2 Samuel 19:1-43
19 Enggo ikataken man Joap, “Ngandung raja janah ceda atena perban Absalom.”+
2 Emaka kemenangen* bas wari e berubah jadi ceda ate man kerina kalak, perban begi kalak e raja erceda ate perban anakna.
3 Bas wari e, masuk kalak e ku kota+ alu sinik-sinik bagi pasuken si mela akapna perban kiam arah peperangen nari.
4 Tutupi raja ayona janah megang ia lalap ngandung, nina, “Anakku Absalom! Anakku Absalom, anakku!”+
5 Kenca si e, dahi Joap raja ku rumahna, nina, “Sendah enggo mela banndu kerina pelayanndu si nelamatken kesahndu, kesah anak-anakndu si dilaki,+ anak-anakndu si diberu,+ diberu-diberundu, bage pe gundik-gundikndu.*+
6 Keleng tendu kalak si rate segat man bandu, segat tendu kalak si engkelengi kam. Jelas kel teridah bas wari enda maka labo lit ertina bas kam peminpin-peminpin pasukenndu bage pe pelayan-pelayanndu, sebap tek kel aku padin kapndu kerina kami mate gelah Absalom si nggeluh.
7 Gundari jumpailah pelayan-pelayanndu, pegegehi kalak e. Ersumpah aku bas gelar Jahwe, adi la kin jumpaindu kalak e, labo kari lit sekalak pe si tetap ras kam bas berngi enda. Ndauh kari keleken si enda asangken kerina kesusahen si pernah nanamindu mulai kin kam nguda denga seh ngasa gundari.”
8 Kenca si e, lawes raja janah kundul ia i gerbang kota. Emaka ikataken man kerina kalak, “Gundari raja sangana kundul i gerbang kota.” Emaka kerina kalak reh ndahi raja.
Tapi pasuken Israel* kiam ku rumahna masing-masing.+
9 Kerina kalak bas kerina suku Israel erjengil, nina, “Selamatken raja kita arah musuh-musuhta nari,+ selamatkenna ka kita arah kalak Pilisti. Tapi gundari kiam raja arah negri enda perban Absalom.+
10 Absalom si enggo sipilih jadi rajata+ pe enggo mate bas perang.+ Engkai maka la silakoken kai pe guna maba Raja Daud mulih?”
11 Kirim Raja Daud pesan man Imam Sadok+ ras Imam Abiatar,+ “Kataken kena man peminpin-peminpin Juda,+ ‘Engkai maka pedekah-dekah kena maba raja mulih ku istana? Padahal enggo begi raja berita arah rumahna nari maka kerina kalak Israel ersura-sura maba raja mulih ku istana.
12 Kena ersenina kap ras raja, sada dareh kap kena. Jadi, engkai maka pedekah-dekah kena maba raja mulih?’
13 Kataken ka bagenda man Amasa,+ ‘La kin sada dareh kam ras aku? Mbera-mbera hukum Dibata pagi aku adi gundari nari la kam kuban jadi peminpin pasukenku nggantiken Joap.’”+
14 Emaka berhasil raja muat ukur kerina kalak Juda, janah kirimken kalak Juda pesan man raja, “Mulihlah kam ras kerina pelayan-pelayanndu.”
15 Mulih raja janah seh ia i Lau Jordan, tapi kalak Juda reh ku Gilgal+ njumpai raja janah taruhken kalak e raja nyebrangi Lau Jordan.
16 Emaka Simei+ anak Gera kalak Benyamin si rehna arah Bahurim e, minter reh ras kalak Juda njumpai Raja Daud.
17 Lit 1.000 kalak Benyamin si ikut ras Simei. Siba+ pelayan keluarga Saul mis lawes ku Lau Jordan sope raja seh. Si ikut ras Siba eme 15 anakna si dilaki ras 20 kalak pelayanna.
18 Lewati Siba* ingan nyebrang guna maba keluarga raja janah guna ngelakoken kai pe si suruh raja. Tapi sanga raja nandangi nyebrangi Lau Jordan, reh Simei anak Gera, sujud ia i lebe-lebe raja.
19 Nina man raja, “Ampuni min salah budakndu enda Tuan, ula min inget-ingetndu kesalahen si enggo kulakoken+ sanga kam lawes nadingken Jerusalem. Mbera-mbera la tamakenndu e ku bas pusuhndu, Tuanku Raja.
20 Sebap, enggo kuteh maka aku enggo erdosa. Emaka gundari, arah kerina keturunen Jusup, aku si pertama reh njumpai kam, Tuanku Raja.”
21 Minter ngerana Abisai+ anak Seruya,+ “La kin arusna ibunuh Simei e? Sebap enggo sumpahina kalak si ipilih Jahwe.”+
22 Tapi nina Daud, “O anak-anak Seruya,+ urusen kena kin e? Maka lawan kena ka aku sendah! Sendah, aku enggo mulihi jadi raja bas Israel, emaka labo lit ise pe si ibunuh bas wari enda.”
