-terangen* i lebe-lebe kerina kalak Israel, amin pe sange erbuni-buni kam ngelakoken dosa.’”+
13 Kenca si e, nina Daud man Natan, “Enggo erdosa aku man Jahwe.”+ Nina Natan, “Enggo ampuni Jahwe kam.+ Emaka labo kam mate.+
14 Tapi arah perbahanenndu e enggo hinandu kel Jahwe, emaka anakndu si dilaki si mbaru lahir e pasti pagi mate.”
15 Kenca si e, mulih Natan ku rumahna.
Ban Jahwe sakit anak Daud si lahirken diberu Uria e.
16 Mindo kel Daud man Dibata si benar guna kepentingen anak e. Puasa Daud, masuk ia ku kamarna, medem ia bas lante segedang berngi e.+
17 Reh peminpin-peminpin keluargana, tedis kalak e i deherna janah usahaken kalak e ngangkat ia arah lante nari, tapi la ia nggit tedis, la ia nggit man ras kalak e.
18 Bas wari si pepituken, mate anak e. Tapi mbiar pelayan-pelayan Daud ngatakenca man bana maka anak e enggo mate. Nina kalak e, “Sanga nggeluh denga pe anak e, la ia nggit megiken kita ngerana. Uga nge ninta ngatakenca man bana maka anak e enggo mate? Banci kari lakokenna si la mehuli.”
19 Sanga idah Daud pelayan-pelayanna erkusik-kusik, iteh Daud maka anak e enggo mate. Sungkun Daud pelayan-pelayanna, “Enggo mate anak e?” Nina kalak e, “Ue, enggo mate.”
20 Emaka keke Daud, ridi ia, minakina dagingna,+ gantina uisna, kenca si e lawes ia ku rumah+ Jahwe janah sujud ia. Dung e lawes ia ku istanana, suruhna kalak maba pangan, jenari man ia.
21 Nungkun pelayan-pelayanna man bana, “Engkai maka bage banndu, Tuan? Sanga nggeluh denga anak e, puasa kam, lalap kam ngandung. Tapi kenca mate ia, mis kam keke janah man.”
22 Nina Daud, “Sanga anak e nggeluh denga, puasa aku+ janah lalap aku ngandung perban kuakap banci saja mekuah ate Jahwe aku, janah pediatNa anak e nggeluh.+
23 Gundari anak e enggo mate. Man kadeku nari puasa? Banci kin kuban ia nggeluh mulihi?+ Aku pe mate ka nge pagi bagi ia,+ tapi ia la banci mulihken man bangku.”+
24 Kenca si e, apuli Daud diberuna Batseba.+ Dahi Daud ia janah medem ia ras. Bas pudi wari, lahirken Batseba anak dilaki, gelarna eme Salomo.*+ Ngena ate Jahwe anak e,+
25 janah suruhNa Nabi Natan+ erban gelar anak e Jedidah,* sebap keleng ate Jahwe ia.
26 Joap terus erperang ngelawan Raba+ eme kota kalak Ammon+ janah rebutna kota kerajan e.+
27 Emaka suruh Joap kalak si maba berita ndahi Daud, nina, “Aku enggo erperang ngelawan Raba,+ enggo kurebut kota lau.*
28 Pepulunglah prajurit si lit denga, kepunglah kota e gelah rebutndu. Adi lang, aku pagi si ngerebutsa, janah aku pagi si ipuji kerna si e.”*
29 Emaka pepulung Daud kerina prajuritna guna lawes erperang ngelawan Raba janah rebutna kota e.
30 Kenca si e buat Daud mahkota si lit bas takal Milkom janah pakena. Mahkota emas e beratna kira-kira 34 kilo,* lit batu-batu si merga bas mahkota e. Melala kel jarahen+ si buatna arah kota e nari.+
31 Babana kerina penduduk kota e ndarat arah kota e nari. Suruhna kalak e erdahin, lit si erdahin nggergaji batu, lit ka si erdahin make peralaten besi si ntelap, lit si erdahin make kapak besi, bage pe erban batu bata. Bage me si lakoken Daud man kerina kota kalak Ammon. Dungna mulih Daud ras kerina pasukenna ku Jerusalem.
Cataten i teruh
^ As. “kata Jahwe.”
^ As. “pedang.”
^ As. “diberundu i teruh matawari.”
^ As. “i teruh matawari.”
^ Arah bahasa Heber si ertina “Dame.”
^ Ertina “Si Ikelengi Jahwe.”
^ Mungkin maksudna eme sumber lau kota e.
^ As. “janah kota e kari igelari make gelarku.”
