2 Tesalonika 1:1-12
1 Surat enda arah Paulus nari, Silvanus,* bage pe Timotius.+ Surat enda man runggun i Tesalonika si ersada ras Dibata eme Bapakta bage pe ras Tuan Jesus Kristus:
2 Mbera-mbera aloken kena kiniulin Dibata si luar biasa ras kedamen arah Ia nari eme Bapakta, bage pe arah Tuan Jesus Kristus nari.
3 O turang senina, perban kena, arus akap kami lalap ngataken bujur man Dibata. Enggo patut ban kami bage, sebap kiniteken kena reh paguhna janah kekelengen kena man sada ras si debanna reh bagesna.+
4 Emaka, bangga kami+ nceritaken kerna kena man runggun-runggun Dibata, perban tetap kena setia* ras erkiniteken bas ngadapi kerina siksan ras kesusahen.+
5 Enda buktina maka keputusen Dibata benar kap, janah e erban kena jadi cocok masuk ku bas Kerajan Dibata. Perban si e, nanami kena gundari kiniseran.+
6 Perban Dibata e adil, balasNa alu kiniseran kalak si enggo erban kena dat kiniseran.+
7 Tapi kena si dat kiniseran, ibebasken pagi radu ras kami, sanga cidahken Tuan Jesus+ kuasana arah surga nari radu ras malekat-malekatna si megegeh+
8 bas api si gurlah, guna mbalas kalak si la nandai Dibata ras si la patuh man berita si meriah kerna Tuanta Jesus.+
9 Ihukum Tuan pagi kalak e. Hukumenna ikernepken seh rasa lalap.+ Ipedauh pagi kalak e arah lebe-lebe Tuan nari bage pe arah kuasana si mulia.
10 Sanga reh pagi Tuan guna imuliaken radu ras umatna si badia, kerina si erkiniteken man bana termasuk kena, jengang ngidah ia sebap erkiniteken kena man kai si peseh kami.
11 Emaka lalap totoken kami kena, gelah cocok akap Dibatata ngelebuh kena,+ janah gelah alu kuasaNa tuhu-tuhu lakokenNa kerina si mehuli si ngena ateNa janah berhasil banNa kerina si lakoken kena perban erkiniteken.
12 Alu bage, gelar Tuanta Jesus imuliaken arah kena janah kena pe imuliaken perban ersada ras ia, sesuai ras kiniulin Dibatata si luar biasa bage pe Tuan Jesus Kristus.
