Amos 7:1-17
7 Enda me pengenehenen* si cidahken Jahwe Tuhan Si Meganjangna man bangku: Kuidah sada kelompok labang sanga sinuan-sinuan musim mbergeh* mulai turah. Sinuan-sinuan musim mbergeh e isuan kenca dukut-dukut ipotong guna raja.
2 Sanga kelompok labang e ngkeriken sinuan-sinuan bas negri e, ningku, “O Jahwe Tuhan Si Meganjangna, ampuni min kalak e!+ Jakup e lemah, banci kin ia selamat?”*+
3 Emaka ubah Jahwe keputusenNa.+ “Si e labo pagi terjadi,” nina Jahwe.
4 Enda ka pengenehenen si cidahken Jahwe Tuhan Si Meganjangna man bangku: Kuidah Jahwe Tuhan Si Meganjangna ngirimken api jadi hukumen. Keri ipan api e laut si mbelang, janah meseng banna deba negri e.
5 Kenca si e ningku, “O Jahwe Tuhan Si Meganjangna, ula nai min teruskenNdu.+ Jakup e lemah, banci kin ia selamat?”*+
6 Emaka ubah Jahwe keputusenNa.+ “Si e pe labo pagi terjadi,” nina Jahwe Tuhan Si Meganjangna.
7 Kenca si e cidahkenNa ka pengenehenen enda man bangku: Kuidah Jahwe tedis i deher tembok si ibangun alu alat pengukur tegak lurus,* janah jemakNa alat pengukur tegak lurus.
8 Kenca si e nina Jahwe man bangku, “Kai si idahndu, Amos?” Ningku, “Alat pengukur tegak lurus.” Kenca si e nina Jahwe, “Kuukur pagi umatKu Israel alu alat pengukur tegak lurus. Lanai pagi kalak e Kuampuni.+
9 Ingan-ingan ersembah* jang Isak+ lanai pagi iurus janah ihancurken pagi ingan-ingan si badia Israel.+ Kuserang pagi keluarga Jerobeam alu pedang.”+
10 Sekalak imam i Betel eme Amasia,+ ngirimken pesan enda man Jerobeam+ raja Israel, “Amos enggo ersekongkol ngelawan kam i tengah-tengah kalak Israel.+ Negri e lanai tahan megi kerina kata-katana.+
11 Bagenda nina Amos, ‘Ibunuh pagi Jerobeam alu pedang, ibaba pagi kalak Israel jadi tabanen arah negrina.’”+
12 Kenca si e nina Amasia man Amos, “O kalak si lit pengenehenenna, laweslah ku negri Juda. I jahlah engko cari makan,* i jahlah engko ernubuat.+
13 Ula nai engko ernubuat i Betel,+ sebap i je lit ingan si badia raja,+ eme ingan ersembah kerajan.”
14 Nina Amos man Amasia, “Mbarenda aku labo nabi. Labo ka anak nabi. Mbarenda aku permakan+ ras ngurus batang ara kerangen.
15 Tapi lanai kupermakani biri-biri, sebap lebuh Jahwe aku janah suruh Jahwe aku, nina, ‘To, ernubuatlah man umatKu Israel.’+
16 Emaka begikenlah kata-kata Jahwe enda, ‘Enggo katakenndu, “Ula nai ernubuat kerna Israel,+ ula nai cakapken+ kerna keturunen Isak.”
17 Emaka bagenda nina Jahwe, “Diberundu jadi pelacur pagi i kota enda, anak-anakndu si dilaki ras si diberu ibunuh pagi alu pedang. Tanehndu ibagi-bagi pagi alu nali pengukur, mate kam pagi i negri si najis. Israel pasti ibaba jadi tabanen arah negri enda.”’”+
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Maksudna, sanga bulan Januari ras Februari.
^ As. “tedis?”
^ As. “tedis?”
^ Ntah “alu unting-unting.”
^ As. “Ingan-ingan si meganjang.”
^ As. “engko man roti.”
