2 Samuel 6:1-23
6 Pepulung Daud ka kerina pasuken Israel si hebatna, lit 30.000 kalak buena.
2 Kenca si e, lawes Daud ras kerina pasukenna ku Baala Juda guna maba Peti Perjanjin* Dibata si benar.+ I lebe-lebe Peti e kap kalak ngelebuh gelar Jahwe penguasa malekat+ eme Dibata si kundul bas tahtaNa si lit i datas kerubim-kerubim.+
3 Tapi, tama kalak e Peti Perjanjin Dibata i gereta si mbaru+ guna mindahkenca arah rumah Abinadap+ si lit i das bukit. Si mabai gereta e eme Ussa ras Ahio anak-anak Abinadap.
4 Baba kalak e Peti Perjanjin Dibata si benar arah rumah Abinadap nari si lit i bukit, Ahio erdalan i lebe-lebe Peti Perjanjin e.
5 Rayaken Daud ras kerina kalak Israel kejadin e i lebe-lebe Jahwe alu erbage-bage alat musik si iban arah kayu juniper, harpa,* alat musik si ersenar si debanna,+ rebana,+ sistrum, bage pe simbal.+
6 Tapi sanga seh kalak e bas ingan ngerik* i Nakon, menam ndabuh Peti Perjanjin e ban lembu-lembu e, emaka dudurken Ussa tanna, jemakna Peti Perjanjin Dibata si benar e.+
7 Perban si e, merawa kel Jahwe man Ussa, bunuh Dibata si benar ia+ perban la ergaina undang-undang Dibata.+ Emaka mate Ussa i deher Peti Perjanjin Dibata si benar.
8 Tapi merawa Daud perban merawa kel Jahwe man Ussa. Igelari me ingan e Peres Ussa* seh asa gundari.
9 Bas wari e, mbiar kel Daud man Jahwe,+ nina, “Uga ningku maba Peti Perjanjin Jahwe e ku inganku?”+
10 La nggit Daud maba Peti Perjanjin Jahwe e ku inganna tading i Kota Daud.+ Tapi baba Daud Peti e ku rumah Obet Edom+ kalak Gat.
11 Lit telu bulan dekahna Peti Perjanjin Jahwe bas rumah Obet Edom kalak Gat, terus ipasu-pasu Jahwe Obet Edom bage pe kerina keluargana.+
12 Ilaporken man Raja Daud maka enggo pasu-pasu Jahwe keluarga Obet Edom ras kerina si lit bas ia perban Peti Perjanjin Dibata si benar lit i je. Emaka lawes Daud muat Peti Perjanjin Dibata si benar e arah rumah Obet Edom nari, babana Peti e ku Kota Daud alu ermeriah ukur.+
13 Kenca kalak si maba+ Peti Perjanjin Jahwe e erdalan enem langkah, korbanken Daud sada lembu ras sada binatang si mbur.
14 Landek-landek Daud i lebe-lebe Jahwe asa gegehna janahna make epod* arah linen nari.+
15 Sanga Daud ras kerina kalak Israel maba Peti Perjanjin+ Jahwe, ersurak-surak kalak e alu ermeriah ukur+ janah embusna trompet.*+
16 Tapi sanga seh Peti Perjanjin Jahwe i Kota Daud, Mihal+ anak Saul ngenen arah jendela, idahna Raja Daud sangana lompat-lompat ras landek-landek i lebe-lebe Jahwe. Mulai hinana Daud bas pusuhna.+
17 Emaka baba kalak e Peti Perjanjin Jahwe ku bas kemah si enggo sikapken Daud jadi ingan Peti e.+ Kenca si e, persembahken Daud persembahen tutungen+ ras korban persadan+ man Jahwe.+
18 Kenca enggo dung Daud mpersembahken persembahen tutungen ras korban persadan, pasu-pasu Daud bangsa e bas gelar Jahwe penguasa malekat.
19 Kenca si e, bagi-bagiken Daud man kerina rakyat sada roti si bentukna bagi gelang, sada kue kurma, ras sada kue kismis. Berekenna e man kerina kalak Israel, la soal dilaki ntah pe diberu. Jenari, mulih kerina kalak e ku rumahna masing-masing.
20 Sanga mulih Daud guna masu-masu keluargana, reh Mihal anak Saul+ ndahi ia, nina, “Bas wari enda seh kel muliana raja Israel, sebap setengah tilanjang raja i lebe-lebe budak-budak si diberu arah pelayan-pelayan raja, bagi kalak motu si tilanjangina bana!”+
21 Megi si e, nina Daud man Mihal, “Kurayaken e i lebe-lebe Jahwe si milih aku guna minpin Israel. Labo bapakndu ras keturunenna si ipilih Jahwe guna minpin umatNa.+ Emaka lalap nge kurayaken e guna Jahwe.
22 Kupeteruk pagi bangku lebihen asangken si enda, terbuen pe pagi si kulakoken si ncidahken maka aku enda labo kai pe. Tapi muliaken budak-budak si diberu si katakenndu ndai nge pagi aku.”
23 Emaka seh ngasa mate, Mihal anak Saul+ e la lit anakna.
Cataten i teruh
^ Ntah “Peti Perpadanen.”
^ Harpa eme alat musik si ersenar bagi gitar, tapi bentukna beda.
^ Ertina “Merawa man Ussa.”
^ Ntah “trompet tanduk.”
