2 Samuel 8:1-18
8 Piga-piga waktu kenca si e, serang Daud kalak Pilisti+ janah talukenna kalak e,+ jenari rebutna daerah Meteg-ama arah tan kalak Pilisti.
2 Taluken Daud kalak Moap,+ jenari suruhna kalak e gempang bas taneh janah ukurna barisen kalak si gempang e alu nali. Bunuhna dua pertelu arah kalak e tapi sepertelu nari pediatna nggeluh.+ Kenca si e, kalak Moap jadi budak-budak Daud, bereken kalak e upeti* man Daud.+
3 Taluken Daud me Hadadeser raja Soba+ eme anak Rehop. Hadadeser talu sanga ia bas perdalanen guna ndatken mulihi kekuasanna nandangi daerah Lau Eprat.+
4 Tangkap Daud 1.700 prajurit Hadadeser si erkuda bage pe 20.000 prajuritna si erdalan. Kenca si e, potong Daud kerina urat nahe kuda kalak e selain 100 kuda si narik gereta.+
5 Sanga reh kalak Siria arah Damaskus+ guna nampati Hadadeser raja Soba, bunuh Daud 22.000 kalak Siria.+
6 Kenca si e, tamaken Daud pasukenna i Siria si lit i Damaskus. Kalak Siria jadi budak-budak Daud, bereken kalak e upeti man bana. Ku japa pe Daud lawes, bereken Jahwe kemenangen* man bana.+
7 Selain si e, buat Daud perisai-perisai* emas si bentukna kibul arah prajurit Hadadeser, babana kerina ku Jerusalem.+
8 Melala kel tembaga si buat Raja Daud arah Betah ras Berota nari eme kota Hadadeser.
9 Begi Raja Toi i Hamat nari+ maka enggo taluken Daud kerina pasuken Hadadeser.+
10 Emaka suruh Toi anakna eme Joram ndahi Raja Daud guna nungkun beritana janah ngataken selamat man bana, perban enggo serangna ras talukenna Hadadeser, sebap Hadadeser rusur nyerang Toi. Baba Joram ka barang-barang si iban arah pirak, emas, bage pe tembaga.
11 Pebadia Raja Daud kerina barang e man Jahwe radu ras emas ras pirak si rampasna arah bangsa-bangsa si talukenna,+ eme:
12 arah Siria, Moap,+ kalak Ammon, kalak Pilisti,+ kalak Amalek,+ bage pe arah Hadadeser+ anak Rehop eme raja Soba.
13 Ban Daud ka gelarna jadi terkenal kenca bunuhna 18.000 kalak Edom i Lembah Sira.+
14 Tama Daud ka pasukenna bas kerina daerah Edom, janah kerina kalak Edom jadi budak Daud.+ Ku ja pe Daud lawes, lalap bereken Jahwe kemenangen* man bana.+
15 Lalap Daud merentah bas kerina daerah Israel,+ banna kai si adil ras si benar+ man kerina rakyatna.+
16 Joap+ anak Seruya si jadi kepala pasuken, Josapat+ anak Ahilut si jadi tukang catat.
17 Sadok+ anak Ahitup ras Ahimelek anak Abiatar si jadi imam, Seraya si jadi sekertaris.
18 Benaya+ anak Joyada jadi kepala pengawal-pengawal pribadi Daud,*+ anak-anak Daud si jadi pejabat tinggi.*
Cataten i teruh
^ Ntah “keselamaten.”
^ Ntah “ampang-ampang.”
^ Ntah “keselamaten.”
^ As. “kepala kalak Kereti ras Peleti.”
^ As. “jadi imam.”
