2 Timotius 2:1-26
2 Emaka, kam o Anakku,+ teruslah datken gegeh arah kiniulin si luar biasa si lit bas Kristus Jesus.
2 Kai si enggo begindu arah aku nari janah enggo isahken i lebe-lebe jelma si enterem,+ ajarkenlah e man kalak si setia si ngasup pagi ngajarkenca man kalak si deban.
3 Selaku prajurit Kristus si mehuli,+ ikutlah kam ngadapi kiniseran.+
4 Sekalak prajurit labo ikut campur bas urusen bisnis,* gelah banci senangkenna kalak si ndaftarken ia jadi prajurit.
5 Bage ka pe, bas pertandingen, kalak si ikut tanding, labo ibereken mahkota adi la ia ertanding menurut aturen.+
6 Selain si e, sekalak perjuma si kerja keras patut nanamina hasil pertama arah jumana.
7 Teruslah ukuri kai si kukataken enda, janah bereken Tuhan* pagi man bandu pengangkan bas kai pe.
8 Ingetlah maka Jesus Kristus enggo ipegeluh arah si mate nari+ janah ia keturunen Daud+ si sesuai ras berita si meriah si kupeseh,+
9 perban si e aku dat kiniseran janah ipenjaraken bagi penjahat.+ Amin pe bage, kata Dibata labo igariken.+
10 E me sebapna terus aku setia* ngadapi kerinana guna kalak si ipilih Dibata,+ gelah arah Kristus Jesus, kalak enda pe iselamatken janah imuliaken seh rasa lalap.
11 Kata-kata enda banci iteki: Adi mate kita ras ia, kita pe pagi pasti nggeluh ka ras ia.+
12 Adi terus kita setia, kita pe merentah pagi jadi raja radu ras ia.+ Adi situlak ia, ia pe tulakna kita.+
13 Adi la kita setia,* Dibata tetap nge setia, sebap la banci lawanNa sipatNa ras tujunNa.
14 Teruslah ingetken kalak e kerna si e. Persingetilah* kalak e i lebe-lebe Dibata gelah la sijawapen kerna kata-kata, sebap si e la erguna janah banci erban rugi* kalak si megikenca.
15 Usahakenlah asa ngasupndu gelah ngena ate Dibata man bandu, jadi sierdahin si la mela man pendahinna, janah ngajarken kata Dibata* alu tepat.+
16 Ula begiken ranan si sia-sia si erlawanen ras kai si badia,+ perban ranan si bage erban kalak reh dauhna arah Dibata,
17 janah ranan e jadi tersebar bagi penakit gangren.* Himeneus ras Piletus ikut nyebarkenca.+
18 Enggo tadingken kalak e kebenaren. Kataken kalak e maka kekeken enggo terjadi+ janah cedaina kiniteken kalak.
19 Amin pe bage, pondasi si tamaken Dibata tetap paguh, janah i je lit tertulis,* “Tandai Jahwe* kalak si jadi jangNa,”+ janah, “Ise pe si ngelebuh gelar Jahwe*+ arus nadingken kai si la benar.”
20 Bas rumah si galang, lit peralaten si iban arah emas, pirak, kayu, bage pe taneh liat. Lit si penting,* janah lit ka si kurang penting.*
21 Adi sekalak jelma pedauhna dirina arah alat si kurang penting,* ia jadi alat si penting,* ipebadia, ras erguna man kalak si mpunasa, janah banci ipake guna ngelakoken tiap dahin si mehuli.
22 Emaka, kiamlah kam nadingken sura-sura kalak si nguda denga, ayakilah kai si benar, kiniteken, kekelengen, kedamen, radu ras kalak si erlebuh man Tuhan* arah pusuh si bersih.
23 Selain si e, tulaklah ranan si bodoh janah ula ikut sijawapen bas kai si la erguna,+ sebap tehndu maka si e erban perubaten.
24 Sekalak budak Tuhan* la perlu rubati, tapi lembut min man kerina kalak,+ beluh ngajar, la balasna sanga ia irugiken,+
25 janah alu lembut ajarina kalak si nggit ngelawan,+ sebap banci saja pediat Dibata kalak si bage ertobat gelah banci lit pemetehna si tepat kerna kebenaren,+
26 janah jadi sadar jenari lepas ia arah siding Iblis si nangkap ia nggeluh-nggeluh guna ngelakoken sura-surana.+
Cataten i teruh
^ Ntah banci saja “bas pendahin tiap wari.”
^ Ntah “megenggeng.”
^ Ntah “megenggeng.”
^ As. “Berekenlah kesaksin si jelas man.”
^ Ntah “kernep; kacau.”
^ As. “kata kebenaren.”
^ Penakit si erban daging macik.
^ Ntah “meterai.”
^ Ntah “kurang mehaga.”
^ Ntah “mehaga.”
^ Ntah “kurang mehaga.”
^ Ntah “mehaga.”