2 Samuel 7:1-29
7 Sanga Raja Daud enggo tading bas istanana+ janah enggo bebas ia ban Jahwe arah musuh-musuhna si lit i sekelilingna,
2 nina raja man Nabi Natan,+ “Aku tading bas istana si iban arah kayu aras nari,+ tapi Peti Perjanjin* Dibata si benar tading bas kemah.”+
3 Nina Natan man raja, “Lakokenlah kai atendu si lakokenndu, sebap Jahwe ras kam kap.”+
4 Bas berngi e reh kata Jahwe man Natan, nina,
5 “Kataken man budakKu Daud, ‘Bagenda nina Jahwe, “Arus kin bangunndu rumah inganKu tading?+
6 Sebap mulai kin Kubaba bangsa Israel ndarat arah Mesir nari seh ngasa gundari,+ Aku la pernah tading bas sada rumah. Tapi pindah-pindah nge Aku, tading bas kemah.+
7 Sedekah Aku ras kalak Israel, pernah kin bagenda Kukataken man peminpin-peminpin suku Israel si Kupilih guna mpermakani bangsa Israel, ‘Engkai maka la bangun kena rumah arah kayu aras man bangKu?’”’
8 Kataken man pelayanKu Daud, ‘Bagenda nina Jahwe penguasa malekat, “Mbarenda, sanga kam njaga asuh-asuhen denga i mbalmbal,+ Kubuat kam je nari, Kuban kam jadi peminpin bangsaKu Israel.+
9 Ku japa pe kam pagi lawes, Aku lit ras kam,+ Kutaluken pagi kerina musuh-musuh si lit i lebe-lebendu.+ Kuban pagi terkenal gelarndu+ bagi gelar kalak terkenal si lit i doni enda.
10 Kupilih pagi sada ingan man umatKu Israel, Kutamaken kalak e i je. I je pagi kalak e tading, lanai pagi lit kai pe si ngganggu kalak e. Lanai pagi kalak e isiksa kalak jahat bagi si mbarenda,+
11 sanga mulai Kulantik hakim-hakim+ man umatKu Israel. Kuban pagi kam bebas arah kerina musuhndu.+
“‘“Kataken Jahwe ka maka ban Jahwe pagi keluargandu jadi keturunen raja.*+
12 Sanga enggo seh pagi waktuna kam mate+ bagi nini bulangndu, Kuban pagi anakndu jadi raja kenca kam, Kuban pagi kerajanna paguh.+
13 Ia pagi si mbangun rumah man gelarKu,+ Kuban pagi tahta kerajanna paguh seh rasa lalap.+
14 Aku pagi jadi Bapakna, ia jadi anakKu.+ Adi lakokenna si salah, Kupersingeti pagi ia alu tongkat si ipake manusia, Kupekpek ia bagi si ilakoken anak-anak manusia.*+
15 Lalap pagi Kucidahken kekelengenKu si setia man bana, labo bagi man Saul+ si enggo Kusasapken arah lebe-lebendu, lanai Kucidahken kekelengenKu si setia man Saul.
16 Keturunenndu ras kerajanndu ertahan seh rasa lalap, tahtandu paguh seh rasa lalap.”’”+
17 Peseh Natan kerina kata-kata e ras kai si enggo idahna*+ e man Daud.
18 Megi si e kundul Raja Daud i lebe-lebe Jahwe, nina, “O Jahwe Tuhan Si Meganjangna, ise kin aku? Ise kin keluargaku maka lakokenNdu si enda kerina man bangku?+
19 O Jahwe Tuhan Si Meganjangna, tempa-tempa si e ndai lenga bias, cakapkenNdu ka maka seh ngasa wari si pepagi keturunen budakNdu enda tetap denga pagi ertahan. O Jahwe Tuhan Si Meganjangna, banNdu ka si e jadi undang-undang man kerina manusia.
20 O Jahwe Tuhan Si Meganjangna, kai nari si banci kataken budakNdu enda, perban enggo tuhu-tuhu kel aku tandaiNdu.+
21 LakokenNdu kerina perbahanen si mbelin enda, pebetehkenNdu e man budakNdu enda, perban e kap sura-suraNdu janah e si enggo janjikenNdu.+
22 Perban si e maka Kam tuhu-tuhu hebat,+ o Jahwe Tuhan Si Meganjangna. Kerina si begi kami mbuktiken maka la lit si bagi Kam,+ la lit Dibata selain Kam.+
23 Bangsa si apai kin bas doni enda si bagi umatNdu Israel?+ TebusNdu kalak e, banNdu jadi umatNdu,+ banNdu gelarNdu+ terkenal alu perbahanen si mbelin ras si luar biasa si lakokenNdu guna kalak e.+ PelawesNdu bangsa-bangsa si deban ras dibata-dibatana guna umatNdu, si enggo tebusNdu arah Mesir nari guna diriNdu.
24 TetapkenNdu bangsaNdu Israel jadi umatNdu seh rasa lalap,+ Kam o Jahwe enggo jadi Dibata kalak e.+
25 “O Dibata Jahwe, tepatiNdu min janjiNdu man budakNdu enda bage pe man keturunenku seh rasa lalap, mbera-mbera lakokenNdu bagi si enggo janjikenNdu.+
26 Mbera-mbera mbelin gelarNdu seh rasa lalap,+ gelah banci kataken kalak, ‘Jahwe penguasa malekat kap Dibata kalak Israel,’ mbera-mbera keturunenku tetap lit i lebe-lebeNdu seh rasa lalap.+
27 O Jahwe penguasa malekat, Kam kap Dibata kalak Israel, enggo katakenNdu maka keluargaku jadi keturunen raja pagi.+ E me sebapna maka pang budakNdu enda ertoto bagenda man baNdu.
28 O Jahwe Tuhan Si Meganjangna, Kam kap Dibata si benar, kata-kataNdu eme kebenaren,+ enggo janjikenNdu kerina si mehuli ndai man budakNdu enda.
29 Mbera-mbera nggit Kam masu-masu keturunen budakNdu enda, terus min kalak e lit i lebe-lebeNdu seh rasa lalap.+ Sebap Kam kap si enggo erjanji o Jahwe Tuhan Si Meganjangna, mbera-mbera pasu-pasuNdu keturunen budakNdu enda seh rasa lalap.”+
Cataten i teruh
^ Ntah “Peti Perpadanen.”
^ As. “ban Jahwe pagi sada rumah man bandu.”
^ Ntah banci saja “Adam.”
^ Ntah “ras pengenehenen.”
