Amos 5:1-27
5 “O kalak Israel, begikenlah lagu ceda ate* si kuendeken man kena,
2 ‘Singuda-nguda Israel enggo ndabuh bas negrina sendiri,Lanai ia banci tedis.
Kerina kalak enggo nadingken ia.
La lit sekalak pe si nampati ia tedis.’
3 “Sebap bagenda nina Jahwe Tuhan Si Meganjangna,
‘Kota si maju erperang alu seribu kalak, seratus kalak nari ngenca mulih.
Si maju erperang alu seratus kalak, sepuluh kalak nari ngenca mulih, bage me pagi si terjadi man kalak Israel.’+
4 “Bagenda nina Jahwe man kalak Israel,
‘Daramilah Aku gelah tetap kena nggeluh.+
5 Ula lawes ku Betel,+Ula lawes ku Gilgal+ ntah pe nyebrang ku Berseba,+Sebap itaban pagi penduduk Gilgal,+Janah kernep* pagi Betel.
6 Daramilah Jahwe gelah tetap kena nggeluh,+Adi lang, reh pagi Aku bagi api guna nutung keturunen Jusup.
Keri pagi Betel ipan api e janah la lit ise pe si mateken api e.
7 Ubah kena keadilen jadi sinuan-sinuan si pagit,Janah ambekken kena kai si benar ku taneh.+
8 Aku kap si erban bintang Kima* bage pe bintang Kesil,*+Aku kap si ngubah gelap si mesangat jadi erpagi-pagi.
Aku kap si erban suari jadi gelap bagi berngi.+
Aku kap si ngelebuh lau arah laut nariGuna ngamburkenca ku doni.+
Aku kap Jahwe, e me gelarKu.
9 Rempet pagi Kukernepken kalak si megegehBage pe ingan-ingan si erbenteng.
10 Segat ate kalak e kalak si mereken persinget i gerbang kota,Segat kel ate kalak e kalak si ngataken kai si benar.+
11 Paksa kena kalak mesera nggalari sewa juma,*Buat kena biji-bijinna* jadi upeti.*+
Emaka lanai pagi kena tading i rumah si ibangun kena si iban arah batu si enggo ipotong,+Lanai pagi kena minem anggur arah kebun anggur si mejilena si suan kena.+
12 Sebap Kuteh uga rusurna kena mberontak,*Ras uga belinna dosa-dosa kena.
Tindas kena kalak si benar,Aloken kena sen sogok,*Janah la kena adil man kalak si mesera bas gerbang kota.+
13 Emaka paksa si e, sinik kalak si lit pengangkanna,Sebap paksa si e masa si bahaya.+
14 Daramilah kai si mehuli, ula kai si jahat,+Gelah tetap kena nggeluh.+
Alu bage, Jahwe Dibata penguasa malekat tetap ras kena,Bagi si kataken kena.+
15 Segatlah ate kena kai si jahat, ngenalah ate kena kai si mehuli,+Banlah keadilen tetap lit i gerbang kota.+
Mbera-mbera Jahwe Dibata penguasa malekatNcidahken perkuah ateNa man keturunen Jusup si nggeluh denga.’+
16 “Emaka ngerana Jahwe Dibata penguasa malekat, nina Jahwe,
‘Bas lapangen-lapangen kota lit sora tangis,Bas kerina dalan nderkuh kalak e, nina, “Andiko, andiko!”
Idilo kalak e perjuma-juma guna erceda ate,Bage pe kalak upahen si beluh ngandung guna nuri-nuri.’
17 ‘Lit pagi sora tangis bas kerina kebun anggur,+Sebap lewat pagi Aku i tengah-tengah kena guna ngukum kena,’ nina Jahwe.
18 ‘Cilaka me kalak si nimai wari Jahwe!+
Kai kin si arapken kena terjadi bas wari Jahwe?+
Wari e gelap, labo terang.+
19 Si e pagi bagi kalak si kiam arah singa, tapi jumpa ras beruang,Sanga ia masuk ku rumah janah tandekenna tanna ku tembok, tagut nipe ia.
20 Wari Jahwe e gelap, labo terang.
Wari e mendung, labo cerah.
21 Segat ateKu janah ciga ateKu perayan-perayan kena,+La meriah ukurKu nganggeh bau persembahen si bereken kena i perpulungen si istimewa.
22 Amin pe bereken kena persembahen tutungen, janah bereken kena persembahen man bangKu,Labo pagi meriah ukurKu.+
Labo pagi ngena ateKu binatang si mbur si bereken kena jadi korban persadan.+
23 Pengadilah ende-enden kena si gejek e.
La Aku nggit megi sora alat musik kena si ersenar.+
24 Pediatlah keadilen maler bagi lau,+Janah kai si benar bagi lau maler si terus maler.
25 O kalak Israel, 40 tahun dekahna kena i taneh mesawang,*Lit kin bereken kena korban ras persembahen man bangKu?+
26 Emaka gundari, arus baba kena patung Sakkut ras patung Kewan* si iban kena,Eme bintang si sembah kena jadi dibata kena.
27 Kuban pagi kena itaban ku ingan si terdauhen arah Damaskus,’+ bage nina Dibata si ergelar Jahwe, Dibata penguasa malekat.”+
Cataten i teruh
^ Ntah “lagu perngandungen.”
^ Ntah banci saja “Janah jadi ingan si angker.”
^ Mungkin kelompok bintang Belantik (Orion).
^ Mungkin kelompok bintang Kartika (Pleiades) bas kelompok bintang Taurus.
^ Ntah “nggalari pajak taneh.”
^ Ntah “Aloken kena uang tutup mulut.”
^ Ntah “ngelakoken kejahaten.”
^ Taneh si mbelang si jarang iingani.
^ Mungkin duana patung e maksudna planet Saturnus si isembah jadi dibata.
