2 Timotius 4:1-22
4 I lebe-lebe Dibata bage pe Kristus Jesus si nandangi ngakimi+ kalak si nggeluh ras kalak si mate+ sanga reh ia ncidahken+ bana bas Kerajanna+ pagi, kubereken bandu perentah:
2 Beritakenlah berita si meriah+ alu semangat, bas waktu si senang bage pe bas waktu si susah. Berekenlah penginget,+ persinget, ras nasehat alu dem kesabaren janah bagi guru si beluh ngajar.+
3 Lit pagi waktuna lanai ikutken kalak e ajaren si benar,*+ tapi sura-surana saja ngenca ikutkenna. Pepulungna guru-guru guna megiken kai si entabeh akap cupingna megikenca.*+
4 Lanai kalak e nggit megiken kebenaren janah perdiatekenna cerita-cerita si la tuhu.
5 Tapi, tetaplah kam sadar bas keadan kai pe, sabarlah* ngadapi kiniseran,+ lakokenlah dahin selaku perberita,* janah tutuslah atendu ngelakoken pelayanenndu.+
6 Aku enggo bagi persembahen inemen si iamburken,+ janah enggo ndeher kel waktuna aku ibebasken.+
7 Enggo erjuang aku alu mehuli,+ enggo kiam aku seh ku ujungna,*+ janah enggo kuikutken kiniteken kalak Kristen.
8 Mulai gundari nari, lit mahkota kebenaren si isikapken man bangku.+ Bas wari penghakimen e pagi, Tuan eme hakim si adil,+ berekenna mahkota e man bangku jadi hadiah,+ janah labo man bangku saja, berekenna ka man kerina kalak si nimai Tuan ncidahken bana.
9 Usahakenlah gelah meter kam reh ndahi aku.
10 Enggo tadingken Demas+ aku perban ngena tena doni* enda janah enggo lawes ia ku Tesalonika, Kresens ku Galati, bage pe Titus ku Dalmati.
11 Lukas nari ngenca ras aku. Babalah Markus radu ras kam, sebap banci sampatina aku bas pelayanenku.
12 Tapi enggo kusuruh Tikikus+ ku Epesus.
13 Adi reh kam, baba mantelku si kutadingken i Troas i rumah Karpus, bage pe gulungen-gulungen kitap, terutama gulungen si iban arah kulit nari.
14 Mesui kel kuakap iban Aleksander, tukang tembaga e. Jahwe* pagi si mbalas ia sesuai ras perbahanenna.+
15 Kam pe arus hati-hati man bana, sebap megegeh kel ia ngelawan beritata.
16 Sanga tangtangna aku mbela diri i lebe-lebe pemerentah, la lit si nemani aku. Kerina kalak nadingken aku. Mbera-mbera la balas Dibata kalak e perban perbahanenna e.
17 Tapi Tuan tedis i deherku nemani aku ras mereken gegeh, gelah arah aku, berita si meriah e tuhu-tuhu iberitaken janah kerina bangsa banci megikenca.+ Aku pe selamat arah babah singa nari.+
18 Pulahi Tuan aku arah kerina kejahaten nari janah selamatkenna aku guna Kerajanna i surga.+ Imuliakenlah ia seh rasa lalap. Amin.
19 Peseh salamku man Persila* ras Akuila,+ bage pe kerina kalak si lit bas rumah tangga Onesiporus.+
20 Erastus+ tetap tading i Korinti, tapi Tropimus+ kutadingken i Miletus perban sakit ia.
21 Usahakenlah reh sope musim mbergeh.
Eubulus, Pudens, Linus, Klaudia, ras kerina turang senina si deban, kirim salam man bandu.
22 O turang senina, mbera-mbera semangat si cidahken kena ipasu-pasu alu kiniulin si luar biasa arah Tuanta nari.
Cataten i teruh
^ Ntah “erguna.”
^ Ntah “guna mpeseh kai si merhat kalak e megikenca.”
^ Ntah “megenggenglah.”
^ Ntah “teruslah beritaken berita si meriah.”
^ Ntah “garis finis.”
^ Ntah “Priska.”
