2 Samuel 15:1-37
15 Kenca terjadi si e kerina, sikapken Absalom sada gereta bage pe kuda-kudana, suruhna 50 dilaki kiam i lebe-lebena.+
2 Tiap erpagi-pagi, lampas Absalom medak, tedis ia i pinggir dalan si nuju ku gerbang kota.+ Adi lit kalak si reh si tena ngaduken perkarana man raja,+ lebuh Absalom kalak e, nina, “Kam ja nari?” Nina kalak e, “Budakndu enda reh arah salah sada suku Israel.”
3 Nina Absalom, “Si ituntutndu e benar janah mehuli, tapi labo pagi lit pejabat raja si nggit megiken perkarandu e.”
4 Nina Absalom ka, “Adi aku min ndai si ipilih jadi hakim bas negri enda, kerina kalak si tena ngaduken perkarana banci reh ndahi aku, kupastiken gelah datna keadilen.”
5 Adi lit kalak si reh janah sujud tena man Absalom, mis dudurkenna tanna, jemakna kalak e, janah emana.+
6 E me si lakoken Absalom man kerina kalak Israel si reh guna mindo keadilen man raja. Bage me si terus lakoken Absalom guna muat ukur kalak Israel.+
7 Kenca empat tahun,* nina Absalom man raja, “Berelah aku lawes ku Hebron+ guna nepati janji si enggo kuban man Jahwe.
8 Sebap sanga tading aku i Gesur+ i Siria, erjanji aku,+ ‘Adi baba Jahwe aku mulih ku Jerusalem, kubereken pagi persembahenku man Jahwe.’”
9 Emaka nina raja, “Laweslah kam alu dame.” Emaka lawes Absalom ku Hebron.
10 Kenca si e suruh Absalom mata-mata lawes ku kerina suku Israel, nina man kalak e, “Sanga begi kena pagi sora trompet, umumkenlah, ‘Absalom enggo jadi raja i Hebron!’”+
11 Lit 200 kalak arah Jerusalem nari si ikut ras Absalom ku Hebron. Kalak e iundang janah sitik pe la kalak e curiga, la teh kalak e kai si sangana terjadi.
12 Sanga persembahken Absalom korban, lebuhna Ahitopel+ kalak Gilo eme penasehat Daud+ si sangana i kotana eme Gilo.+ Rencana guna ngelawan raja reh mantapna janah reh teremna kalak si ndukung Absalom.+
13 Dungna lit si ngelapor man Daud, nina, “Kalak Israel enggo ndukung Absalom.”
14 Mis kataken Daud man kerina pelayan-pelayanna si lit ras ia i Jerusalem, “Ota, kiam kita,+ labo pagi lit sada pe arah kita si selamat arah Absalom nari! Pedasken, gelah ula sempat kita datna janah cilakaina kita ras serangna kota enda alu pedang!”+
15 Nina pelayan e man raja, “Kai pe si putuskenndu Tuanku Raja, nggit kami ngelakokenca.”+
16 Emaka lawes raja ras kerina si lit bas rumahna, tapi tadingkenna sepuluh gundikna*+ ngurus istana.
17 Jenari terusken raja perdalanenna radu ras kerina kalak si ikut ras ia, janah ngadi kalak e i Bet-Merhak.
18 Pereksa raja kerina pelayanna si ikut ras ia, termasuk kerina pengawal pribadina*+ bage pe 600 kalak Gat+ si enggo ikut ras raja arah Gat nari.+ Kerina kalak e lewat i lebe-lebe raja.
19 Emaka nina raja man Itai+ kalak Gat e, “Engkai ka maka arus kam ikut ras kami? Mulihlah kam, tadinglah kam ras raja si mbaru, sebap kam kalak asing janah la kam banci mulih ku inganndu.
