2 Samuel 18:1-33
18 Kenca si e, kira Daud asa kai buena kalak si ikut ras ia, janah pilihna peminpin-peminpin si ngawasi seribu kalak bage pe peminpin-peminpin si ngawasi seratus kalak.+
2 Jenari suruh Daud kalak e berkat bas telu kelompok. Sepertelu ipinpin Joap,+ sepertelu ipinpin senina Joap eme Abisai+ anak Seruya,+ janah sepertelu nari ipinpin Itai+ kalak Gat. Nina raja man kalak e, “Aku pe ikut ras kena.”
3 Tapi nina kalak e, “Ula, Tuan.+ Adi kami si kiam, labo diate musuh. Bicara setengah pe arah kami si mate, e pe labo diate musuh. Tapi kam Tuan, seri kap ergana ras 10.000 kalak si bagi kami.+ Emaka, padin berekenndu penampat arah kota nari.”
4 Nina raja, “Kai pe si mehulina akap kena pasti kulakoken.” Emaka tedis raja i sebelah gerbang kota, janah maju kerina pasukenna bas kelompok-kelompok. Bas kelompok-kelompok e, lit si buena seratus kalak, lit ka si buena seribu kalak.
5 Kenca si e, bere raja perentah man Joap, man Abisai, ras Itai, “Ula bunuh kena Absalom, sebap ia kap anakku sintua.”+ Sanga bereken raja perentah kerna Absalom e man peminpin-peminpin pasuken, kerina pasuken megisa.
6 Lawes pasuken e ndarat arah kota ngelawan kalak Israel, janah erperang kalak e i kerangen Eperaim.+
7 I je, talu kalak Israel+ iban pasuken Daud,+ janah melala kel si ibunuh bas wari e, lit 20.000 kalak.
8 Dungna, terjadi perang bas kerina daerah e. Bas wari e buen kalak si mate perban kerangen e asangken si ibunuh alu pedang.
9 Dungna, jumpa Absalom ras prajurit-prajurit Daud. Sanga si e, Absalom sangana nangkih bagal.* Mentas bagalna e arah teruh batang kayu si galang si melala dahanna. Sangkut bukna bas dahan batang kayu e. Tapi bagal e terus kiam, emaka tading Absalom molah-olah i je.
10 Lit sekalak dilaki si ngidahsa janah nina man Joap,+ “Kuidah ndai Absalom molah-olah bas batang kayu si galang.”
11 Nina Joap man dilaki e, “Adi idahndu nge ia, engkai maka la mis bunuhndu? Adi bunuhndu min ndai ia, pasti kubereken man bandu sepuluh logam pirak ras sada ikat pinggang.”
12 Tapi nina dilaki e man Joap, “Amin pe berekenndu man bangku 1.000 logam pirak, labo mungkin kubunuh anak raja, sebap kubegi nge sanga perentahken raja man bandu, man Abisai, bage pe man Itai, ‘Jaga kena Absalom, ula pediat ise pe ncilakai ia.’+
13 Adi la aku patuh janah kubunuh ia, pasti teh raja janah labo kari lindungindu aku.”
14 Nina Joap, “Enggo me yah. Mpekeri-keri waktu saja ngerana ras kam!” Emaka buat Joap telu tombak,* tebakkenna ku jantung Absalom, sanga si e Absalom nggeluh denga janah molah-olah bas batang kayu si galang e.
15 Kenca si e, reh sepuluh kalak si maba senjata Joap, gudami kalak e Absalom ngasa mate.+
16 Kenca si e, embus Joap trompet guna mpengadi perang e. Emaka, lanai ayaki pasuken Joap pasuken Israel.
17 Buat kalak e mayat Absalom janah benterkenna ku lubang si galang si lit i kerangen. Jenari tutupi kalak e alu batu seh ngasa ergun-gun.+ Emaka kiam kerina pasuken Israel ku rumahna.
