2 Samuel 3:1-39
3 Keluarga Saul ras keluarga Daud lalap erperang. Keluarga Daud terus reh gegehna,+ tapi keluarga Saul reh dekahna reh lemahna.+
2 Bas masa si e, lahir anak-anak Daud si dilaki i Hebron.+ Sintua gelarna Amnon,+ si lahirken Ahinoam+ kalak Jesreel.
3 Si peduaken Kileap, si lahirken Abigail+ si mbarenda diberu Nabal kalak Karmel. Si peteluken Absalom,+ si lahirken Maaka, eme anak Talmai+ raja Gesur.
4 Si peempatken Adonia,+ si lahirken Hagit. Si pelimaken Sepatia, si lahirken Abital.
5 Si peenemken Itream, si lahirken Eglah. Enda ndai me kerina anak-anak Daud si lahir i Hebron.
6 Keluarga Saul ras keluarga Daud terus erperang. Bas masa si e, lalap usahaken Abner+ gelah reh belinna pengaruhna bas keluarga Saul.
7 Lit gundik* Saul si gelarna Rispa,+ ia anak Aya. Bas pudi wari, ikataken Isboset+ man Abner, “Engkai maka erhubungen seks kam ras gundik bapakku?”+
8 Merawa kel Abner megi ranan Isboset e, nina, “Akapndu kin aku biang* kalak Juda? Seh ngasa gundari, lalap kucidahken kekelengenku si setia man keluarga bapakndu Saul, senina-seninana, bage pe teman-temanna. La kuhianati kam, buktina la kuserahken kam man Daud. Tapi gundari, engkai maka persoalkenndu kerna perbahanenku si salah ras sekalak diberu?
9 Pediatlah hukum Dibata aku alu mberat adi la kin kulakoken kai si enggo janjiken Jahwe alu sumpah man Daud.+
10 Enggo erjanji Dibata maka buatNa pagi kuasa selaku raja arah Saul nari bage pe arah keturunenna, jenari berekenNa man Daud. Daud pagi si merentah Israel bage pe Juda, arah Dan nari seh ku Berseba.”+
11 Perban mbiar kel Isboset man Abner, emaka lanai ia pang ngerana.+
12 Mis suruh Abner kalak ndahi Daud guna ngataken, “Ise kin si erkuasa bas negri enda?” Nina ka, “Adi banndu sada perjanjin ras aku, kulakoken pagi kerina si banci kulakoken gelah kerina kalak Israel ndukung kam.”+
13 Nina Daud, “Cocok! Kuban pagi sada perjanjin ras kam. Sada ngenca pemindonku: Ula jumpaindu aku adi la kin babandu diberuku Mihal,+ anak Saul.”
14 Kenca si e, suruh Daud kalak njumpai Isboset,+ anak Saul, guna ngataken, “Ulihkenlah diberuku Mihal. Enggo kugalari 100 kulit sunaten kalak Pilisti sanga ngempoi ia.”+
15 Emaka suruh Isboset kalak muat Mihal arah dilakina nari, eme Paltiel+ anak Lais.
16 Tapi lalap ikutken Paltiel diberuna e. Janahna ngandung, lalap ikutkenna seh ngasa Bahurim.+ Jenari nina Abner man bana, “Mulihlah kam!” Emaka mulih ia.
17 Sanga si e, kirim Abner berita man peminpin-peminpin Israel, nina, “Enggo ndekah kel kena ersura-sura gelah Daud jadi raja kena.
18 Gundari waktuna, ban kenalah ia jadi raja kena, sebap enggo kataken Jahwe man Daud, ‘Arah tan budakKu Daud,+ Kuselamatken pagi umatKu Israel bas tan kalak Pilisti nari, bage pe bas tan kerina musuh kalak e.’”
19 Kenca si e, ngerana Abner man kerina kalak Benyamin.+ Lawes ka Abner njumpai Daud i Hebron, ras Daud saja ngenca atena ngerana guna mpeseh kai si enggo isetujui kalak Israel bage pe kerina kalak Benyamin.
20 Sanga lawes Abner ras 20 kalak anak buahna ku Hebron guna njumpai Daud, ban Daud pesta man kalak e.
21 Emaka nina Abner man Daud, “Pediatlah aku lawes guna mpepulung kerina kalak Israel, alu bage banci ban kalak e perjanjin ras kam, bagi si isurakenndu, banci kam jadi raja si merentah kerina daerah Israel.” Emaka peberkat Daud me Abner. Jenari lawes Abner alu dame.
