2 Samuel 2:1-32
2 Kenca si e, nungkun Daud man Jahwe,+ “Arus nge aku lawes ku salah sada kota i Juda?” Nina Jahwe, “Laweslah.” Nungkun ka Daud, “Ku ja aku arus lawes?” Nina, “Ku Hebron.”+
2 Emaka lawes Daud ku jah ras duana diberuna, eme Ahinoam+ kalak Jesreel ras Abigail+ si mbarenda diberu Nabal kalak Karmel.
3 Baba Daud ka anak buahna,+ kerina kalak e maba keluargana. Kerina kalak e tading i sekeliling Hebron.
4 Kenca si e, reh kalak Juda, angkat kalak e Daud jadi raja i je guna merentah keturunen Juda.+
Kataken kalak e man Daud, “Kalak Jabes i Gileat si nguburken Saul.”
5 Emaka lit kalak si suruh Daud ndahi kalak Jabes si lit i Gileat guna ngataken, “Mbera-mbera pasu-pasu Jahwe kena perban enggo cidahken kena kekelengen kena si setia man tuan kena Saul alu nguburken ia.+
6 Mbera-mbera terus cidahken Jahwe kekelengenNa si setia man kena. Aku pe mehuli pagi perbahanenku man kena perban enggo ban kena bage.+
7 Gundari megegehlah kena janah perpang, sebap tuan kena Saul enggo mate janah enggo lantik kalak Juda aku jadi rajana.”
8 Tapi Abner+ anak Ner si jadi peminpin pasuken Saul, enggo babana Isboset anak Saul+ nyebrang ku Mahanaim.+
9 Jadikenna Isboset jadi raja i Gileat,+ i Jesreel,+ i Eperaim,+ i Benyamin, bas kerina daerah Israel bage pe jadi raja man kalak Aser.
10 Umur Isboset anak Saul sanga jadi raja eme 40 tahun, dua tahun dekahna ia merentah. Amin gia bage, kalak Juda tetap ndukung Daud.+
11 Pitu setengah tahun dekahna Daud jadi raja kalak Juda i Hebron.+
12 Bas pudi wari, Abner anak Ner ras pasuken Isboset anak Saul lawes arah Mahanaim+ ku Gibeon.+
13 Joap+ anak Seruya+ ras pasuken Daud pe lawes, jumpa kalak e i kolam Gibeon. Sada kelompok kundul i tepi kolam si arah enda, sada kelompok nari kundul i tepi kolam si arah jah.
14 Dungna nina Abner man Joap, “Sisuruhlah anak buahta ertanding* i lebe-lebeta.” Emaka nina Joap, “Sicubaken yah.”
15 Emaka pilih kalak e 12 kalak Benyamin arah kelompok Isboset, 12 kalak arah pasuken Daud.
16 Sekalak-sekalak nangkap takal lawanna janah tebakna lawanna, jenari mate si 24 kalak e. Emaka ingan e igelari Helkat-hasurim si lit i Gibeon.
17 Ngeri kel peperangen si terjadi bas wari e. Dungna talu Abner ras pasuken Israel i lebe-lebe pasuken Daud.
18 Teluna anak Seruya si dilaki+ lit i je, eme Joap,+ Abisai,+ ras Asahel.+ Asahel e meter kel perkiamna bagi kijang si meliar.*
19 La erngadi-ngadi Asahel lalap ngayaki Abner.
20 Sanga inen Abner ku pudi, nina, “Kam kin e, Asahel?” Nina Asahel, “Ue, aku enda.”
21 Nina Abner ka, “Ula nai ayakindu aku. Tangkaplah salah sada anak buahku, buatndulah kai si lit bas ia.” Tapi la nggit Asahel, lalap ayakina Abner.
22 Emaka nina Abner ka man Asahel sekali nari, “Ula nai ayakindu aku. Arus kin kam kubunuh? Uga pagi ningku natap ayo seninandu Joap?”
23 Tapi lalap la nggit Asahel ngadi, emaka tebak Abner beltekna alu ujung tombakna seh asa tembus.+ Minter ia mate i je. Ise pe si ngelewati ingan Asahel mate, pasti ngadi ntisik i je.
24 Kenca si e, ayaki Joap ras Abisai me Abner. Sanga nandangi gelap wari, seh kalak e i Bukit Amma si pengalana ku Giah, i dalan si nuju ku Taneh Mesawang* Gibeon.
25 Pulung kalak Benyamin janah ikutken kalak e Abner. Jenari, bentuk kalak e sada pasuken, tedis kalak e i datas sada bukit.
26 Kenca si e, megang sora Abner ngerana man Joap, “Asa kai nari dekahna kita erperang alu pedang? La kin tehndu maka si la mehuli ngenca pagi hasilna? Ndigan suruhndu ngadi pasukenndu ngayaki senina-seninana?”
27 Nina Joap, “Ersumpah aku i lebe-lebe Dibata si benar si nggeluh, adi la ndai kam ngerana bage, ngasa pagi erpagi-pagi maka pasukenku ngadi ngayaki senina-seninana.”
28 Embus Joap trompetna, emaka lanai ayaki pasuken Joap kalak Israel, dungna ngadi peperangen e.
29 Gedang-gedang berngi e lawes Abner ras pasukenna ngelewati daerah Araba,+ sebrangi kalak e Lau Jordan. Kenca si e, lewati kalak e kerina lembah, dungna seh kalak e i Mahanaim.+
30 Kenca enggo mulih Joap arah ngayaki Abner, pepulungna kerina pasukenna. Arah pasuken Daud, lit 19 kalak si bene, selain Asahel.
31 Tapi talu ban pasuken Daud kalak Benyamin bage pe pasuken Abner, lit 360 kalak si mate arah kalak e.
32 Buat kalak e mayat Asahel,+ kuburkenna i kuburen bapakna si lit i Betlehem.+ Sada berngi dekahna Joap ras pasukenna erdalan, seh kalak e i Hebron+ kenca nandangi terang wari.
