2 Samuel 14:1-33
14 Iteh Joap anak Seruya+ maka enggo tedeh kel ate raja man Absalom.+
2 Emaka lebuh Joap sekalak diberu si pentar, si tading i Tekoa,+ nina, “Ban-banndulah erceda ate, pakelah baju tanda erceda ate, ula minakindu dagingndu.+ Ban tempa-tempa enggo ndekah kam erceda ate.
3 Kenca si e, dahilah raja, janah katakenlah bagenda.” Kataken Joap man bana kai si arus katakenna.
4 Idahi diberu si arah Tekoa e raja, sujud ia, nina, “O Raja, sampati min aku!”
5 Nina raja man bana, “Kai kin si terjadi?” Ngaloi diberu e, “Bagenda Raja, aku enggo janda. Dilakiku enggo mate.
6 Lit dua anakku dilaki, rubati kalak e i juma-juma ah. Perban la lit si naroisa, mate sada anakku e ibunuh seninana.
7 Kerina keluargaku gundari enggo ngelawan budakndu enda, nina kalak e, ‘Serahkenlah anakndu si enggo munuh seninana e. Amin gia ia si jadi ahli waris, bunuh kami ate kami ia sebap enggo bunuhna seninana!’+ Bunuh kalak e tena anakku si nggeluh denga e. Ia nari ngenca arapenku. Adi surung kin ban kalak e bage, masapken kalak e gelar dilakiku bage pe keturunenna arah doni enda nari.”
8 Emaka nina raja man diberu e, “Mulihlah kam ku rumahndu. Aku pagi si ngurussa masalah e.”
9 Megi si e, nina diberu si arah Tekoa e man raja, “O Tuanku Raja, aku ras keluarga bapakkulah si nanggung dosana, labo kam bage pe keturunenndu si nanggung dosana.”
10 Nina raja man bana, “Adi lit denga pagi kalak si ncakapken si e bandu, baba saja ia ku jenda. Pasti lanai pagi kam gangguna.”
11 Tapi nina diberu e, “Mindo aku man bandu o Raja, lalap min ingetndu Jahwe Dibatandu, gelah kalak si lit hakna guna munuh+ anakku perban kai si enggo lakokenna, la surung munuh anakku.” Emaka nina raja, “Ersumpah aku i lebe-lebe Jahwe si nggeluh,+ sada pe arah buk anakndu e labo pagi ndabuh ku taneh.”
12 Nina diberu e ka, “O Raja, banci denga nge aku ngerana? Lit sitik nari si teku kupeseh man bandu.” Nina raja, “Katakenlah.”
13 Nina diberu e man raja, “Engkai maka lakokenndu kai si banci erban umat Dibata cilaka?+ Alu kata-katandu ndai, banndu dirindu ersalah Raja, sebap kam si enggo erban anakndu terbuang janah la pediatndu ia mulih man bandu.+
14 Kita pasti mate, bagi lau si iamburken ku taneh si lanai banci ipepulung mulihi. Dibata labo pernah buatNa kesah jelma, tapi ukuriNa kai saja alasen si banci erban kalak si terbuang ialoken mulihi.
15 Reh aku ku jenda guna ngataken si enda, Tuanku Raja, perban enggo mbiar aku ban kalak. Emaka ningku, ‘Ngeranalah aku man raja, ntah berekenna pagi kai si pindo budakna.
16 Mbera-mbera begiken raja aku janah selamatkenna aku ras anakku si sada e, sebap lit kalak si tena erban kami la ndatken warisen si bereken Dibata.’+
17 Kenca si e rukur ka budakndu enda, ‘Mbera-mbera kata-kata tuanku raja erban aku tenang,’ sebap kam Tuanku Raja, bali ras malekat Dibata si benar si banci mbedaken si mehuli ras si jahat. Mbera-mbera Jahwe Dibatandu lit ras kam.”
18 Nina raja man diberu e, “Lit teku si kusungkun man bandu. Ula buniken kai pe, katakenlah situhuna.” Ngaloi diberu e, “Ue, Tuan.”
19 Sungkun raja ia, “Joap si nuruh kam ngelakoken si enda kerina?”+ Nina diberu e, “Ersumpah aku i lebe-lebendu o Raja, Tuanku si nggeluh, payo bagi si katakenndu e, sebap pelayanndu Joap si nuruh aku, ia si ngajari aku kerna kai si arus kukataken.
20 Si e ilakoken Joap gelah ubahndu carandu rukur kerna masalah enda. Sebap kam pentar bali ras malekat Dibata si benar, tehndu kerina si terjadi bas negri enda.”
21 Nina raja man Joap, “Ue yah, banci kulakoken.+ Legi Absalom, baba ia mulih.”+
22 Megi si e sujud Joap janah pujina raja. Nina Joap, “Gundari enggo iteh pelayanndu enda maka jadi tendu aku, o Tuanku Raja. Sebap begikenndu pemindon pelayanndu enda.”
23 Emaka lawes Joap ku Gesur,+ babana Absalom ku Jerusalem.
24 Tapi nina raja, “Suruh Absalom mulih ku rumahna, la banci jumpaina aku.” Emaka mulih Absalom ku rumahna, la jumpaina raja.
25 I belang-belang Israel la lit sekalak pe bagi Absalom gantengna. Mulai tapak-tapak nahena nari seh ku ujung buk takalna, la lit si man pandangen.
26 Tiap akhir tahun arus potongna bukna perban beratna kapna. Tiap potongna bukna, berat bukna e lit kira-kira dua kilo* menurut timbangen raja.*
27 Lit telu anak Absalom dilaki,+ janah lit sada anakna diberu, gelarna Tamar. Tamar e seh kel jilena.
28 Dua tahun dekahna Absalom tading i Jerusalem, tapi la ia pernah jumpa ras raja.+
29 Emaka lebuh Absalom me Joap sebap suruhna tena Joap njumpai raja, tapi la nggit Joap reh. Kenca si e, lebuhna ka Joap pedua kaliken, tapi tetap denga Joap la nggit reh.
30 Emaka nina Absalom man pelayan-pelayanna, “Tutung kenalah barli si lit bas juma Joap si lit i sebelah jumaku.” Emaka tutung pelayan-pelayan Absalom jumana e.
31 Perban si e, reh Joap ku rumah Absalom, nina, “Engkai maka tutung pelayan-pelayanndu jumaku?”
32 Ngaloi Absalom, “Enggo kukirim pesan man bandu gelah reh kam ndahi aku, sebap kusuruh teku kam ndahi raja gelah pesehndu penungkunenku enda man raja, ‘Engkai maka babana aku mulih arah Gesur nari?+ Padin aku tetap tading i jah. Emaka berena min aku njumpai ia. Adi lit kin salahku, bunuhna saja aku.’”
33 Emaka lawes Joap ndahi raja, janah pesehna pesan e. Kenca si e, lebuh raja me Absalom jenari reh Absalom, sujud ia i lebe-lebe raja. Kenca e, emana Absalom.+
Cataten i teruh
^ Mungkin si imaksud eme timbangen si ipake bas istana, ntah banci saja timbangen si lit bas istana si la seri ras si biasa ipake kalak.