23 Kenca si e, nina raja man Simei, “Labo kari kam mate.” Emaka ersumpah raja man Simei.+
24 Mepiboset+ kempu Saul pe reh njumpai raja. La cucina nahena, la cukurna kumisna, la cucina uisna mulai kin sanga lawes raja seh asa mulih ia alu dame.
25 Sanga reh ia ku* Jerusalem guna njumpai raja, nina raja man bana, “O Mepiboset, engkai maka la kam ikut lawes ras aku?”
26 Ngaloi ia, “O Tuanku Raja, me tehndu nge naheku cacat?+ Emaka kukataken man pelayanku, ‘Sikapken kelede man bangku gelah kunangkihi, sebap lawes teku ras raja.’ Tapi, tipu pelayanku+ e aku.
27 Pitnahna ka budakndu enda i lebe-lebendu, Raja.+ Tapi, kam Tuanku Raja bali kap ras malekat Dibata si benar, emaka lakoken min kai si akapndu mehuli.
28 O Tuanku Raja, situhuna banci saja nge bunuhndu kerina keluarga bapakku. Tapi, pediatndu aku kundul bas mejandu janah man ras kerina kalak si man ras kam.+ Emaka lanai lit hakku mindo kai pe arah kam nari, Raja.”
29 Tapi nina raja, “Enggo mena, lanai perlu cakapken kerna si e. Enggo kuban keputusen gelah erbagi kam ras Siba kerna juma e.”+
30 Nina Mepiboset, “Pediat saja buatna kerina. Si penting, kam enggo mulih ku istana alu dame.”
31 Jenari, Barsilai+ kalak Gileat reh arah Rogelim nari ku daerah Jordan naruhken raja ku Lau Jordan.
32 Barsilai e enggo metua, umurna enggo 80 tahun, ia seh kel bayakna. Emaka sanga tading raja i Mahanaim,+ Barsilai si nikapken pangan raja.
33 Emaka nina raja man Barsilai, “Ikutlah kam nyebrang ras aku. Ikut pagi kam man bas mejaku i Jerusalem.”+
34 Tapi nina Barsilai man raja, “Ntisik nari ngenca aku nggeluh, Raja. Emaka man kai nari aku ikut ras kam ku Jerusalem?
35 Gundari umurku enggo 80 tahun.+ Banci denga kin kubedaken si mejile ras si lang? Banci denga kin teh budakndu enda nanam pangan ntah pe inemen? Banci denga kin kubegiken sora kalak rende?+ Mberati kam saja ngenca adi ikut aku ras kam, Tuanku Raja.
36 Engkai maka berekenndu man bangku upah enda, Raja? Naruhken kam ku Lau Jordan saja pe enggo kuakap puas, Raja.
37 Pediatlah budakndu enda mulih, janah mate bas kotaku, ndeher ras kuburen bapakku ras mamakku.+ Enda budakndu Kimham.+ Baba ia nyebrang ras kam Tuanku Raja, lakokenlah man bana kai pe si akapndu mehuli.”
38 Emaka nina raja, “Adi bage kubaba Kimham nyebrang ras aku, kulakoken pagi man bana kai pe si mehuli akapndu. Kai pe si pindondu pasti kulakoken.”
39 Kenca si e, kerina kalak e nyebrangi Lau Jordan. Sanga nyebrang raja, emana Barsilai,+ pasu-pasuna ia, jenari mulih Barsilai ku rumahna.
40 Sanga raja nyebrang ku Gilgal,+ ikut Kimham nyebrang ras ia. Kerina kalak Juda bage pe setengah arah kalak Israel ikut nyebrang ras raja.+
41 Kenca si e, kerina kalak Israel reh ndahi raja janah nina, “Engkai maka senina kami kalak Juda erbuni-buni maba kam, Raja? Engkai maka babana kam, keluargandu, bage pe kerina anak buahndu nyebrangi Lau Jordan?”+
42 Kerina kalak Juda njawap kalak Israel, “Perban kami enda keluarga raja!+ Engkai maka kena merawa? Labo raja si nggalari nakan kami, labo berena kami hadiah.”
43 Tapi nina kalak Israel man kalak Juda, “Lit kap sepuluh bagin kami bas kerajan enda, emaka belinen hak kami man Raja Daud asangken kena. Jadi engkai maka hina kena kami? Me kami nge tangtangna si arusna maba raja?” Tapi talu kalak Israel ban kalak Juda bas perjengilen e.
Cataten i teruh
^ Ntah “keselamaten.”
^ Eme kerina si ndukung Absalom.
^ Ntah banci saja “kalak e.”
^ Ntah banci saja “arah.”
