2 Samuel 17:1-29
17 Nina Ahitopel man Absalom, “Pediatlah kupilih 12.000 prajurit ngayaki Daud bas berngi enda.
2 Kuserang pagi ia sanga latih kapna ras la lit gegehna,*+ kuban pagi ia mbiar. Kerina kalak si ikut ras ia kiamen nge pagi, janah raja ngenca si kubunuh.+
3 Kenca si e, kubaba pagi man bandu kerina kalak si ikut ras ia. Adi enggo mate pagi kalak si ayakindu e, kubaba pagi mulihken kerina pengikutna man bandu. Alu bage kerinana pagi erdame.”
4 Cocok akap Absalom bage pe kerina peminpin Israel nasehat Ahitopel e.
5 Tapi nina Absalom, “Lebuh lebe Usai+ kalak Arki, gelah sibegiken uga pendapatna.”
6 Emaka reh Usai ndahi Absalom. Nina Absalom, “Enda nasehat si bereken Ahitopel. Arus nge lakoken kami nasehatna e? Adi lang, kataken pendapatndu man kami.”
7 Megi si e, nina Usai man Absalom, “Sekalenda nasehat Ahitopel e la mehuli!”+
8 Nina Usai ka, “Jelas kel tehndu maka seh kel gegehna bapakndu bage pe anak buahna.+ Kalak e seh kel rawana, bagi beruang si kebenen anakna.+ Selain si e, bapakndu e sekalak pejuang,+ emaka labo pagi ia erberngi ras jelma si enterem.
9 Gundari pasti ia sangana cebuni bas gua ntah pe bas ingan si deban.+ Janah adi leben pagi ia nyerang, bagenda nge pagi nina kalak si megi kerna si e, ‘Pengikut Absalom enggo talu!’
10 Kalak si perpang si bagi singa*+ pe pasti pagi mbiar, sebap kerina kalak Israel meteh maka bapakndu seh kel gegehna+ janah kerina kalak si ikut ras ia pe perpang.
11 Enda nasehatku: Pepulunglah kerina kalak Israel seh asa buena bagi kersik i tepi laut,+ pepulung mulai Dan nari seh ku Berseba.+ Kam pagi si minpin kalak e erperang.
12 Sidarami pagi i ja ingan Daud cebuni janah siserang ia alu tentera si enterem si bagi remang ndabuh ku taneh. Daud bage pe anak buahna sada pe pagi labo lit si selamat.
13 Adi mundur pagi ia ku sada kota, laweslah kita ras kerina kalak Israel gelah sihancurken kota e. Sitarik pagi tembok kota e alu nali ku lau maler, seh asa lanai lit sada kerikil pe si tading.”
14 Kenca si e, nina Absalom bage pe kerina kalak Israel, “Jilen kap nasehat Usai kalak Arki+ e asangken nasehat Ahitopel!” Enggo itetapken* Jahwe gelah tulak kalak e nasehat si mejile si bereken Ahitopel.+ Alu bage Absalom banci kena bencana iban Jahwe.+
15 Kenca si e, nina Usai man Imam Sadok ras Imam Abiatar,+ “Bagenda nasehat si bereken Ahitopel man Absalom bage pe peminpin-peminpin Israel, tapi enda nasehat si kubereken man Absalom.
16 Mislah kirim kena berita man Daud guna mpersingeti ia, ‘Berngi enda, ula kam erberngi bas ingan nyebrang Lau Jordan* si lit i deher taneh mesawang.* Tapi arus sebrangindu lau e, adi lang, mate pagi kam ibunuh bage pe kerina kalak si ikut ras kam.’”+
17 Emaka isuruh me sekalak budak si diberu mpeseh berita e man Jonatan+ ras Ahimas.+ Kalak e duana tetap tading i Enrogel+ sebap la kalak e pang masuk ku kota perban mbiar idah kalak. Kenca si e, lawes kalak e guna mpeseh berita e man Raja Daud.
18 Tapi lit sekalak anak perana si ngidah kalak e janah katakenna kerna si e man Absalom. Emaka meter kalak e lawes janah seh i rumah sekalak dilaki i Bahurim+ si lit sumur bas halamenna. Emaka masuk kalak e ku bas sumur e.
19 Kenca si e tutupi ndehara dilaki e sumur e alu uis, jenari datas uis e tamakenna biji-bijin* si enggo itutu. Ise pe la lit si metehsa.
20 Reh pelayan-pelayan Absalom ku rumah diberu e janah sungkunna diberu e, “I ja Ahimas ras Jonatan?” Nina diberu e, “Enggo lawes kalak e ku lau maler ah.”+ Jenari, darami pelayan-pelayan e Ahimas ras Jonatan tapi la idahna kalak e, emaka mulih pelayan-pelayan e ku Jerusalem.
21 Kenca lawes pelayan-pelayan e, ndarat Ahimas ras Jonatan arah sumur e nari, jenari lawes kalak e janah laporkenna man Raja Daud, nina, “Enggo rencanaken Ahitopel nyerang kam Raja,+ emaka mislah kam berkat, sebrangilah lau maler e.”
22 Mis nyebrang Daud ras kerina kalak si ikut ras ia. Sanga enggo terang wari, kerina kalak e enggo nyebrangi Lau Jordan.
23 Kenca teh Ahitopel maka nasehatna la ibegiken kalak, tamana pelana ku keledena, jenari mulih ia ku rumahna si lit i kutana.+ Kenca enggo berena petunjuk man keluargana,+ gantung diri* ia.+ Emaka mate Ahitopel janah ikuburken ia bas kuburen keluargana.
24 Sanga si e, lawes Daud ku Mahanaim,+ janah Absalom ras kerina pasuken Israel nyebrang Lau Jordan.
25 Ipilih Absalom me Amasa+ jadi kepala pasukenna guna nggantiken Joap.+ Bapak Amasa eme Itra kalak Israel, mamak Amasa eme Abigail+ anak Nahas. Abigail ersenina ras Seruya. Seruya e mamak Joap.
26 Absalom ras pasuken Israel erkemah i daerah Gileat.+
27 Seh kenca Daud i Mahanaim, lit si ngalo-ngalo ia eme Sobi anak Nahas si rehna arah Raba+ si lit i daerah kalak Ammon, Mahir+ anak Amiel si rehna arah Lodebar, bage pe Barsilai+ kalak Gileat si rehna arah Rogelim.
28 Baba kalak e ingan medem, baskom, kudin taneh, gandum, barli, tepung, biji-bijin si ipanggang, dua jenis kacang, gandum si ikerahken,
29 madu, mentega, biri-biri, ras keju. Baba kalak e si e kerina man Daud bage pe man kerina kalak si ikut ras ia,+ sebap nina kalak e, “Kalak e pasti enggo melihe, muas, janah latih kapna bas taneh mesawang.”*+
Cataten i teruh
^ Ntah “ras sanga duana tanna lemah.”
^ As. “si pusuhna bagi singa.”
^ Ntah “perentahken.”
^ Taneh si mbelang si jarang iingani.
^ Ntah banci saja “ula kam tading i gurun pasir.”
^ Ntah “ndelis.”
^ Taneh si mbelang si jarang iingani.