20 Mbaru denga kam reh, emaka labo mungkin bas wari enda ikut kam ku jah ku jenda ras kami, sebap aku pe labo kuteh ndigan aku lawes janah ku ja perlawesku. Mulihlah kam, baba senina-seninandu e. Mbera-mbera terus cidahken Jahwe kekelengenNa si setia bage pe kesetianNa man bandu!”+
21 Tapi nina Itai man raja, “Ersumpah aku i lebe-lebe Jahwe si nggeluh bage pe i lebe-lebendu Tuanku Raja si nggeluh, ku japa pe kam pagi lawes ku je ka nge budakndu enda. Enggo siap aku mate ras kam, Raja!”+
22 Megi si e nina Daud man Itai,+ “Adi bage, nyebranglah kam.” Emaka nyebrang Itai kalak Gat e ras kerina anak-anakna bage pe anak buahna.
23 Sanga nyebrang kerina kalak si ikut ras Raja Daud, megang kel ngandung kerina penduduk Jerusalem bage pe kalak si lit i daerah sekelilingna. Sanga si e raja sangana tedis i deher Lembah Kidron.+ Kerina kalak si ikut ras raja nyebrang ku dalan si nuju ku taneh mesawang.*
24 Sadok+ bage pe kerina kalak Lewi+ si ngangkat Peti Perjanjin*+ Dibata si benar lit i je,+ amparken kalak e Peti e. Abiatar+ pe tetap i je seh asa dung kerina kalak si nadingken kota nyebrangi lembah e.
25 Tapi nina raja man Sadok, “Babalah mulih Peti Perjanjin Dibata si benar e ku kota.+ Adi jadi kin ate Jahwe aku, babaNa nge pagi aku mulih, janah pediatNa kunen Peti e bage pe ingan Peti e isimpan.+
26 Tapi adi la kin jadi ate Dibata man bangku, kualoken pagi kerina si lakokenNa man bangku.”
27 Nina raja ka man Imam Sadok, “La kin kam kalak si lit pengenehenenna* e?+ Mulihlah kam ras Abiatar ku kota alu dame, babalah anakndu Ahimas ras Jonatan+ anak Abiatar.
28 Kutimai pagi berita arah kena arah ingan nyebrang Lau Jordan si lit i deher taneh mesawang.”*+
29 Emaka baba Sadok ras Abiatar Peti Perjanjin Dibata si benar mulih ku Jerusalem, tetap kalak e tading i je.
30 Nangkih Daud ku Gunung Saitun,+ ngandung ia, tutupina takalna janah erdalan ia la erselop. Kerina kalak si ikut nangkih ras ia pe tutupina takalna janah ngandung.
31 Kenca si e begi Daud berita, “Ahitopel enggo ikut mberontak+ ras Absalom.”+ Emaka nina Daud, “O Jahwe,+ banlah nasehat Ahitopel e bali ras nasehat kalak motu.”+
32 Sanga seh Daud i datas gunung, bas ingan si i je biasana kalak nembah* Dibata, Usai+ kalak Arki+ enggo lit i je njumpai Daud. Enggo rigatken Usai uisna janah enggo tamana abu ku takalna.
33 Tapi nina Daud man bana, “Adi ikut kam nyebrang ras aku, labo pagi banci sampatindu aku.
34 Padin kam mulih ku kota janah kataken bagenda man Absalom, ‘O Raja, aku enda budakndu. Mbarenda aku budak bapakndu, tapi gundari aku jadi budakndu.’+ Alu bage banci sampatindu aku janah gagalkenndu rencana* Ahitopel.+
35 Imam Sadok ras Imam Abiatar pe lit i je. Kerina si begindu bas istana arus pagi katakenndu man kalak e duana.+
36 Ahimas+ anak Sadok ras Jonatan+ anak Abiatar pe lit i je ras bapakna. Pesehlah pagi kerina si begindu man bangku arah kalak e.”
37 Emaka lawes Usai teman* Daud+ ku kota. Sanga si e Absalom sangana masuk ku Jerusalem.
Cataten i teruh
^ Ntah banci saja “40 tahun.”
^ As. “kerina kalak Kereti ras kalak Peleti.”
^ Taneh si mbelang si jarang iingani.
^ Ntah “Peti Perpadanen.”
^ Bas bahasa Heber, kata enda ngertiken kengasupen sekalak jelma si ibereken Dibata guna meteh sura-suraNa.
^ Taneh si mbelang si jarang iingani.
^ Ntah “sujud man.”
^ Ntah “nasehat.”
^ Ntah “tangan kanan.”
