2 Samuel 13:1-39
13 Absalom anak Daud lit turangna, mejile turangna e, gelarna Tamar,+ janah Amnon+ anak Daud ngena tena Tamar.
2 Tamar e singuda-nguda denga, kai pe la banci lakoken Amnon man bana. Perban turangna e, latih kel ukur Amnon, dungna sakit ia.
3 Lit teman Amnon si seh kel beluhna, gelarna Jonadap.+ Jonadap e anak Simeah+ senina Daud.
4 Emaka nina Jonadap man Amnon, “Anak raja kap kam, engkai maka berjut ayondu tiap erpagi-pagi? Ceritakenndu min bangku.” Ngaloi Amnon, “Ngena teku Tamar, turang+ arah seninaku Absalom.”
5 Nina Jonadap, “Ban-banndulah sakit janah medem kam bas ingan medemndu. Sanga reh pagi bapakndu ngenen kam, nindulah man bana, ‘Suruhndu min turangku Tamar reh nikapken pangan man bangku. Adi sikapkenna pangan si iban man kalak sakit, kupan pagi e arah tanna.’”
6 Emaka ban-ban Amnon sakit janah medem ia, jenari reh raja ngenen ia. Emaka nina Amnon man raja, “Suruh min Tamar reh ku jenda gelah banna dua roti i lebe-lebeku. Jenari kupan pagi e arah tanna.”
7 Megi si e, suruh Daud kalak ndahi Tamar si sangana i rumah guna ngataken, “Laweslah kam ku rumah turangndu Amnon, ban pangan man bana.”
8 Emaka lawes Tamar ku rumah Amnon, dapetina Amnon sangana tayang i rumahna. Buat Tamar tepung, adukna, janah banna jadi roti i lebe-lebe Amnon, jenari panggangna.
9 Emaka buat Tamar roti e, hidangkenna man Amnon. Tapi la nggit Amnon manca, nina, “Ndarat kena kerina!” Emaka ndarat kerina kalak e.
10 Nina Amnon man Tamar, “Babalah pangan e ku kamar, gelah kupan arah tanndu nari.” Emaka buat Tamar roti si enggo banna janah babana e man turangna Amnon ku kamarna.
11 Sanga baba Tamar roti e gelah ipan Amnon, tagangi Amnon ia, nina, “Mari, raslah kita medem.”
12 Tapi nina Tamar, “Ula, Bang! Ula banndu aku mela, sebap si bage labo pernah terjadi bas Israel.+ Ula lakokenndu perbahanen si erban mela enda.+
13 Uga naring pagi kuban, lanai tanggung kuakap melana. Kam pe pagi ipeseri ras kalak si la rorat si lit bas Israel. Ngeranalah kam man raja kerna aku, pasti pagi berekenna si pindondu.”
14 Tapi la nggit Amnon megiken ia. Perban gegehen Amnon asangken Tamar, emaka perkosana Tamar.
15 Kenca si e, segat kel ate Amnon man Tamar. Belinen segat atena man Tamar asangken atena ngenana sange. Emaka nina Amnon man bana, “Kekeken. Lawes ko jenda nari!”
16 Megi si e, nina Tamar, “Ula bage, Bang! Adi pelawesndu aku, jahaten e asangken kai si mbaru denga lakokenndu man bangku!” Tapi la ia nggit megiken Tamar.
17 Lebuhna pelayanna si nguda denga, nina, “Baba diberu enda ndarat jenda nari. Kenca e, kunci pintu ena.”
18 Baba pelayan e Tamar ndarat, janah kuncina pintu. Sanga si e, pake Tamar baju khusus* si biasa ipake anak raja si singuda-nguda denga.
19 Jenari itama Tamar abu ku takalna,+ rigatkenna baju khusus si pakena ndai. Tamana duana tanna ku das takalna, janahna erdalan ngandung kel ia.
