2 Samuel 4:1-12
4 Sanga begi Isboset anak Saul+ maka Abner enggo mate i Hebron,+ mbiar kel ia, kerina kalak Israel pe lanai tenang.
2 Lit kelompok perampok Isboset. Dua anak buah Isboset si gelarna Baanah ras Rehap si jadi kepala kelompok perampok e. Kalak e duana anak Rimon kalak Beerot arah suku Benyamin nari. Mbarenda Beerot+ pernah jadi bagin suku Benyamin.
3 Kiam kalak Beerot ku Gittaim,+ seh ngasa gundari tading kalak e i je jadi kalak asing.
4 Jonatan anak Saul,+ lit sada anakna si cacat nahena,*+ gelarna Mepiboset.+ Sanga umurna lima tahun denga, lit berita arah Jesreel+ nari kerna kematen Jonatan ras Saul. Megi si e, angkip si ngurus Mepiboset ia janah kiam, tapi perban panik si ngurussa e, ndabuh banna Mepiboset. E me sebapna cacat nahena.
5 Anak-anak Rimon kalak Beerot eme Rehap ras Baanah. Sanga ciger wari, lawes kalak e ku rumah Isboset, Isboset sangana medem.
6 Masuk kalak e ku rumah Isboset tempa-tempa muat gandum atena. Kenca si e tebakna beltek Isboset. Jenari kiam Rehap ras seninana Baanah.+
7 Sanga masuk kalak e ku rumah, Isboset sangana medem bas kamarna. Bunuh kalak e ia, potongna kerahungna. Kenca si e baba kalak e takalna, kiam kalak e ku Araba. Sada berngi dekahna kalak e bas perdalanen.
8 Baba kalak e takal Isboset+ man Raja Daud i Hebron, nina, “Enda takal Isboset anak musuhndu Saul+ si atena munuh kam.+ Bas wari enda enggo balas Jahwe kap Saul ras keturunenna guna kam, Tuanku.”
9 Tapi nina Daud man Rehap ras man seninana Baanah anak-anak Rimon kalak Beerot e, “Ersumpah aku i lebe-lebe Jahwe si nggeluh si enggo nelamatken aku arah kerina kesusahenku,+
10 maka bagi mbarenda sanga aku i Siklak, lit si ngelapor maka Saul enggo mate+ janah akapna berita si meriah si babana e, tapi kutangkap ia janah kubunuh.+ E me upah si kubereken man si maba berita e!
11 Emaka pasti beraten hukumen man kalak jahat si munuh kalak benar si sangana medem bas rumahna. La kin arusna kutuntut darehna bas tan kena nari+ janah kukernepken kena arah doni enda?”
12 Kenca si e, suruh Daud anak buahna munuh kalak e.+ Potongna tan ras nahe kalak e, gantungna mayatna+ i deher kolam si lit i Hebron. Tapi takal Isboset buat kalak e janah ikuburkenna i kuburen Abner si lit i Hebron.
Cataten i teruh
^ Ntah “si lumpuh.”
