2 Samuel 20:1-26
20 Lit sekalak dilaki arah Benyamin si gelarna Syeba+ anak Bikri, ia ndarami masalah lalap. Embusna trompet,+ nina, “Labo kadeta pe Daud ah, labo lit sidat warisen kai pe arah anak Isai e.+ Emaka kena kalak Israel, mulihlah kena ku dibata-dibata* kena!”+
2 Emaka kerina kalak Israel lawes nadingken Daud, janah ikutkenna Syeba anak Bikri.+ Tapi kalak Juda tetap ikutkenna rajana, janah temanina ia arah Lau Jordan nari seh ku Jerusalem.+
3 Sanga seh Daud bas istanana i Jerusalem,+ pindahkenna sepuluh gundikna* si mbarenda tadingkenna guna ngurus istana+ ku sada rumah si ijagai. Berekenna pangan kalak e, tapi lanai ia erhubungen seks ras kalak e.+ Kalak e nggeluh bagi diberu si enggo janda amin pe dilakina nggeluh denga. Tetap kalak e tading i je seh ngasa mate.
4 Nina raja man Amasa,+ “Pepulung kerina kalak Juda bas telu wari, jenari baba ku jenda. Kam pe arus ikut.”
5 Emaka pepulung Amasa kerina kalak Juda, tapi Amasa terlambat reh, la ia reh bas waktu si enggo tentuken raja.
6 Kenca si e, nina Daud man Abisai,+ “Lebih bahaya kap Syeba+ anak Bikri e asangken Absalom.+ Baba pelayan-pelayanku, ayaki ia, gelah ula sempat ia masuk ku kota-kota si erbenteng janah bebas arah kita nari.”
7 Emaka lawes pasuken Joap,+ pengawal pribadi raja,*+ ras kerina pejuang si megegeh nadingken Jerusalem ngayaki Syeba anak Bikri.
8 Sanga seh kalak e i deher batu si galang si lit i Gibeon,+ reh Amasa+ njumpai kalak e. Sanga si e, enggo pake Joap baju perangna janah iketkenna pedangna ras inganna bas awakna. Sanga erdalan Joap, ndabuh pedangna e.
9 Nina Joap man Amasa, “Uga beritandu, Senina?” Jenari jemak Joap janggut Amasa alu tanna si kanan bagi tempa emana tena Amasa.
10 La perdiateken Amasa pedang si lit bas tan Joap. Emaka tebak Joap beltek Amasa,+ ndaraten tukana, mamburen ku taneh. Minter mate Amasa, emaka lanai perlu itebak sekali nari. Jenari terusken Joap ras seninana Abisai ngayaki Syeba anak Bikri.
11 Salah sada prajurit Joap si tedis i deher Amasa ngataken, “Ise si ndukung Joap ras Daud, ikutkennalah Joap!”
12 Sanga si e Amasa ampar i tengah dalan janah erdareh-dareh kerina dagingna. Idah prajurit Joap ndai maka kerina kalak si lewat ngadi ngenen Amasa, emaka pindahkenna Amasa arah dalan e nari janah tutupina alu uis.
13 Kenca pindahkenna Amasa arah dalan nari, kerina pasuken ngikutken Joap ngayaki Syeba+ anak Bikri.
14 Lewati Syeba kerina daerah suku kalak Israel ku Abil Bet Makah.+ Pulung kalak Bikri janah ikutkenna ka Syeba.
15 Reh Joap ras pasukenna* janah kepungna Syeba si lit bas kota Abil Bet Makah. Pegun-gunna ka taneh i deher tembok kota guna nyerang kota e. Jenari galina lubang i teruh tembok kota e gelah runtuh.
16 Lit sekalak diberu si pentar bas kota e, megang ia ngerana, nina, “O nake, begiken aku! Begiken! Suruh Joap reh ku jenda, ngerana teku ras ia.”
17 Sanga reh Joap, nina diberu e, “Kam kin Joap?” Nina, “Ue, aku.” Nina diberu e ka, “Begikenlah kata-kata budakndu enda.” Nina, “Ue, kubegiken.”
18 Nina diberu e, “Mbarenda rusur nina kalak, ‘Laweslah ku kota Abil mindo petunjuk,’ pasti nge kari dung masalahna.
19 Aku jadi wakil kalak Israel si setia ras dame. Tapi kam kernepkenndu tendu kota si enggo bagi nande bas Israel. Engkai maka arus kernepkenndu umat* Jahwe?”+
20 Nina Joap ngaloi, “Labo mungkin kukernepken kota e!
21 Labo ena sura-sura kami. Bagenda, lit sekalak dilaki arah daerah gunung Eperaim nari+ si mberontak man Raja Daud, gelarna Syeba+ anak Bikri. Ia sangana bas kota enda. Adi serahkenndu dilaki e, kutadingken kota enda.” Ngaloi diberu e, “Nenlah! Ibenterken kari takalna man bandu arah tembok e!”
22 Minter jumpai diberu si pentar e kerina kalak si lit bas kota e, jenari potong kalak e kerahung Syeba anak Bikri janah benterkenna takalna man Joap. Embus Joap trompet, emaka kerina pasukenna lawes nadingken kota e janah mulih ku rumahna masing-masing.+ Joap pe mulih ku Jerusalem njumpai raja.
23 Sanga si e, Joap si minpin kerina pasuken Israel.+ Benaya+ anak Joyada+ si minpin kerina pengawal pribadi raja.*+
24 Adoniram+ ertugas ngawasi kalak si kerja paksa. Josapat+ anak Ahilut tukang catat.
25 Sepa jadi sekertaris, Sadok+ ras Abiatar+ jadi imam.
26 Ira kalak Jair jadi kepala pejabat* Daud.
Cataten i teruh
^ Ntah banci saja “ku kemah.”
^ As. “kalak Kereti ras Peleti.”
^ As. “Reh kalak e.”
^ As. “warisen.”
^ As. “kerina kalak Kereti ras Peleti.”
^ As. “imam.”
