Amos 8:1-14
8 Enda me pengenehenen* si cidahken Jahwe Tuhan Si Meganjangna man bangku: Kuidah sada keranjang buah musim perlego.
2 Kenca si e nina, “Kai si idahndu, Amos?” Ningku, “Sada keranjang buah musim perlego.” Jenari nina Jahwe, “Enggo seh kedungen umatKu Israel. Lanai kalak e Kuampuni.+
3 ‘Bas wari e, ende-enden bas rumah pertoton berubah jadi tangis,’+ nina Jahwe Tuhan Si Meganjangna. ‘Melala pagi mayat ibenterken i japa pe.+ Lanai pagi lit sora kai pe.’
4 Begikenlah, o kena si merjaki kalak si mesera,Si munuh kalak si meteruk ukur,+
5 Si ngataken, ‘Ndigan nge dung perayan bulan baru,+ gelah banci dayaken kami biji-bijin* kami?
Ndigan nge dung wari Sabat,+ gelah banci dayaken kami biji-bijin kami?
Alu bage, banci kurangi kami timbangenna,Ras naikken kami ergana.
Nipu kami alu timbangen si curang.+
6 Alu bage, banci tukur kami kalak si la mampu alu pirak,Tukur kami kalak si mesera alu erga sepasang selop,+Ras dayaken kami sisa biji-bijin si biasana iambekken.’
7 Aku, Jahwe si imuliaken Jakup, ersumpah Aku bas gelarKu,+‘Labo pernah Kulupaken kerina perbahanen kalak e.+
8 Bagi Lau Nil i Mesir sanga banjir,+Kuatir pagi kalak e janah la kalak e tenang.+
Mugur-ugur pagi negri e,*Ras erceda ate kerina pendudukna.’
9 Nina Jahwe Tuhan Si Meganjangna,‘Bas wari e, Kuban pagi matawari terbenam sanga tengah wari,Ras Kuban pagi negri e gelap sanga terang wari.+
10 Kuubah pagi perayan-perayan kena jadi wari ceda ate,+Kuubah kerina lagu kena jadi lagu ceda ate.*
Kuban pagi kena kerina make kain guni bas awak kena, janah cukur kena buk takal kena,Kuban pagi wari e bagi wari erceda ate perban kematen anak si tonggal.
Seh kel pagitna kiniseran si nanami kena bas pendungi wari e.’
11 Nina Jahwe Tuhan Si Meganjangna, ‘Reh pagi masana,Kuban kelihen bas negri e,Labo perban la lit pangan* ntah pe lau,Tapi perban la megiken kata-kata Jahwe.+
12 Mugut-ugut pagi kalak e erdalan arah laut ku laut,Bage pe arah utara ku timur.*
Darami kalak e pagi kata-kata Jahwe ku jah ku je, tapi la dat kalak e.
13 Bas wari e, singuda-nguda si mejile pingsan pagi,Bage pe anak perana perban muasna.
14 Kalak e eme kalak si ersumpahBas gelar dibata-dibata palsuSi lit i Samaria,*+ Dan,+ ras Berseba.*+
Ndabuh pagi kalak e janah lanai banci tedis.’”+
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Ntah “doni.”
^ Ntah “lagu perngandungen.”
^ As. “roti.”
^ Ntah “ku matawari terbit.”
^ As. “Bas kesalahen Samaria.” Maksudna, berhala si lit i Samaria si erban kalak e ersalah.
^ As. “ras dalan ku Berseba.” Mungkin dalan ku ingan nembah berhala si lit i je.