22 La ndekah kenca si e, mulih pasuken Daud ras Joap arah peperangen, melala kel hasil jarahen si baba kalak e. Sanga si e, Abner lanai ras Daud i Hebron, sebap enggo pediat Daud ia mulih alu dame.
23 Sanga seh Joap+ ras kerina pasuken si ikut ras ia, lit si ngataken man Joap, “Reh ndai Abner+ anak Ner+ ndahi raja, pediat raja ia lawes alu dame.”
24 Emaka dahi Joap raja, nina, “Reh Abner ndahi kam, tapi engkai maka pediatndu ia lawes bage-bage saja? Engkai maka bage banndu?
25 Me tandaindu ise situhuna Abner anak Ner ah! Tujunna reh ku jenda guna nipu kam, janah mperdiateken ku ja saja perdalanndu ras kerina si sangana lakokenndu.”
26 Emaka lawes Joap nadingken Daud, suruhna kalak ngayaki Abner. Baba kalak e Abner mulihken arah sumur* si lit i Sirah. Tapi la teh Daud kai pe kerna si e.
27 Kenca enggo seh Abner i Hebron,+ baba Joap ia ku samping gerbang kota, tempa-tempa lit si atena katakenna man Abner. Tapi tebakna beltek Abner dungna mate ia.+ Si e terjadi perban Abner enggo munuh Asahel eme senina Joap.+
28 Bas pudi wari, kenca begi Daud kerna si e, nina, “Seh rasa lalap, aku bage pe kerajanku labo ersalah man Jahwe+ kerna Abner anak Ner si enggo ibunuh.
29 Mbera-mbera Joap+ ras kerina keluarga bapakna si dat hukumen. Mbera-mbera bas keluarga Joap lit lalap kalak si kena penakit kelamin,+ si kena kusta,+ dilaki si erdahin make alat pemintal,* si mate perban pedang, ntah pe si kelihen!”+
30 Bage me Joap ras seninana Abisai+ munuh Abner,+ perban sanga erperang i Gibeon enggo bunuh Abner senina kalak e eme Asahel.+
31 Kenca si e, ngerana Daud man Joap ras man kerina pasuken si ikut ras ia, nina, “Rigatkenlah uis kena, pakelah kain guni, ngandungi kenalah Abner.” Raja Daud pe ikut erdalan i pudi kalak si maba mayat Abner.
32 Kenca si e, kuburken kalak e Abner i Hebron. Megang kel sora raja ngandung i kuburen Abner, kerina kalak pe ikut ngandung.
33 Endeken raja lagu ceda ate kerna Abner, nina,
“O Abner, engkai maka arus kam mate bagi kalak motu?
34 Tanndu labo iiket,Nahendu pe labo irante.*
Kam mate bagi kalak si ibunuh penjahat.”+
Megi si e, kerina kalak e mulihi ngandung perban kematen Abner.
35 Sanga ciger denga wari, reh kerina kalak, bereken kalak e roti man Daud guna ngapuli ia. Tapi ersumpah Daud, “Pediatlah ihukum Dibata aku alu mberat adi kupan roti ntah kai pe sope gelap wari!”+
36 Kerina kalak ngidah kai si terjadi, setuju kalak e man kai si lakoken raja. Bagi sedekah enda, meriah akap kalak e ngidah kerina si lakoken raja, si e pe meriah ka akap kalak e ngidahsa.
37 Emaka bas wari e, kerina anak buah Daud ras kerina kalak Israel meteh maka labo raja si ertanggung jawap man kematen Abner anak Ner.+
38 Nina raja man pelayan-pelayanna, “Enggo teh kena maka bas wari enda enggo mate sekalak peminpin si hebat bas Israel.+
39 Amin pe enggo ilantik aku jadi raja,+ tapi latih kel ukurku, perban anak-anak Seruya+ jahat kel man bangku.+ Mbera-mbera balas Jahwe kalak jahat menurut perbahanenna si jahat.”+
Cataten i teruh
^ As. “takal biang.”
^ Maksudna, lubang guna nimpan lau.
^ Mungkin maksudna dilaki si cacat si arus ngelakoken dahin diberu.
^ As. “labo iiket alu tembaga.”
