2 Tesalonika 3:1-18
3 Dungna o turang senina, teruslah totoken kena kami,+ gelah kata Jahwe* terus terberita alu meter+ janah imuliaken i tengah-tengah jelma si enterem bagi i tengah-tengah kena,
2 janah gelah kami iselamatken arah kalak si kejam ras kalak si jahat,+ sebap kiniteken labo lit bas kerina kalak.+
3 Tapi Tuan setia kap, janah pegegehina ras lindungina kena arah si jahat nari.
4 Selain si e, selaku pengikut Tuan, tek kami man kena, maka sangana ikutken kena petunjuk si bereken kami janah terus pagi ikutken kena.
5 Mbera-mbera terus tegu-tegu Tuan pusuh kena guna engkelengi Dibata+ janah setia*+ guna Kristus.
6 O turang senina, gundari bereken kami man kena petunjuk enda bas gelar Tuanta Jesus Kristus eme: Ula deheri turang senina si la tertip+ ras si la sesuai ras petunjuk si enggo aloken kena* arah kami nari.+
7 Teh kena kap uga arusna ngusih kami,+ perban sanga kami ras kena, perbahanen kami la bagi kalak si la tertip.
8 La pan kami pangan ise pe alu la nggalar.+ Tapi, kerja keras kami janah tutus ate kami erdahin suari ras berngi. Alu bage la kami jadi tanggungen si mberat man ise pe i tengah-tengah kena.+
9 Labo perban la lit hak kami erban si bage,+ tapi cidahken kami ate kami usihen si mehuli gelah banci usih kena.+
10 Situhuna, sanga kami ras kena, pernah bereken kami petunjuk enda: “Ise pe si la nggit erdahin, ula ia man.”+
11 Begi kami maka lit piga-piga i tengah-tengah kena kalak si la tertip,+ si la nggit erdahin tapi campurina urusen kalak.+
12 Bas gelar Tuan Jesus Kristus, bereken kami perentah ras nasehat man kalak si bage, gelah dahikenna dahinna janah panna hasil pencarinna.+
13 Tapi o turang senina, ula kena nyerah bas ngelakoken kai si mehuli.
14 Adi lit kalak si la patuh man petunjuk si lit bas surat enda, hati-hatilah* man kalak si bage, ula nai erteman ras ia+ gelah mela kapna.
15 Ula anggap kena ia musuh. Tapi teruslah persingeti ia+ selaku turang senina.
16 Mbera-mbera Tuan si mereken kedamen terus mere kena kedamen bas kerinana.+ Mbera-mbera Tuan lit ras kena kerina.
17 Enda salam arah aku nari, Paulus, aku si nulissa.+ Enda si jadi tanda bas tiap suratku si mbuktiken surat enda bas aku nari.
18 Mbera-mbera kiniulin si luar biasa arah Tuanta Jesus Kristus tetap lit ras kena kerina.
