2 Timotius 1:1-18
1 Surat enda arah aku nari, Paulus, si jadi rasul Kristus Jesus sesuai ras peraten Dibata, guna mberitaken janji kerna kegeluhen si ibereken arah Kristus Jesus.+
2 Surat enda man anak si kukelengi Timotius:+
Mbera-mbera alokenndu kiniulin Dibata si luar biasa, perkuah ateNa, ras kedamen arah Ia nari eme Bapakta, bage pe arah Jesus Kristus Tuanta.
3 Bujur kukataken man Dibata si man baNa kubereken pelayanen si badia alu pusuh peraten si bersih bagi si lakoken nini bulangku. Rusur kuinget kam bas totoku suari ras berngi sanga mindo aku man baNa.
4 Sanga kuinget iluhndu mambur, merhat kel aku jumpa ras kam, gelah meriah kel ukurku.
5 Teringet aku kinitekenndu si la munapik,+ si tangtangna lit bas ninindu Lois ras mamakndu Enike, janah tek aku maka kiniteken e pe lit bas kam.
6 Emaka kuingetken kam gelah tetap gara semangatndu bas nggunaken pemere Dibata, si alokenndu sanga kutamaken tanku ku takalndu.+
7 Kesah si badia si bereken Dibata man banta mereken gegeh,+ kekelengen, janah gelah beluh rukur, labo erban mbiar.+
8 Emaka ula kam mela ersaksi kerna Tuanta+ ntah pe kerna aku si ipenjaraken perban ia. Tapi alu gegeh Dibata, ikutlah kam dat kiniseran+ guna berita si meriah.+
9 Kita enggo selamatkenNa janah lebuhNa jadi kalak si badia,+ labo perban perbahanenta tapi perban peratenNa ras kiniulinNa si luar biasa.+ Mbarenda nari enggo berekenNa si enda man banta arah Kristus Jesus.
10 Tapi gundari, kiniulin si luar biasa e enggo jelas teridah sanga Jesus Kristus ncidahken bana, eme Juru Selamatta,+ si enggo mbeneken kematen+ janah arah berita si meriah+ enggo perjelasna kerna uga kita banci ndatken kegeluhen+ si la banci kernep.+
11 Guna berita si meriah e aku isuruh jadi perberita, jadi rasul, ras guru.+
12 Perban si e maka kunanami kiniseran si bagenda.+ Tapi la aku mela+ perban kutandai Dibata si man baNa aku tek janah tek aku maka terus jagaNa kerina si kubereken man baNa seh asa wari penghakimen e.+
13 Teruslah jemak kata-kata si benar*+ si enggo begindu arah aku nari, janah teruslah buktiken kinitekenndu, kekelengenndu selaku kalak si ersada ras Kristus Jesus.
14 Alu kesah si badia si lit bas kita, jagalah erta si alokenndu.+
15 Enggo teh kena maka kerina kalak si lit bas Propinsi Asia+ enggo nadingken aku termasuk Pigelus ras Hermogenes.
16 Mbera-mbera mekuah ate Tuhan* man keluarga Onesiporus+ perban rusur aku pegegehina janah la ia mela amin pe aku ipenjaraken.
17 Tapi, sanga aku i Roma, daram-daramina aku janah dungna jumpa ia ras aku.
18 Mbera-mbera mekuah ate Tuhanta Jahwe* man bana bas wari penghakimen e pagi. Tehndu kel kerina kerna pelayanenna i Epesus.