20 Sungkun turangna Absalom+ ia, “Amnon nge si erban si la mehuli e man bandu? Ula kataken man ise pe, sebap ia turangndu.+ Ula nai ukurindu kerna si e.” Emaka tading Tamar i rumah turangna Absalom, pisah ras kalak si deban.
21 Sanga begi Raja Daud kerna si e kerina, merawa kel ia.+ Tapi la tena erban kitik ukur Amnon anakna sebap keleng kel tena ia, perban Amnon e kap anakna sintua.
22 Tapi kai pe la lit ikataken Absalom man Amnon, la soal si mehuli ntah lang. Sebap segat kel tena Amnon,+ perban enggo permelaken Amnon turang Absalom eme Tamar.+
23 Dua tahun kenca si e, gunting Absalom mbulu biri-birina i Baal Hazor si lit i deher Eperaim,+ undang Absalom kerina anak raja si dilaki.+
24 Emaka dahi Absalom raja, nina, “O Raja, aku sangana nggunting mbulu biri-biriku. Ateku ikut min kam bage pe pelayan-pelayanndu lawes ras aku.”
25 Tapi nina raja man Absalom, “Ula bage, Nakku. Adi kerina pagi kami lawes, mberatsa pagi kapndu.” Amin gia lalap Absalom mindo man raja, la nggit raja lawes, tapi pasu-pasu raja ia.
26 Kenca si e nina Absalom, “Adi la kam banci ikut, suruhlah seninaku Amnon ikut ras kami.”+ Nina raja ngaloi, “Engkai maka arus ia ikut?”
27 Tapi lalap Absalom mindo man raja, emaka suruh raja me Amnon ras kerina anak-anak raja si dilaki ikut ras Absalom.
28 Kenca si e nina Absalom man pelayan-pelayanna, “Perdiateken kenalah pagi Amnon. Kenca enggo inemna pagi anggur janah meriah ukurna, kukataken pagi man kena, ‘Serang Amnon!’ Emaka arus bunuh kena ia. Ula kena mbiar, sebap aku si merentahkenca. Petetaplah ukur kena, ula kena sangsi.”
29 Emaka lakoken pelayan-pelayan Absalom man Amnon tepat bagi si perentahken Absalom. Kenca si e, lawes kerina anak-anak raja si dilaki, kiam kalak e, masing-masing kalak e nangkih bagal.*
30 Sanga kalak e bas perdalanen denga, lit si ngataken man Daud, “O Raja, enggo bunuh Absalom kerina anak-anakndu si dilaki, la lit si selamat.”
31 Megi si e, rigatken raja uisna, pedemkenna bana bas lante. Kerina pelayan raja si tedis i deherna pe rigatken kalak e uisna.
32 Tapi ngerana Jonadap+ anak Simeah+ senina Daud, “O Raja, ula kapndu kerina anakndu si dilaki enggo mate, Amnon ngenca si mate.+ Si e terjadi perban perentah Absalom, enggo rencanakenna si e+ mulai kin sanga permelaken Amnon turang Absalom+ eme Tamar.+
33 Emaka ula min kam tek man berita si ngataken, ‘Kerina anak raja si dilaki enggo mate,’ sebap Amnon ngenca si mate.”
34 Sanga si e, Absalom enggo kiam.+ Kenca si e, inen sekalak penjaga kota maka melala kalak reh arah dalan si lit i samping gunung.
35 Emaka nina Jonadap+ man raja, “O Raja, ah anak-anakndu si dilaki enggo mulih, pas bagi si kukataken ndai.”
36 Dung kenca Jonadap ngerana, masuk anak-anak raja si dilaki janahna serko. Raja ras kerina pelayan-pelayanna pe ngandung perban sedih kel akap kalak e.
37 Tiap wari Daud erceda ate perban Amnon anakna. Tapi Absalom kiam ndahi raja Gesur eme Talmai+ anak Amihut.
38 Kenca kiam Absalom ku Gesur,+ tading ia i je telu tahun dekahna.
39 Dungna tedeh ate Raja Daud man Absalom sebap lanai ceda atena perban kematen Amnon.
