3 Johanes 1:1-14
1 Aku sekalak pertua,* kutulis surat enda man Gayus si seh kel teku kelengna.
2 O senina si kukelengi, ertoto aku gelah kai si mehuli terjadi man bandu, mbera-mbera terus kam sehat bagi gundari.
3 Meriah kel kuakap sanga reh piga-piga senina janah katakenna maka terus jemakndu kebenaren, terus ka ikutkenndu dalan kebenaren.+
4 La lit si banci erban ukurku riahen asangken megi anak-anakku terus erdalan bas kebenaren.+
5 O senina si kukelengi, kam setia ndahiken dahin guna turang senina, amin pe la tandaindu kalak e.+
6 Enggo bereken kalak e kesaksin kerna kekelengenndu i lebe-lebe runggun. Sanga lawes pagi kalak e, sampatindu min kalak e alu cara si ngena ate Dibata.+
7 Sebap kalak e lawes guna kepentingen gelar Dibata, alu la ngarapken kai pe+ arah bangsa-bangsa si deban nari si la erkiniteken.
8 Emaka arus sialo-alo kalak e alu meriah ukur,+ alu bage ikut kita erdahin ndukung kebenaren.+
9 Enggo pernah kutulis surat man runggun, tapi Diotrepes, si merhat jadi nomor sada i tengah-tengah kena,+ la hamatina kai pe si kataken kami.+
10 E me sebapna adi reh pagi aku, kukataken kerina kai si enggo lakokenna. Enggo pitnahna kami.+ Labo e saja ngenca, la ka hamatina senina-seninata si reh+ janah halangina ka kalak si deban gelah ula ngaloken senina-seninata e, usahakenna mpedarat kalak e arah runggun nari.
11 O senina si kukelengi, ula usih kai si jahat, tapi usihlah kai si mehuli.+ Ise si ngelakoken kai si mehuli asalna arah Dibata nari.+ Ise si ngelakoken kai si jahat la tandaina Dibata.+
12 Kerina turang senina mujiken Demetrius janah ia nggeluh sesuai ras kebenaren. Kami pe mereken kesaksin kerna ia janah tehndu maka kesaksin kami e benar.
13 Melala denga teku si kuceritaken man bandu, tapi la teku kuceritaken alu pulpen ras tinta.
14 Ngarap aku lanai ndekahsa banci kita jumpa, gelah banci kita langsung ngerana.
Mbera-mbera lit kedamen bas kam.
Teman-teman si i jenda kirim salam man bandu. Peseh salamku man teman-teman si lit i jena sada per sada.
Cataten i teruh
^ As. “dilaki si enggo metua.”
