2 Samuel 24:1-25
24 Merawa kel Jahwe sekali nari man kalak Israel+ sanga lit si ngiahken Daud gelah kirana*+ jumlah pasuken Israel ras Juda.+
2 Nina raja man Joap+ peminpin pasukenna, “Lawes kam ku kerina daerah suku Israel,+ kiralah* kalak e gelah kuteh asakai jumlahna.”
3 Tapi nina Joap man raja, “Mbera-mbera jumlah bangsa e tambah 100 kali lipat iban Jahwe Dibatandu. Mbera-mbera idah Tuanku Raja kerna si e! Tapi engkai maka bage lakokenndu, Tuanku Raja?”
4 Amin pe bage, kata-kata raja nge si tetap erdalan. Emaka Joap ras kepala pasuken nadingken raja. Lawes kalak e, kirana jumlah kalak Israel.+
5 Sebrangi kalak e Lau Jordan janah erkemah i Aroer,+ i sebelah kanan* kota si lit i tengah-tengah lembah,* jenari lawes kalak e ku daerah kalak Gat ras ku Jaser.+
6 Kenca si e, lawes kalak e ku Gileat+ ras ku daerah Kades,* jenari ku Dan-jaan janah mutar ku Sidon.+
7 Kenca si e lawes kalak e ku kota Tirus+ si erbenteng ras ku kerina kota kalak Hewi+ ras kota kalak Kanaan. Terakhir, lawes kalak e ku Berseba+ si lit i Negep*+ i Juda.
8 Lit 9 bulan 20 wari dekahna kalak e ndalani kerina negri e, jenari mulih kalak e ku Jerusalem.
9 Laporken Joap man raja jumlah kalak si kirana.* Pejuang Israel si make pedang lit 800.000 kalak, janah kalak Juda lit 500.000 kalak.+
10 Tapi salah akap Daud bana*+ kenca kirana jumlah kalak e. Emaka nina Daud man Jahwe, “Enggo kulakoken dosa+ si mbelin alu ngelakoken si enda. Gundari, ampuni min dosa budakndu enda Jahwe,+ sebap enggo motu kel perbahanenku.”+
11 Pepagina, sanga medak Daud, ngerana Jahwe man Nabi Gat,+ kalak si lit pengenehenenna.*
12 Nina, “Kataken man Daud, ‘Enda si kataken Jahwe, “Kubereken man bandu telu pilihen. Pilih apai tendu si arus Kulakoken man bandu.”’”+
13 Emaka dahi Gat me Daud, nina, “Nggit nge kam terjadi kelihen bas negrindu enda pitu tahun dekahna?+ Ntah kiam kam telu bulan dekahna perban ayaki musuh?+ Ntah nggit kam terjadi wabah penakit telu wari dekahna?+ Ukuri manjar-anjar jawapen kai si arus kupeseh man Dibata si enggo nuruh aku ndahi kam.”
14 Nina Daud man Gat, “Enda erban latih kel ukurku. Mindo kel aku, pediat min kami ndabuh ku tan Jahwe+ sebap mbelin kel perkuah ateNa.+ Tapi ula pediat kami ndabuh ku tan manusia.”+
15 Emaka ban Jahwe kalak Israel kena wabah penakit,+ mulai pagi-pagi nari seh asa waktu si itetapkenNa. Akibatna lit 70.000 kalak si mate+ mulai Dan nari seh ku Berseba.+
16 Sanga dudurken malekat tanna ku Jerusalem guna engkernepkenca, ceda ukur* Jahwe perban bencana penakit e.+ Emaka nina man malekat si engkernepken e, “Enggo bias! Penusur tanndu.” Malekat Jahwe e paksana bas ingan ngerik* Arauna. Arauna+ e kalak Jebusi.+
17 Sanga idah Daud bangsa e iserang malekat, nina man Jahwe, “Aku si erdosa, aku si ersalah. Tapi biri-biri enda,+ kai kin salahna? Emaka ku aku sajalah ras ku keluarga bapakku sajalah ban tanNdu.”+
18 Emaka bas wari e dahi Gat me Daud, nina, “Laweslah kam, ban ingan nutung* persembahen man Jahwe bas ingan ngerik Arauna kalak Jebusi.”+
19 Emaka lawes Daud kenca begina kata-kata Gat e, bagi si perentahken Jahwe.
20 Sanga nen Arauna ku teruh, idahna reh raja ras pelayan-pelayanna, mis ia ndarat janah sujud man raja.
21 Nungkun Arauna, “O Tuanku Raja, engkai maka reh kam ku ingan budakndu enda?” Nina Daud, “Kutukur teku inganndu ngerik perban kuban teku ingan nutung persembahen man Jahwe i jenda, gelah ngadi kari wabah penakit si nyerang bangsata.”+
22 Tapi nina Arauna man Daud, “Buatndu saja Tuan, persembahken kai si mehuli kapndu. Enda lembu-lembu man persembahen tutungen, enda papan ingan ngerik, janah enda alat-alat si ipake lembu-lembu guna jadi rantingna.
23 Kerina enda man bandu, Tuanku Raja.” Nina Arauna ka, “Mbera-mbera ngena ate Jahwe Dibatandu man bandu.”
24 Nina raja man Arauna, “La banci bage, arus kutukur e arah kam nari. La banci kupersembahken korban tutungen man Jahwe Dibataku adi la kin lit pengorbanen arah aku.” Emaka tukur Daud ingan ngerik e ras lembuna, ergana 50 sekel* pirak.+
25 Ban Daud ingan nutung persembahen+ man Jahwe, jenari persembahkenna i je korban tutungen bage pe korban persadan. Kenca si e begiken Jahwe pemindon bangsa Israel,+ janah pengadiNa wabah penakit si engkenai kalak e.
Cataten i teruh
^ Ntah “guna erban sensus.”
^ Ntah “sensuslah.”
^ Ntah “sebelah selatan.”
^ Ntah “Tahtim-hodsyi.”
^ Ntah “Selatan.”
^ Ntah “sensusna.”
^ Ntah “Tapi isalahken pusuh peraten Daud dirina.”
^ Eme kerna kai pe si cidahken Dibata ku bas pikiren sekalak jelma.
^ Ntah “menyesal.”