18 Sanga nggeluh denga Absalom, banna sada tugu guna dirina i Lembah Raja.+ Sebap nina, “Labo pagi lit anakku si dilaki si erban gelarku tetap iinget.”+ Emaka banna gelar tugu e make gelarna, janah seh ngasa gundari tugu e igelari Tugu Absalom.
19 Nina Ahimas+ anak Sadok, “Pediatlah aku kiam ndahi raja, gelah kupeseh berita e man bana. Sebap enggo bereken Jahwe keadilen man raja alu mbebasken ia arah musuh-musuhna.”+
20 Tapi nina Joap man bana, “Ula sendah pesehndu berita e. Bas wari si deban saja pesehndu. Ula min bas wari enda pesehndu sebap anak raja enggo mate.”+
21 Kenca si e nina Joap man salah sada kalak Kus,+ “Kataken man raja kai si idahndu.” Emaka, sujud kalak Kus e man Joap jenari kiam ia.
22 Nina Ahimas anak Sadok sekali nari man Joap, “La soal kai pe si terjadi, pediat min aku kiam ngikutken kalak Kus ah.” Tapi nina Joap, “Engkai maka arus kam ikut, Nakku? Me labo lit berita si man pesehenndu?”
23 Tapi tetap denga nina, “La soal kai si terjadi, pediatlah aku lawes.” Emaka nina Joap, “To dage!” Jenari kiam Ahimas arah Lembah Jordan. Dungna lebeina kalak Kus ndai.
24 Daud sangana kundul i antara gerbang kota.+ Lit sekalak penjaga+ nangkih ku atap gerbang i datas tembok. Idahna sekalak dilaki reh kiam.
25 Emaka megang penjaga e ngataken si e man raja. Nina raja ngaloi, “Adi sisada ia, pasti lit berita si babana.” Sanga reh deherna dilaki e,
26 idah penjaga e ka lit sekalak nari si reh kiam. Nina penjaga e man si njaga gerbang, “Lit ka sekalak nari si reh kiam!” Nina raja, “Ia pe reh maba berita ka nge.”
27 Nina penjaga e, “Adi kunen arah perkiam kalak si pertama e, kuakap Ahimas+ anak Sadok nge ah.” Emaka nina raja, “Ia kalak bujur, pasti berita si mehuli si babana.”
28 Kenca si e nina Ahimas man raja, “Lit berita si mehuli, Raja!” Jenari sujud ia i lebe-lebe raja, nina, “Terpujilah Jahwe Dibatandu si enggo nyerahken kalak si mberontak man Tuanku Raja.”+
29 Tapi nina raja, “Me selamat nge anakku Absalom?” Ngaloi Ahimas, “Sanga suruh Joap aku ras sekalak pelayan raja, gerupuh kel kuidah i jah, tapi la kuteh kai si terjadi.”+
30 Tapi nina raja, “Miserlah kam, jah kam tedis.” Emaka tedis Ahimas i je.
31 Kenca si e, seh kalak Kus ndai+ janah nina, “Reh aku maba berita enda man bandu Tuanku Raja: Sendah enggo bereken Jahwe keadilen man bandu alu mbebasken kam arah tan kerina kalak si mberontak ngelawan kam.”+
32 Tapi nina raja man kalak Kus e, “Me selamat nge anakku Absalom?” Ngaloi kalak Kus e, “Mbera-mbera kai si enggo terjadi man Absalom, terjadi ka man kerina musuhndu ras kerina pemberontak si atena ncilakai kam, Raja.”+
33 Megi si e, ceda kel ate raja, jenari nangkih ia ku ruangen si lit i datas gerbang, ngandung ia. Janahna erdalan nina, “O Absalom anakku, anakku, anakku Absalom! Padin min ndai aku saja si mate nakku. Nde anakku Absalom!”+
Cataten i teruh
^ Keturunen kelede jantan ras kuda beruna.
^ Ntah banci saja “anak panah.” As. “tongkat.”
