2 Samuel 21:1-22
21 Bas jaman Daud, terjadi kelihen+ telu tahun dekahna. Emaka pindo Daud petunjuk man Jahwe. Ngaloi Jahwe, “Enggo ersalah Saul ras keluargana perban enggo bunuh Saul kalak Gibeon.”+
2 Emaka ilebuh raja kalak Gibeon+ janah ngerana ia ras kalak e. Kalak Gibeon eme kalak Amori+ si nggeluh denga, kalak e labo kalak Israel. Kalak Israel pernah ersumpah maka labo pagi bunuh kalak e kalak Gibeon.+ Tapi usahaken Saul munuh kalak e perban la tena kalak Gibeon nggeluh i tengah-tengah kalak Israel ras Juda.
3 Nina Daud man kalak Gibeon, “Kai si arus kulakoken man kena? Uga aku banci nebus kesalahen si enggo iban man kena, gelah pindo kena pasu-pasu guna umat* Jahwe?”
4 Nina kalak Gibeon e, “Masalah kami ras Saul bage pe keluargana la terdungi alu pirak ntah emas,+ janah la lit hak kami munuh sekalak pe arah kalak Israel.” Megi si e, nina Daud, “Kai pe si pindo kena, pasti pagi kulakoken.”
5 Nina kalak e, “Usahaken Saul munuh kami, kernepkenna tena kami bas kerina daerah Israel.+
6 Emaka serahkenlah pitu dilaki arah keturunen Saul. Gantung kami pagi kalak e+ i lebe-lebe Jahwe, i Gibea+ kota Saul, kalak si pilih Jahwe.”+ Jenari nina raja, “Kuserahken pagi kalak e.”
7 Tapi mekuah ate Daud man Mepiboset+ anak Jonatan kempu Saul, perban enggo pernah ersumpah Daud ras Jonatan+ anak Saul i lebe-lebe Jahwe.
8 Emaka pilih Daud me Armoni ras Mepiboset, eme anak Saul si lahirken Rispa+ anak Aya. Pilihna ka lima anak Adriel si dilaki si lahirken Mihal*+ eme anak Saul. Adriel+ eme anak Barsilai kalak Mehola.
9 Jenari, kalak e iserahken man kalak Gibeon. Gantung kalak Gibeon mayat kalak e i das gunung i lebe-lebe Jahwe.+ Radu kalak e mate pituna. Kalak e ibunuh bas awal musim rani barli imulai.
10 Kenca si e, buat Rispa+ anak Aya kain guni janah kimbangkenna datas batu. Sanga ciger wari, jagana mayat-mayat e gelah ula reh perik-perik ku mayat-mayat e. Sanga berngi wari, jagana mayat-mayat e gelah ula reh binatang liar ku je. I je ia mulai awal musim rani seh ngasa reh udan.
11 Begi Daud kai si lakoken Rispa anak Aya, gundik* Saul e.
12 Emaka lawes Daud ndahi peminpin-peminpin* Jabes Gileat,+ guna muat tulan-tulan Saul bage pe tulan-tulan Jonatan si enggo tangko kalak e i lapangen kota Bet-San. I je mayat Saul ras Jonatan igantung kalak Pilisti sanga taluken kalak e Saul i Gilboa.+
13 Babana tulan-tulan Saul ras tulan-tulan Jonatan anakna, pepulungna ka tulan-tulan kalak si enggo igantung* ndai.+
14 Kenca si e, tulan-tulan Saul bage pe tulan-tulan Jonatan ikuburken bas kuburen bapak Saul eme Kis+ i Sela,+ daerah Benyamin. Kenca kerina perentah raja ilakoken, emaka begiken Dibata pemindon guna negri e.+
15 Erperang ka mulihi kalak Pilisti ras kalak Israel.+ Lawes Daud ras anak buahna erperang ngelawan kalak Pilisti, tapi latih akap Daud.
16 Lit sekalak dilaki keturunen Repaim+ si gelarna Isbibenob. Babana tombak tembaga si beratna kira-kira telu setengah kilo.*+ Babana ka pedang si mbaru janah bunuhna tena Daud.
17 Emaka mis reh Abisai+ anak Seruya nampati Daud+ janah serangna kalak Pilisti e seh ngasa mate. Sanga si e, ersumpah anak buah Daud man Daud, “Ula nai kam ikut erperang ras kami+ gelah ula mate lampu* kalak Israel.”+
18 Kenca si e, erperang ka mulihi kalak Israel ras kalak Pilisti+ i Gob. I je, Sibekai+ kalak Husa munuh Sap sekalak dilaki keturunen Repaim.+
19 Erperang ka mulihi kalak Israel ras kalak Pilisti+ i Gob, janah Elhanan anak Jair-oregim kalak Betlehem munuh Goliat kalak Gat. Tangke tombak Goliat galangna asa kayu si lit bas alat tenun.+
20 Kenca si e, terjadi ka perang bas Gat. I je lit sekalak dilaki keturunen Repaim si seh kel galangna.+ Lit 24 jari-jari nahena ras tanna. Lit enem jari-jarina bas tiap tanna ras nahena.
21 Lalap hinana kalak Israel,+ emaka mate ia ibunuh Jonatan anak Simei,+ senina Daud.
22 Empatna kalak e keturunen Repaim arah Gat nari. Kerina kalak e enggo mate ibunuh Daud bage pe anak buah Daud.+
Cataten i teruh
^ As. “warisen.”
^ Ntah banci saja “Merap.”
^ Ntah banci saja “si mpuna taneh.”
^ As. “enggo iban jadi tontonen.”
^ Maksudna, gelah ula mate peminpin kalak Israel.
