2 Samuel 9:1-13
-
Kekelengen Daud si setia man Mepiboset (1-13)
9 Kenca si e nina Daud, “Lit nge keluarga Saul si nggeluh denga? Kucidahken ateku kekelengenku si setia man bana perban Jonatan.”+
2 Lit sekalak pelayan keluarga Saul si gelarna Siba.+ Emaka isuruh ia ngadap Daud. Sungkun raja ia, “Kam Siba?” Nina, “Ue, Tuanku.”
3 Nungkun ka raja, “Lit nge keluarga Saul si nggeluh denga? Kucidahken ateku kekelengenku si setia man bana, bagi kekelengen Dibata si setia.” Ngaloi Siba, “Lit sekalak nari, ia anak Jonatan si dilaki. Duana nahena cacat.”+
4 Sungkun raja ka, “I ja dage ia?” Nina Siba, “Bas rumah Mahir+ anak Amiel i Lodebar.”
5 Mis suruh Raja Daud kalak ngelegisa arah rumah Mahir anak Amiel si lit i Lodebar.
6 Kenca seh Mepiboset anak Jonatan kempu Saul i lebe-lebe Daud, minter ia sujud. Kenca si e nina Daud, “Mepiboset!” Jawapna, “Ue, Tuanku.”
7 Nina Daud, “Ula kam mbiar, sebap pasti kubuktiken kekelengenku si setia+ man bandu perban bapakndu Jonatan, kuulihken pagi man bandu kerina juma bulangndu Saul, lalap pagi kam man* ras aku i mejaku.”+
8 Megi si e, sujud Mepiboset, nina, “Engkai maka perdiatekenndu kel aku, Tuan? Ise kin budakndu enda? Aku bali kap bagi biang si enggo mate.”+
9 Lebuh raja me Siba pelayan Saul, nina raja man bana, “Kerina si lit bas Saul bage pe keluargana kubereken man kempu tuanndu.+
10 Kam, anak-anakndu, bage pe pelayan-pelayanndu pagi si ngurus juma e. Pepulungndu pagi hasil juma e guna mere man keluarga Mepiboset kempu tuanndu. Tapi Mepiboset lalap pagi ia man ras aku i mejaku.”+
Lit 15 anak Siba si dilaki janah 20 pelayanna.+
11 Nina Siba man raja, “Lakoken budakndu enda pagi kerina si perentahkenndu, Tuanku Raja.” Emaka man Mepiboset i meja Daud,* bagi anak raja.
12 Lit anak Mepiboset dilaki, ia nguda denga, gelarna Mika.+ Kerina kalak si tading i rumah Siba jadi pelayan Mepiboset.
13 Bage me kerna Mepiboset si duana nahena cacat.+ Tading ia i Jerusalem janah tetap ia man i meja raja.+
